Warialda tʼarhexespka (Nueva Gales del Sur). Ini ireta jimbo, uánikuechaksï kaasïreendi karichichani ka uákasiïchani ka mámaru ambeksï ikarasïreendi. Ístu kánikua sési jándespti ka kási no úkuarhisïreendi no sési jásï ambe.

Ji orhetiska 10 uájpeecheeri, ísï jimbo uénaspka ánchikuarhini enga 13 jatiripka parani úni jarhuatani familiani. Uénaspka ranchuecharhu ánchikuarhini jimbokani sántkusïni jámapka eskuela. Engani 15 jatiripka peonispkia ka kabaiuechani jorhendasïreenga.

Sésiispti ranchuecharhu ánchikuarhini joperu ístu nómbe. Kánikua tsitisïreenga ambe engani ueenga ka ístu nani engani ánchikuarhienga. Chúrikuechani uaxakatini jarhasïreenga jima máekandu engani kurhikani jarheenga, exesïreenga lunani ka jóskuechani ka inchatiruechani sési jájkundi tarhiata jirejtasïreenga kampurhu. Eratsesïreenga eska jarhaspka nema enga kueraapka iámindu indeni xáni sési jásï ambe. Joperu ístuni jatsiaspka no ambarhati pámbirichani. Máteru ánchikuarhirichaksï no sési járhati uandakuechanksï úrasïreendi ka itsutasïreendiksï ka jíjtuni májkueni úspka.

Engani 18 jatiripkia mótsispka Sydney. Uékasïreenga prepararikuarhini ejersiturhu joperuni no úspka jimbokani no kánikua eskuela jámaspka. Exentaspka ánchikuarhita ma ka jima pakaraspka ma uéxurhini. Jima uénaspka uandontskuarhekuani Jeobaeri testiguechani. Engajtsïni pʼímarhipka tánguarhikuecharhu, niraspka ka jirejiresï exespka eskaksï jurhimbikua ambe jorhentpisïreenga.

Joperu ísï tátsekua kʼuanhatsentaspka kampurhu. Pakaraspka Goondiwindi (Queensland). Exentaspka ánchikuarhita, tembuchaspka joperu ístuni uénaspka kauini.

Juchiiti uarhiiti ka ji tsimanchi sapiichani kaaspka. Ísï tátsekua engachi na kaapkia, ueenaspka eratsentani na engani kʼamarhukupiringa imani ambe jingoni engani úni japka. Jiájkani miántaspka ambe engani jorhenguarhipka tánguarhikuarhu Sydney ka úspka ambe ma.

Exentaspka rebista Aianhpiri. Jima jukaspti domisiliu Jeobaeri testiguecheri beteli enga Australia jaka, karta ma karaspka eskajtsïni jarhuatapiringa. Tátsekuarini pʼorhembispti testigu ma enga kánikua sési kámpienga ka xénchpeni ka uénaspka jorhenguarhi Biblia imani jingoni.

Engani na jorhenguarhini japkia, exespka eskani jatsispka para mójtakuni juchiiti irekua. Jarhaspti bersikulu ma engari mintsitarhu niárachepka: 2 Corintios 7:1 TNM, engajtsïni pʼímarhijka parachi “jurajkuni iámindu indeni ambe enga jájkujka juchaari kuerpuni”.

Eratsespka eskani nóteru kauipiringia ni itsutani. Kánikua úkua jukaspti jimbokani pʼindespkia ísï úni. Joperuni eratsetixapkia parani úrani juchiiti tsípikua parani Tata Diosïni marhuakuni. Ambe engareni kánikua jarhuataspka jindeespti ambe enga arhijka Romanos 12:2 TNM, enga arhijka: “Ka ásteru jámia je májkueni jámani eska i parhakpini anapu kʼuiripuecha, sánderu sési, mójtaku je chaari eratsekuani”. Exespka eska parani mójtakuani juchiiti úkuechani, jatsispka parani mójtakuni juchiiti eratsekuani ka ísï exeni ambe eska Tata Diosï na exejka: eska jindeeska ambe enga kánikua no sési útspijka. Imeeri jarhuajperata jimbo úspkani ísï úni

Ambe enga sánderu úkua jukapka jindeespti nóteru úrania no sési járhati uandakuechani. Jorhenguarhispka ambe enga arhijka Biblia jimini Efesios 4:29, TNM: “Asï jáma je no sési jásï ambe uandani”, joperuni ióndaspka ísï úni. Ambe engareni jarhuatapka jindeespti eratsentani ambe enga arhijka Isaías 40:26. Enga jóskuecheeri ambe uandajka, arhisïndi: “Eranchi je auandarhu ka exe je. ¿Né kueraaski iámindu indeni ambe? Imeesti enga numeru jimbo petajka imeeri ejersituni, mándani arhini miiupariani; ka iámindu nombri jimbo uandajpasïndi. Ka no ma kueratasïndi jimbo ima kʼéri ka ambakiti uinhapikua jatsiska”. Ísï jimbo, enga Tata Diosï jatsika uinhapikua para kueraani unibersuni engani xáni tsitienga exeni, seguru jarhaspka eskarini úpiringa uinhapikua íntskuni parani úni mójtakurhini ka jaiapanherantani. Kánikua jánguarhintaspka ka kómarhini ka úspka nóteru úrani no sési járhati uandakuechani.

Engani peonipka no úsïreenga uánikua kʼuiripuecha jingoni uandontskuarheni, jimboka ranchuecharhu nani engani ji ánchikuarhienga nóksï uánikua kʼuiripuecha jámasïreenga. Joperu jimbokani nireenga Jeobaeri testiguecheri tánguarhikuecharhu, jorhenguarhispka néna sési uandontskuarheni kʼuiripuecha jingoni. Ístujtsïni jorhendasti néna uandontskuarhekuani kʼuiripuechani ambakiti ambe Tata Diosïiri Reinueri (Mateo 6:9, 10; 24:14).

Máru uéxurhinistia engani marhuani jaka kómu orhejtsïkuti ma kúnguarhikuarhu. Kʼéri kóntperata máesti úni jarhuatani juchiiti erachiichani.

Agradeserikusïnga Tata Diosï Jeobani engari jurajkuka eska ji engani no kánikua jámaka eskuela, jorhenguarhipiringa imeeri ambe (Isaías 54:13). Terukuntasïndi ini uandakuecha jingoni ambe enga arhijka Proverbios 10:22: “Jeobaeri kóntperata uánikua ambakiti ambe juásïndi”.