Acul andajpenuska, ireta sapichu ma enga juátecharhisï jaka jini oeste de Guatemala. Juchiiti familia ixilisti, ma grupu kʼuiripuecheri engaksï maiecha jimbo uéraka. Aparte de utusï uandani, ístuni uandasïreenga juchaari idioma. Ka imani tiempu jimbo tʼarhexeska enga guerra jarhani japka paisirhu ka enga 36 uéxurhini duraripka. Indeni guerra jimbo, uánikua ixilichaksï uarhispti.

Engani ji kuatru uéxurhini jatiripka, ka juchiiti ermanu siete, ima chʼanaxapti granada ma jingoni enga jima charapka. Indeni jimbo, ji siegu pakaraska ka juchiiti ermanu uarhisti. Jiáni uératini, Ciudad de Guatemalajtsïni páspti jima engaksï sapiicha jarhajka engaksï siegueka ka jima jorhenguarhiska braille jimbo arhintani. No méni kurhanguspka andijtsïnisï no jurajkueni uandontskuarheni máteru sapiicha jingoni ka imeechajtujtsïni no uékasïreendi uandontskuarhechini. Méntkisï jandiajkuni jarhasïrenga, jimbosïni uékani jarheengia eska niárapiringa ima tsimani mesicha parani juchiniu nirani mama jingoni, jimbokarini ima kánikua sési kámasïreenga. Peru engani ji 10 uéxurhini jatiripka, ima uarhispti. Kánikua no sési pʼikuarheraxapka jimbokarini imajkusï xéncheenga ka nóteru jarhasptia.

Engani 11 uéxurhini jatiripkia, kʼuanhatsentaspka juchiiti iretarhu ka niraspka irekani juchiiti mediu ermanu ka imeeri familia jingoni. Íntskustijtsïni tʼirekua ka xukuparhakua, joperu no nema úsïreendi eskani meru sési pʼikuarherantapiringa. Ménichani, uinhachaparini kurhamarhisïreenga Tata Diosïni: “¿Andisï uarhi juchiiti naandi? ¿Andisïni siegu pakara?”. Kʼuiripuechajtsïni arhisïreendi eska xásï no sési ambe komu ambe engani ji úkuarhinchapka, eska úkuarhisïnga jimboka Tata Diosï ísï uékasïnga. Jimbosïni ji eratsenga eska Tata Diosï kánikua no sési úrispka ka eska no sáni pʼamojpitispka. Engani úpiringa, ji mejori uándikukurhipiringa.

Jimbokani ji siegueska, fasilispti parajtsïni máteruecha no sési úchini. Engani sapichuepka, someni biolarinhaspka. No nemani aianguspka indeni ambe jimboka ísï eratsesïrenga eska no nema uandanhiasïrenga jíndeni jimbo. Kʼuiripuechajtsïni no kánikua uandontskuarhechisïrendi ka jíjtuni no kánikua uandarispka. Méntkuni kómu pʼikuarherani jarhasïrenga ka no tsitisïreenga máteru kʼuiripuecha jingoni jarhani jimbokani no nemani mintsïkasïrenga.

Engani 13 uéxurhini jatiripkia ka engani eskuelarhu japka, temungurhiri ma enga Jeobaeri testigueka, nirasptijtsïni uandontskuarhechini jiáni engani rekreu uérapka. Maestra ma engareni kánikua pʼamojkuenga arhiaspti eskajtsïni nipiringa pʼorhembini. Ima temungurhirijtsïni arhispti eska Biblia uandasïnga eskaksï sieguecha niáraaka ménderu exeni ka eskaksï uarhiricha tsíntaaka (Isaías 35:5; Juanu 5:28, 29). Ji tsitisïreenga kurhaani ambe engajtsïni uandontskuarhichenga. Peru jimbokani ji no pʼindespka uandontskuarheni, ji méntkisï pínasku pakarasïrenga. Nájkiruka ji no ma ambe uandeenga, seguirisptijtsïni tekaantskua ka uékperakua jingoni pʼorhembini parajtsïni jorhendani Biblieri ambe. Ka ísïksï úsïreendi nájkirukaksï jatsipka para 10 kilometru xanharani (6 millas) juátarhisï paraksï juchiiti iretarhu niárani.

Juchiiti ermanurini arhispti eska xarharasïreenga eska ima temungurhiri no jatsikuarherispka peru eskaksï sési mórhekuarhitini nirasïrenga. Xarharasïreendi eskajtsïni uékasïreenga jimbokajtsïni ménichani intsïmbisïrenga ambe ma. Ji sési mítetixapkia eskaksï solu jurhimbiti kristianuechajkuksïsï xáni jánguarhintapiringa para jarhuataani máteruechani.

Para jorhenguarhini Biblieri ambe, úrasïreenga publikasionichani braille jimbo. Kurhangusïreenga ambe engani jorhenguarhini japka peru úkua jukanchasïrenga jakajkuni máru ambe. Pori ejemplu, úkua jukanchasïreenga jakajkuni eska Tata Diosï ka máteru kʼuiripuechajtsïni xénchasïreenga. Úska kurhanguni andisï Tata Diosï jurajkuni jaki eska jauaka kómu nitamakua ambe, peru úkua jukanchasïrenga ísï exeni imani komueska Taati uékpiti ma. *

Engani na jorhenguarhipapkia Biblieri ambe, sánhani arhispka jakajkuni ambe enga jimini uandajka Tata Diosïri ambe. Pori ejemplu, jorhenguarhiska eska Tata Diosï no sési pʼikuarherasïnga engachi no sési nitamakuarhini jarhajka. Ima ini ambe uandasïndi para imeeri marhuaricha engaksï no sési nitamakuarhini jaka: “Exeska na enga xáni no sési nitamakuarhini jaka juchiiti ireta [...;] sési míteska na engaksï xáni no sési nitamakuarhini jaka” (Éxodo 3:7). Engani exepka na enga xáni xénchpetika Tata Diosï Jeoba, uékaspka úrani juchiiti tsípikua para úni ambe enga ima uéjka. Ísï jimbo, 1998 jimbo itsï atakuarhispka, para Jeobaeri testigueni.

Ma uéxurhinisï tátsekua, niraspka jorhentperakuarhu ma para ima kʼuiripuecha engaksï siegueka, jini Escuintla. Jima anapu kúnguarhikuarhu orhejtsïkuti ma exespti na engani xáni úkua jukanchenga nirani tánguarhikuecharhu jini Acul, jimbokani jatsispka para xáni iauani xanharani eska ima temungurhiri engajtsïni nireenga jorhendani Biblieri ambe. Parareni jarhuatani, ima jirinhaspti familia ma parani imeecho pakarani ka ístu engajtsïni jarhuatapiringa tánguarhikuecharhu nirani. Asta iásï jamberi ima familiajtsïni ísï kuidarisïndi enajkini ji meru imeeri kʼumanchikuarhu anapue.

Útasïksïni úpiringa uánikua máteru ambe aianguni na engajtsïni erachicha xarhatachejka eskajtsïni uékasïnga. Sésini mítetixaka eskaksï Jeobaeri testiguecha jindeeska jurhimbiti kristianuecha (Juanu 13:34, 35).

Nóteruni ísï pʼikuarherasïngia enajkini no ma ambe újki úni ka erokuarhikua ma jatsiska; tsípikua jingoni irekasïngia. Ka iásï enbesi de eratseni jarhani ambe engani úkuarhinchaka, úrasïnga juchiiti tiempuni para jarhuataani máteruechani parakaksï imeechajtu míteaka ambakiti ambe enga Biblia uandajka. Ístu, orhejtsïkuti máeska kúnguarhikuarhu ka nirasïnga arhijtsïkpini máteru kúnguarhikuecharhu engaksï ixú no iauani jaka. Ka kánikuani jukaparharasïnga jiáni engani arhijtsïkpijka kʼérati tánguarhikuecharhu.

Uéxurhini 2010 jimbo, ji niraspka Escuela de Entrenamiento Ministerial (enga iásï jindeeka Jorhentperakua para Aianhpiricha Reinueri) jini El Salvador. I jorhentperakua jarhuatastirini parani úni sánderu sési kuidariuani erachichani ka pirenchichani kúnguarhikuarhu anapuechani. Ístu, ústi eskani ísï pʼikuarherapiringa eskarini Tata Diosï Jeoba kánikua jukaparharasïnga ka eskarini xénchasïnga, ima Tata Diosï enga újka eska né uéjki uaaka ambe enga ima uéjka.

Jesúsi uandaspti: “Sánderu sésisti intsïmpini ka eska intsïmbinhani” (Ukuecha [Hechos] 20:35). Iásï, tsípikua jingoni irekasïnga ka nájkirukani ji eratsenga eska no méni úpiringa, iásï exesïngia eskani úsïnga jarhuataani máteruechani.