Eranhaska je eska taati jémba ma arhisïnga imeeri sapini enga siete uéxurhini jatiriika: “Kánikua iónistia enga Tata Diosï kueraaka Echerini ka iámindu ambe enga echerirhu jaka. Ístu ústi Jurhiatani, Lunani ka jóskuechani”. Jimajkani sapi eratsentani pakarasïndi ka tátsekua kurhamarhisïndi: “Pa, ¿ka né úski Tata Diosïni?”.

Taati jémba mókukusïndi: “No nema. Tata Diosï méntkisï jarhasptia”. Tataka sapichu komforme pakarasïndi indeni mókuntskua jingoni. Peru enga na sánhani aripani jarhajkia kʼéni, seguirisïndi kurhamarhikuarhini indeni ambe. Ima úkua jukanchasïndi kurhanguni eska jarhaska nema enga desde méntkisï jakaia, jimboka nisikiera unibersu japti desde méntkisï. Jimbosï seguirijti kurhamarhikuarhini: “¿Néna ueenaski jarhani Tata Diosï?”.

Ka, ¿ambe uandasïni Biblia? Májkueni uandasïndi eska taati jémba na arhipka sapini. Moisési arhispti Jeobani: “Antedeksï juátecha niárani jarhani, ori ueenani sánhani arhini kueraani parhakpinini ka echerini enga mámaru ambe andarajka, desde méntkisï asta méntkisï tʼuri jindeeska Tata Diosï” (Salmo 90:1, 2). Profeta Isaíasi, sáno májkueni ambe uandaspti: “¿Nóri niáraski míteni, o nóri niáraski kurhaani? Eska Tata Diosï Jeoba, ima enga kueraaka parhakpinini, Tata Diosï máeska enga méntkisï jauaka (Isaías 40:28). Ka Judasïri karakata uandasïndi eska Tata Diosï “méntkisï” niáraspka jarhani (Judasʌ 25).

Íksï tekstuecha xarhatasïndi eska Tata Diosï jindeeska “ima enga méntkisï jindeeka Rei”, ísï eska na uandapka apostoli Pablu (1 Timoteo 1:17). I ambe arhikuekasïndi eska Tata Diosï desde méntkisï jarhaspkia ka para méntkisï jauati (Jaŋaskuecha [Apocalipsis] 1:8). Tata Diosï no méni jatsispti ueenakua ma ka nijtu méni niáraa kʼamakurhini, jimbosï ima jindeeti Ima enga Iámu ambe újka úni.

¿Andichisï úkua jukanchajki kurhanguni i ambe? Jimbokachi no ióni irekasïnga, inde ambe úsïndi eskachi méntku ménderueni exeaka tiempuni ka no ísï eska Jeoba. Pori ejemplu, para ima mili uéxurhini, ísïisti eska ma jurhiatikuajku jimboka ima desde iónisï irekaskia (2 Pedru 3:8). Parachi úni kurhanguni i ambe, ju je ejemplu ma exeni. Chochu ma, 50 jurhiatikisï irekasïndi. ¿Úpirini chochu ma kurhanguni ambe arhikuekasïni irekani 70 o 80 uéxurhini, ísï eskachi jucha na irekajka? ¡Nómbe! Engachi terukutakuarhintajka Kueraajpirini jingoni, juchachi ísïiska komueska chochuecha. Tata Diosïri eratsekua, iauani sánderu kʼéri ambeesti eska juchaari (Isaías 40:22; 55:8, 9). Ísï jimbochisï no újka kurhanguni iámindu ambe Tata Diosï Jeobaeri ambe.

Nájkirukachi úkua jukanchajka jakajkuni eska Tata Diosï méntkisï jarhaspka, inde ambe ísïisti. Enga máteru nema kueraapiringa Tata Diosïni, imasï jindeepirindi kuerajpiri. Joperu Biblia uandasïndi eska Tata Diosï Jeobasï jindeeka enga úka iámindu ambe (Jaŋaskuecha 4:11). Ístu, míteskachi eska unibersu no méntkisï jarhaspka (Génesis 1:1, 2). Jimajkani, ¿néna ueenaski jarhani unibersu? Ima enga kueraaka, jatsipirindia para tʼuini jarhania. Ka ístu jatsipirindia para tʼuini jarhani ante de máteru nema, komu imeeri orheta Uájpa o ánjelicha (Job 38:4, 7; Kolosasi 1:15). I ambe xarhatasïndi eska ante de Tata Diosï kueraani ambe ma, jandiajku jarhaspka. Imani no nema úpirindi kueraani, jimboka no ma ambe jarhaspka ni nema ante de ima.

Juchaari tsípikua ka iámindu ambe enga unibersurhu jaka xarhatasïndi eska jarhaska Tata Diosï ma enga desde méntkisï irekaka. Imajkusï úpti úni ka uandani na enga manakuarhipiringa iámindu ambe unibersurhu ka íntskuni tsípikua iámindu ambeeni enga jaka (Job 33:4).