Kʼuiripuechaksï erakusïndi ambe ma enga jukaparhakueka, nénksï uékasïni eska juramukuauaka.

 ¿Ambe uandasïni Biblia iiri ambe?

 Biblia uandasïndi andisï no ma juramuti újki sési juramuni.

•   “Asï jáma je mintsikaani juramutiichani nijtu máteru kʼuiripuni, jimbokaksïni no uaaka pʼímutantani. Imeeri uinhapikua kʼamakurhisïndi, ima echeri úkuarhintasïndi; imani mismu jurhiatikua jimbo nóteru ambe ma eratsisïndia” (Salmo 146:3, 4).

 Iámindu juramutiichaksï niárasïndi uarhini na uéjkiksï xáni jánguarhintani sési juramuni. Ka ístu, nájkirukaksï jánguarhintaka ambakiti ambe úni, nóksï úsïndi úni eskaksï máteruechajtu seguiriuaka májkueni ambakiti ambe úni (Eclesiastés 2:18, 19).

 Biblia uandasïndi eskaksï kʼuiripuecha no kueraakata jarhaska paraksï jandiajku juramukuarhini.

•   “Kʼuiripu enga xanharani jaka ni sikiera sésikua jatsi para exeni nani enga ísï jatsika para xanharani” (Jeremías 10:23).

 ¿Jaki nema iásï enga meru uaaka sési juramuni?

 Biblia uandasïndi eska Tata Diosï kʼuiripuni ma erakuska para juramuni enga sési jorhendakata jaka ka mintsinharhikueni, ka jindeesti tata Jesukristu (Salmo 2:6). Ka ima jindeesti Rei Tata Diosïiri Reinuerirhu, ka i gobiernu máesti enga auandarhu jaka ka jini uératini juramuxati (Mateu 6:10).

 ¿Erakupirintsï chá tata Jesukristuni paraksïni ima juramuchini? Biblia uandasïndi andisï xáni jukaparhakue eskajtsï chá erakuaka ini ambe:

•   “Janhanharhi je Uájpani, engajtsï no ísï úska, Tata Diosï ikiauati ka chájtsï xanharu jimbo uarhiaka, jimboka ima no ióndasïnga ikiani. ¡Tsípisïndiksï imeecha engaksï imani nirajka andarhierani paraksï kuájchakukuarhini!” (Salmo 2:12).

 Iásïchisï jatsika para erakuni ambechisï uaa. Ka Biblieri profesiechaksï uandasïndi eska Jesúsi 1914 jimbo ueenaska juramuni. Ka ístuksï uandasïndi eska Tata Diosïiri Reinu kénditauaka iámindu parhakpini anapu juramutiichani (Daniel 2:44).

 Engajtsï uéjka míteni nénajtsï uaa apoiariini Jesúsiiri gobiernuni, arhinta je ini artikuluni “Ju je Tata Diosïri Reinu jingoni kuenta úkuarhini desde iásï”.