Paddington andajpenuska, lugari ma jimbo enga uánikua irenhaka jini Londres (Inglaterra). Juchiiti nándi jingoni irekaspka ka tanimu jingonikuecha jingoni engaksï sánderu kʼérapka jíndeni jingoni. Juchiiti taati kánikua kauisïrendi, jimbosï iauani méni juchantsïni jingoni jarheendi.

Engani nanaka sapichu máepka, juchiiti nándirini jorhendaspti chúrikuechani kómarhini. Ji Biblia sapichu ma kámasïreenga enga Salmuechantku jukaapka ka eranhaskasïrenga kústakuani parani úni pireani. Ma xanhari, librurhu ma arhintaspka ambe ma engani no méni úka mirikurhini: “Ma jurhiani iámindu ambe kʼamakurhiati”. Ini ambe jimbo no úsïreenga kʼuíni; jimbokani eratsesïreenga ambe enga úkuarhipiringa sánderu orhepani. Ji uandasïreenga: “Tsípikua no i ambejkueti. ¿Andisïni ixú jaki?”. ¡No uékasïreenga uarhini!

Ueenaspka espirituecheri ambe uékani míteni. Ísï jimbo, uékasïreenga uarhiricha jingoni uandontskuarheni ka asta panteonicharhu nirasïreenga eskuelarhu anapu amiguecha jingoni. Ístuni imeecha jingoni exeasïreenga pelikulechani engaksï chérpikueri ambe xarharajka o terroriri. Inde ambejtsïni chérasïreendi, peru ístuchi tsitisïreenga.

Engani apenasi 10 uéxurhini jatiripka, juchiiti irekua kánikua no sési niraxaptia, ueenaspka itsutani ka nóteruni úsïreengia jurajkuni. Ka tátsekua mariuana itsutasïreengia. Engani 11 jatiripka, tsʼémuspka alkoli jingoni, ka nájkirukani no tsitipka na enga jámarhapka, tsitispka ísï pʼikuarherani eskani kauirini jarhasïrenga. Kánikua tsitisïreenga kústakua ambe ka ístu uarhani ka méntkisï engani ueenga nirasïreenga kʼuínchikuecharhu. Chúrikuechani sïpakuarhisïreenga juchiniu ka sïpatikuarkuni niátasïrenga ante de erandeni. Ka pauandikuechani kási no méni nirasïreenga eskuela jimbokani kuataratini jarhasïreenga. Ka engani nireenga, alkoli arhani jarhasïreenga.

Juchiiti nándi kuenta íntskukuarhespti na engani xáni no sési jámeenga, asta jiáni enga exeapka juchiiti kalifikasionichani, kánikua ikiaspti, ka no sésichi arhijperaspka, jimbosïni ma tiempu Tony jingoni nípka irekani enga juchiiti nobiuepka. Tony sïpani ambe jámasïreendi, droga atarantasïreendi ka mítekatespti eska no sési jámasïreenga atajpini. Sánisï tátsekua, embarasada pakaraspka engani apenasi 16 jatiripka, kánguarhispka juchaari primeru sapini.

Jiáni míteaspka Jeobaeri testiguechani engani imani kʼumanchikua jimbo irekani japka nani engaksï uarhiiticha irekajka engaksï charhakuechani kánguarhiajka ka nóksï jatsini uámbani. Gobiernueri jarhuajperata jimbo niáraspka jima irekani. Tsimani uarhiitichaksï méntkisï nirasïrendi pʼorhembiani tsimani uarhiiti sapirhatichani. Ma uelta imeecha jingoni jarhaspka parani xarhatakuani pirenchichani eska no ísïispka ambe engaksï imeecha uandeenga. Joperujtsïni imeecha iatsitakuarhu ka sési mókuchiantaspti iámindu juchiiti kurhamarhikuechani Bibliani úraparini. Kánikua tsitispka engaksï xáni sési kámpienga. Ísï jimbo, uékaspka jorhenguarhini Biblieri ambe imeecha jingoni.

No ióndaspka jorhenguarhini ambe ma Bibliarhu enga mójtakupka juchiiti irekuani. Desde engani nanaka sapichu máepka chésïreenga uarhini, joperuni jorhenguarhispka ambe enga Jesúsi uandapka tsíntskueri ambe (Juanu 5:​28, 29). Ístuni jorhenguarhispka eska Tata Diosï uandanhiasïnga jíndeni jimbo (1 Pedru 5:⁠7). Ambe enga Jeremías 29:11 jimbo uandajka mintsitarhurini niárachespti. Jimini arhisïndi: “Jimbokani ji sési míteska ambe engani eratseni jaka para chá —ísï uandasïndi Tata Diosï Jeoba—. Eratsexaka parajtsï pínandikua jatsini, ka no kómu nitamakua ambe. Parajtsï sánderu orhepani sési irekani ka parajtsï erokuarhikua ma jatsini”. Ueenaspka jakajkuni eskani úpiringa irekani para méntkisï Paraisurhu ixú Echerirhu (Salmo 37:29).

Jeobaeri testiguechajtsïni kánikua sési kámaspti. Engani ueenapka nirani tánguarhikua ma jimbo imeecha jingoni, exespka na engaksï iáminduecha xáni sési kámberajka ka ísïjtsïni kámaspti enajkichi amiguepi (Juanu 13:34, 35). ¡Kánikuajtsïni ménderueni kámaspti eska imani iglesiarhu engani nireenga! Imeechajtsïni no arhinchaspti nájkirukaksï mítepka na engani irekani japka ka jarhuatasptijtsïni mámaru ambe jimbo. Niáraspka ísï pʼikuarherani eskani kʼéri familia ma jimbo jarhaspka.

Engani jorhenguarhini japkia Biblieri ambe, niáraspka kurhanguni eskani jatsispka parani mójtakurhini parani úni Tata Diosïri amigueni. Kánikua úkua jukanchaspka parani nóteru itsutania. Ístuni kuenta íntskukuarhespka eskani úndasïreenga uékani mariuana itsutani engani kurhauenga máru pirekuechani, jimbosïni ueenapka máteru járhati pirekuechani kurhauani. Nóteruni uékasïrengia kauini, jimbosïni nóteru nípkia kʼuínchikuecharhu ni diskotekecharhu. Ka ístuni imani amiguechani jirinhaaspkia engajtsïni jarhuatapiringa ísï irekani eska Tata Diosï na jaiapanhentajka (Proverbios 13:20).

Tonyjtu jorhenguarhixaptia Biblieri ambe Jeobaeri testiguecha jingoni. Engaksï erachicha Biblia jingoni mókukuantauenga kurhamarhikuechani, ima sánhani arhispti kurhanguni eska ísïiska ambe enga jorhenguarhini japka. Ima kánikua mójtakurhisptia: nóteru kurhiasïreendia imeeri amiguechani engaksï tsitienga uarhipeni, nóteru sïpasïrendia ka nijtuteru itsuteenia mariuana. Joperu, parakachi úpiringa ísï marhuakuni Tata Diosï Jeobani eska ima na jaiapanhentajka, jatsispkachi para sibilarikuarhini ka sési tʼarhexerani juchaari sapini familiarhu ma. Ísï jimbo, 1982 jimbochi sési tembuperaska.

Miásïnga eskani rebistecharhu Aianhpiri ka ¡Tsínharhi! * ji arhiantasïreenga ima kʼuiripuecheri engaksï úpka mójtakurhini ísï eskani ji na uékeenga. Kánikuarini uinhaperantasïreendi ambe engaksï imeecha uandanteenga ka balorijtsïni íntskusïreendi parani seguirini jánguarhintani ka no kuatantani. Méntkisï kurhakusïrenga Tata Diosï Jeobani eskarini seguiripiringa jarhuatani. Tony ka ji Jeobaeri testiguchi úkuarhiska engachi itsï atakuarhiska juliu de 1982 jimbo.

Jeobaeri amigu úkuarhini, jarhuatastirini parani úni tsípiti jarhani asta iásï jamberi. Tony ka ji exeskachia na engajtsïni Tata Diosï Jeoba jarhuataka jiáni engachi no sési nitamakuarhini japka. Ka juchachi jorhenguarhiskia mintsikani imani engachi uandanhiatechani jatsiajka ka méntkisïchi exesïnga na enga ima kuidarijka juchaari familiani (Salmo 55:22).

Kánikuachi sési pʼikuarherasïnga engachi jarhuataka juchaari tatakani ka ístu juchaari nanakani paraksï Jeobaeri amigu úkuarhini. Ka májkueni sési pʼikuarherasïnga exeni eskaksï juchiiti nimakuechajtu niáraxaka míteni Tata Diosï Jeobani.

Iásï kʼóruni úsïngia kʼuíni, nóteruni méntku eratseni jarhasïngia ambe enga úkuarhiaka sánderu orhepatini ni uarhikueri ambe. Tony ka ji, mándani semanachi pʼorhembiasïnga Jeobaeri testiguecheri kúnguarhikuechani parachi uinhaperantaani juchaari erachichani. Ka márkuchi nirasïnga kʼuiripuechani jorhendaani, engaksï mintsikaska Jesúsini ístuksï uaati irekani para méntkisï.