Tʼarhexeska Los Angeles, iretecha engaksï kétsekisï jaka California, U.S.A., nani enga mítekateka jimboka droga ambe kánhasïnga ka jimbokaksï tsitisïnga uarhipeni. Kaasïnga sinko ermanuecha

Engani sapiipka, juchiiti nándijtsïni pʼájtasïreendi ebanjelistecha jingoni. Peru engani tumbiipka, nóteru jukaparharasïrengia ambe engani jorhenguarhini japka. Dominguechani, iglesiarhu anapu koru jingoni piresïreenga, peru máteru jurhiatikuechani jimbo nirasïreenga kʼuínchikuecharhu, úrasïreenga droga ambe ka ísku jándikua ambe niátasïreenga.

No sési kámpisïreenga engajtsïni ikiatapiringa. Ambe uéjkini úrasïreenga para atajpini. Nóreni kánikua marhuachesti ambe engani jorhenguarhipka iglesiarhu. Uandasïreenga “bengansa, Tata Diosïristi, peru ji jarhuatasïnga”. Uéxurhini setenta jimbo ísï, engani diesiochu jatiripka, tsitisïreenga ambe enga uandeenga grupu politiku enga Panteras Negras arhinheenga, enga kuájpienga kʼuiripuecheri derechos sibilicha. Grupu ma jingoni úkuarhispka enga sáno májkueni ambe kuájpienga, uánikua uelta eskuelarhu no jarhasti klasechani jimbokachi jámasïreenga protestechani uaani.

Peru ji, sánderu ambe jirinhaxapka, ísï jimbo, kánikua no sési jásï ambe niátaspka. Pori ejemplu, juchiiti amiguechani ka ji nirasïrengachi sinerhu para exeani pelikulechani, nani enga xarhareenga na engaksï no sési kámeenga Afrika anapu kʼuiripuechani Estados Unidosirhu. Ka engachi ini ambe exepka sinerhu, niáraskachi atani imani tumbiichani engaksï urapepka. Ka ístu nirasïreenga jimeesïsï engaksï irekenga kʼuiripuecha engaksï urapepka parachi atani.

Imani tiempu jimbo, juchiiti ermanuecha ka ji, ísïchi mítekatespka juramutichani jimbo, komueska no sési úricha. Ma juchiiti ermanu jámasïreendi pandiia ma jingoni, ka jíjtuni kúnguarhisïrenga imeecha jingoni. Sánhani arhixapka sánderu no sési ambe úni.

Ma juchiiti amigueri taaticha testiguestiksï, ka pʼímarhistijtsïni parani nirani imeecha jingoni tánguarhikuecharhu. Jiáni engani uénapka nirani, kuenta íntskukuarhespka eskaksï ima kʼuiripuecha ménderuenispka, iáminduechaksï úrasïreendi Bibliani, ¡asta tumbiichani íntspisïrendiksï arhijtsïkperatechani! Ískuni pakaraspka engani mítepka eska Tata Diosïri arhinhakua jindeeska Jeoba ka eskaksï imeecha úrenga engaksï uandontskuarhenga (Salmo 83:18) Uápurisï anapuecha tánguarhiendi ka iáminduechaksï sési pájperasïrendi.

Ueenakuarhu no jiókuarhispka Biblieri jorhenguarhikua ma peru útasï nirasïreenga tánguarhikuecharhu. Ma chúrikua engani tánguarhikuarhu japka, juchiiti amiguechaksï nirasptiksï konsierturhu ma ka uándikusptiksï tumbini ma para euakuarhini imeeri chamarra sïkuiriri. Pauandikua uandantaxaptiksï ambe engaksï úka ka nóksï no sési exesïreendi imani ambe. Sáno iáminduechaksï ónhanhaspti, ¡sési pʼikuarheraspka jimbokani no jámaxapka imeecha jingoni! Jimajkani eratsespka mójtakuni juchiiti irekua ka ueenaspka jorhenguarhini Biblieri ambe.

Exeni na engaksï pájperajka iámindu kʼuiripuecha, méntku ménderuenisti na engaksï pájperajka Jeobaeri testiguecha ka inde amberini ísku pakataspti. Pori ejemplu Jeobaeri testigu urapiti ma enga jatsipka para máteru nani ísï nirani, jurajkuaspti imeeri sapiichani familia ma jingoni enga máteru kolorika paraksï kuidariuani. Ka ístu, tumbi ma enga máteru kolorika niraspti irekani familia ma jingoni enga urapika. Inde amberini jarhuatasti kurhanguni eska Jeobaeri testiguecha úsïndi ambe enga arhijka Juanu 13:35: ka “Ini jimboksï míteati iámindu kʼuiripuecha eskajtsï jindeeska juchiiti jorhenguarhiticha engajtsï uékperaaka máteru ka máteruni jingoni”. Exentaspkia jurhimbiti kristianuechani.

Jiáni engani jorhenguarhini japka Biblia, kuenta íntskukuarhespka eskani jatsispka para mójtakuni na engani jáxepka. Jánguarhintaspka para mintsita jingoni sési káni máteruechani ka no ikiani jámani (Roma 12:2). Sánhani arhispka mójtakurhini ka eneru de 1974 jimbo itsï atakuarhispka komu Jeobaeri testigu ma.

Engani itsï atakuarhipkia, seguirispka jánguarhintani para pʼíngukuarhini. Pori ejemplu, jurhiatikua ma engachi aianhpini jámani japka, niraspka andanguni nemani engareni sïpacheni uékeenga. Engani jupikani japkia, jurajkuspti ambe enga sïpani japka ka seguirispti uiriini. Engani aianguapka máteruechani ambe enga úkuarhinchapka, ma erachi arhisptirini: “¿Ambe úpirini engari andangupiringa?”. Inde amberini jarhuatasti parani mójtakuni na engani jáxeka.

Oktubri de 1974 jimbo, sieni orechani úrasïreenga para jorhendani máteruechani Biblieri ambe. Tátsekua pʼímarhistijtsïni parani nirani jarhuajpeni Sukursalini enga Brooklyn jaka (Nueva York). Ka 1978 jimbo kʼuanhatsentaspka Los Ángeles para kuidarini juchiiti nándini enga pʼamenchani japka. Tsimani uéxurhini tátsekua tembuchaspka Aarhonda jingoni. Imarini kánikua jarhuatasti kuidarini juchiiti nándini asta jiáni jamberi enga uarhipka. Tátsekuachi pʼímarhinhaspka parachi nirani Galaadiri Jorhentperakuarhu. Engachi uéakuntapka, axastijtsïni komu misioneruecha jini Panamá, nani engachi útasï jaka.

Desde engani itsï atakuarhipka, útasï úkua jukanchasïreenga pʼíngukuarhini, joperu jánguarhintasïreenga ísï úni ka sési péntani ambe ma. Uánikua kʼuiripuecha ka ístu juchiiti uarhiiti arhisptijtsïni eska kánikua sési úxapka, ka ískuni pakarasïnga inde ambe jimbo. Ji eratsesïnga eskani no úpiringa jandiajku úni ini ambe. Sánderu sési Biblia jatsisti uinhapikua para mójtakuni kʼuiripuni ma.

Biblia jarhuatastirini parani sánderu sési irekani ka sési pájperani máteruechani jingoni. Nóteruni uarhipesïngia, sánderu sési jarhuatasïnga kʼuiripuechani parakaksï míteaka Tata Diosïni. Ka ístu úpka jorhendani Biblieri ambe, nemani enga jingoni ióntki no ueenga sési pájperani. Asta iásï jamberi, juchiiti témba ka ji, jarhuataskachia jukari ochenta kʼuiripuechani paraksï Jeobani marhuakuni.

Diosmaiamukua arhisïnga Jeobani, jimbokarini jarhuataska para sési ka tsípikua jingoni irekani ka ambakiti amiguechani jatsiani.