TEMA I REBISTERI
Pornografia: ¿No no sési jarhaski o no sési útspisïni?
Pornografia iápuru ísï jarhasti. a Xarharasïndi telebisionirhu, modarhu, musikarhu, internetirhu, redesi sosialirhu, anunsiuecharhu, pelikularhu, rebistecharhu, bideu jueguecharhu, telefonuecharhu ka uánikua máteru ambe. Iásï sánderu ka sánderu úrasïndiksïa pornografia (exe je rekuadruni “ Máru ambe pornografieri”).
Iásï kʼuiripuechaksï ménderueni exesïndi pornografiani. Profesora Gail Dines uandaspti: “Ima imajeniicha engaksï antesi úrakuarhienga komu pornografia iásï nóteruksï ísï exesïndia.
¿Chá ambe eratsesïni? ¿No no sési útspisïni o benenu máeski enga uándikpijka? Jesúsi uandaspti: “Ambakiti anhatapu ma, ambanharhi frutu jukasïndi; joperu anhatapu tereri ma, no sési jásï frutu jukasïndi” (Mateo 7:17 TNM). ¿Pornografia néna no sési útspisïni? Parachi míteni, ju je exesïni tanimu ambe.
¿Néna no sési úkusïni kʼuiripuni pornografia?
AMBE ENGAKSÏ UANDAJKA IMEECHA ENGAKSÏ MÍTEKUKA: Pornografia bisiu úkuarhisïndi, kʼuiripuecha engaksï mítekuka iiri ambe, ísïksï terukutantasïndi komueska droga ambe.
Brian, b enga bisiu jatsispti pornografia jingoni Internetirhu, uandantasïndi: “Nóreni ambe ma úsïreendi pʼínguni. Ísïispti enajkini drogadu japi. Kánikua no sési pʼikuarherasïreenga, engani jamberini manarenga ka éjpu pʼamerani. Mámaru ambe úspka ka uánikua uéxurhiniicha jimbo úspka jurajkuni”.
Imeecha engaksï pʼindejka exeni pornografia jískasïndiksï. Tsitisïndiksï jandiajku jarhani ka ísïksï xarharasïndi enajkiksï no ma ambe újki, joperuksï kʼuratsesïndi, uandanhiani, no sési pʼikuarherani ka ikiani. Ka máruksï jamberi niárasïni uékani uándikukuarhini. “Sergio enga someni késkuenga imeeri telefonurhu pornografieri ambe uandantasïndi, tsitisïreenga jandiajkuni jarhani no jánhaskasïreenga ambe úni. Ísï pʼikuarherasïreenga enajkini no ma ambe marhuaueni, no sésini pʼikuarherania, jandiajku ka enajkini ónhakata japi. Kánikua kʼuratseni pʼikuarherasïreenga ka chéni, jimbosïni no jirinhenga jarhuajperata”.
Nájkirukaksï sanititu exeaka pornografia o no uékaparini, úsïndi kánikua no sési útspini. Doctora Judith Reisman enga kánikua sési mítekuka pornografieri ambe, jima uandantaspti enga jaka comité del Senado de Estados Unidos ari ambe: “Imajeniicha pornografieri, memoriarhuksï grabarikuarhisïndi ka mátirkuksï jima pakarasïndi, ma no uékaparini méntku miáni jarhasïndi [...] ka jamberi ma no méni uaati mirikurhiani”. Susan, uátsï ma enga 19 jatiriika enga no uékaparini exepka pornografia Internetirhu ka tátsekua niárani bisiu jatsini, uandantasïndi: “No úsïnga mirikurhiani imajeniichani. Na uéjki jatini miáuasïnga. Péringani no méni uaaka mirikurhiani”.
AMBE ÚKUARHISÏNI: Kʼuiripuechaksï pornografieri jántspiri úkuarhisïndi ka kánikua no sési úkuasïndi (2 Pedru 2:19).
¿Pornografia néna no sési úkusïni familiani?
AMBE ENGAKSÏ UANDAJKA IMEECHA ENGAKSÏ MÍTEKUKA: “Pornografia úsïndi eskaksï familiecha ka temungurhiriicha jurajperaaka”. (The Porn Trap [Las trampas del porno], de Wendy y Larry Maltz).
Pornografia kánikua no sési úkusïndi familiani ka temungurhiriikuani...
...jimboka úsïnga eskaksï nóteru mintsikperakia, nóteruksï uékaakia májku kʼéri apondini ka niksï xénchperani (Proverbios 2:12-17).
...jimboka imajku pendienti pákuarhisïnga, nóteruksï agustu pʼikuarherasïndia imeeri acheeti o uarhiti jingoni (Efesu 5:28, 29).
...jimboka úsïnga eskaksï imani ambe eratseaka enga no ísïika ka enga no sési jaka (2 Pedru 2:14).
...jimboka úsïnga eskaksï afuersa uékaka relasioni seksuali jatsini imeeri acheeti o uarhiti jingoni (Efesu 5:3, 4).
...jimboka úsïnga eska ma uékaka ísku jándikua ambe úni imeeri eratsekuarhu o imeeri úkuecha jingoni (Mateu 5:28).
Biblia uandasïndi eska acheeti ka uarhiti nóksï jatsiska para enganiarperani (Malaquías 2:16). Jimboka engaksï enganiarperajka kánikua no sési úkuasïndi temungurhiriichani ka úsïndiksï eskaksï jurajperaaka o diborsiarikuarhini ka i ambe kánikua no sési úkuasïndi sapiichani.
Pornografia sánderu no sési úkuasïndi sapiichani. Brian seguirisïndi uandantani: “Engani 10 jatiripka chʼanaxapka ka exeantaspka juchiiti taatiiri rebistechani engaksï pornografieri ambeepka. Ueenaspka jirikuarhitini exeani nájkirukani no mítepka andisïni xáni tsitieni imani imajeniichani. Inde ambe úspti eskani no úpiringa jurajkuni indeni ambe, astakani na kʼépkia”. Uánikua estudiuechaksï xarhatasïndi eska pornografia úsïnga eskaksï i tumbi sapirhatiicha tsitiaka relasioni seksuali ambe jatsini ka ístu úsïndi eskaksï no nani máru sési pʼikuarheraaka.
AMBE ÚKUARHISÏNI: Pornografia benenu máesti enga újka eska kʼamakurhiaka xénchperakua temungurhiriikuarhu ka kánikua no sési útspisïndi (Proverbios 6:27).
¿Ambe uandasïni Tata Diosï karakata pornografieri ambe?
AMBE ENGA BIBLIA UANDAJKA: “Ísï jimbo, uándiku je chaari kuerpurhu anapu ambe enga parhakpinirhu jaka ka enga tsitijka ísku jándikua ambe niátani, ikichakueni jásï ambe úni, relasioni seksuali únchani ka méntku no sáni pʼíngukuarhini, no sési ambe únchani ka tsititspeni jámani, enga ísïika komueska diosï úkatechani kómarhiani” (Colosenses 3:5 TNM).
Jeoba c kurhunhisïndi pornografiani. No solu jimboka ima pímbinhasïiska. Imajtsïni kueraasti parachi úni relasioni seksuali ambe jatsini ka imeeri eratsekua jindeespti eskaksï temungurhiriicha úrapiringa indeni ambe parachi sési pʼikuasperani, májku kʼériksï jarhani ka sésiksï pʼikuarherani kaani uájpeechani (Santiagu 1:17).
Jiájkani, ¿andisï uandajki eska Tata Diosï Jeoba kurhunhijki pornografiani? Ju je exeni máru ambe.
Jeoba mítesti eska pornografia úsïnga kʼamajkuni kʼuiripuecheri irekua (Efesu 4:17-19).
Imajtsïni xénchasïndi ka no uékasïndi eskachi komu nitamakuarhiaka (Isaías 48:17, 18).
Uékasïndi kuájchakuani temungurhiri ka familiechani (Mateo 19:4-6).
Uékasïndi eskachi imani ambe uaaka engajtsïni juramuchijka ka eskachi janhanharhiaka máteruecheri derechu (1 Tesalónika 4:3-6).
Uékasïndi eskachi sési úraaka imani sésikua engajtsïni íntskuka para uájpeechani kaani (Ebreu 13:4).
Ima mítesti eska pornografia úsïnga eska ma no sési eratseaka, eska jandiajku pendienti pákuarhiaka ka eskachi ísï exeaka seksu eska Satanási na exejka (Génesis 6:2; Judasʌ 6, 7).
AMBE ÚKUARHISÏNI: Pornografia úsïndi eska kʼuiripu ma no uaaka sési pájperani Tata Diosï jingoni (Roma 1:24).
Jeoba kánikua sési pʼikuarherasïndi ima kʼuiripuecha jingoni engaksï uéjka jurajkuni indeni bisiuni. Biblia uandasïndi: “Jeoba pʼamojpitiisti ka sési kámpisïndi, ióndasïndi ikiani ka kánikua xénchpesïndi. Jimboka ima sési míteska na engachi úkata jaka, miáparini eskachi tʼupuriska” (Salmo 103:8, 14). Tata Diosïjtsïni pʼímarhinisïndi parachi andarhieraka imani “ka imajtsïni pʼamojkuati ka ístujtsïni kánikua kóndentani jiáni engachi uétarhinchani jauaka eskajtsïni jarhuataaka” (Hebreos 4:16 TNM; “ Exe je néna jurajkuni pornografia”).
Uánikua kʼuiripuechanksï jiókuarhistia Tata Diosïiri jarhuajperatani. ¿Marhuakuaski? Biblia uandasïndi eskaksï máru úskia jurajkuani indeni no sési járhati bisiuechani: “Joperu iásï Tata Diosïksïni juparhintastia ka pímbinhajkuntastiksïni Tata Jesukristueri nombri jimbo ka imeeri espiritu santu jingoni ka iásïksïni ísï exesïndia komueska kʼuiripuecha engaksï sési jámajka” (1 Corintios 6:11 TNM). Íksï kʼuiripuecha ísï pʼikuarherasïndi eska apostoli Pablu: “Ji iámindu ambe úsïnga úni jimbokarini Tata Diosïsï uinhaperantajka, imarini íntskusïndi indeni uinhapikuani engani uétarhinchani jarhajka” (Filipenses 4:13 TNM).
Susan enga úpka jurajkuni pornografiani, uandantasïndi: “Jeobajkusï újti nemani jarhuatani para úni jurajkuni indeni bisiuni. Engachi jarhuajperata kurhakujka uaakachi ísï irekani eska ima na jaiapanhintajka ka uaakachi sési pájperakua ma jatsini imani jingoni. Tata Diosï nójtsïni méni jurajkuati”.
