Biblia jórhentpesïndi eskachi iáminduecha pekadoriska. Juchaari orheta taati Adáni uénaspti pekadori úkuarhini. Ka jimbokachi imeeri uájpeeska, ménichani no sési ambechi únchasïnga ka asta niátani imani ambe engachi tátsekua pʼamondakuarhijka. Tata Diosïiri uájpa Jesukristu, uarhisti para maiampiani juchaari pekaduecha. Imeeri uarhikua úsïndi eskachi puáminhantaaka pekaduechani. Inde euajpintskua ambakiti regalu máesti Tata Diosïiri (Arhinta je Roma 3:​23, 24).

Jarhastiksï máru engaksï kʼérati pekaduechani uaaka ka kurhamarhikuarhisïndiksï sini ménisï Tata Diosï uaa puákuantani. Joperu xáni sési enga Biblia arhijka: “ Iurhiri Jesukristueri enga jindeeka [Tata] Diosïiri uájpa, pʼikurhiantasïndijtsïni iámindu pekaduechani” (1 Juanu 1:7). Ísïisti, Tata Diosï Jeoba tsípikua jingoni puáchiantasïndi asta kʼérati pekaduechani joperu engachi mintsita jingoni móantaska (Arhinta je Isaías 1:18).

Engachi uéjka eskajtsï Tata Diosï Jeoba puáchentaaka, jatsiskachi para jorhenguarhini imeeri ambe: kurhanguni andisï újki ambe ma ka kurhajchani imeeri konsejuechani ka juramukuechani (Juanu 17:⁠3). Tata Diosï Jeoba tsípikua jingoni puákuantasïndi imeechani engaksï móantajka imeeri pekaduechani ka engaksï jánguarhintajka mójtakurhini (Arhinta je Ukuecha 3:19).

Ma uáti úni ambe enga Tata Diosï uéjka. Ima kurhangusïndi eskachi no uaaka iámindu ambe sési úni. Tata Diosï Jeoba pʼamojpitisti ka sési kámpisïndi. Ísï jimbo, ¿nójtsï uékapirini sánderu ambe jorhenguarhini nénajtsï uaaka jaiapanherantani? (Arhinta je Salmo 103:13, 14).