¡MÉNTKISÏ JINGONTKU JA JE!
¿Andisï politika újki eskaksï kʼuiripuecha no uaaka sési pájperani? | ¿Ambe uandasïni Biblia?
Interu parhakpinirhu, uánikua paisiichaksï nóteru úsïndia sési pájperani politika ambe jimbo. Enkuesta ma enga grupu Pew Research Center úka 2022 jimbo, xarhatasïndi eska jukari 65% kʼuiripuechaksï 19 paisiichani jimbo, uandasïndiksï eska imeecheeri paisiichani jimbo kʼuiripuechaksï iásï sánderu kʼérati problemeechani jatsiasïngia jimbokaksï nóteru úsïngia kurhangutsperani politika jimbo.
Jimeesïsï engajtsï chá irekaka, ¿exexakijtsï eskaksï kʼuiripuecha sánderu nóteru úsïngia sési pájperani politika ambe jimbo? ¿Andi? ¿Néna uaa sési niántani inde ambe? Ju je exeni ambe enga uandajka Biblia.
¿Andiksïsï kʼuiripuecha no újki sési pájperani?
Biblia uandasptia eska ini “últimu jurhiatikuecha jimbo” kʼuiripuechaksï mámaru jámapiringa jimboksïsï no úpirindi májku kʼéri jarhani.
“Últimu jurhiatikuecha jimbo jauati peligru, jimboka jimajkanisï anapu kʼuiripuecha solu pendienti piákuarhiaka” ka “kurhurasïnksï” (2 Timoteo 3:1-3).
Juramutiichaksï no úsïndi úni eska sési pájperanhaaka nájkirukaksï uánikua kʼuiripuecha jaka engaksï jánguarhintajka paraka ísï úkuarhiaka. Jarhastiksï kʼuiripuecha engaksï méntku ménderueni eratsejka eska máteruecha, jimboksïsï no újti májku kʼéri ánchikuarhini paraksï sési peentani ambe ma. Ka i ambe xarhatasïndi ambe enga tʼuini uandapkia Biblia.
“Kʼuiripu juramukusïndi máteru kʼuiripuni solu para no sési ambe úkuni” (Eclesiastés 8:9).
Joperu Biblia uandasïndi eska gobiernu ma jauaka nani enga juramuaka nema enga kʼóru méntku kénditaaka iámindu indeni ambe enga újka eska kʼuiripu no sési nitamakuarhiaka.
Ambakiti juramuti ma enga sési jimbo uandanhiajka kʼuiripuechani jimbo
Biblia uandasïndi né enga jindeeka ima enga uaaka sési peentani iámindu indeni ambe: tata Jesukristu. Jesúsijkusï sési jimbo uékajti ka imajkusï jatsiti uinhapikua ka juramukua para úni eskaksï iámindu kʼuiripuecha májku kʼéri jauaka ka sésiksï pájperani.
“Ima jurhiatikua jimbo, uániatiksï kʼuiripu jurhimbiticha, ka kánikua pínandikua jauati” (Salmo 72:7).
“Iámindu ireteechaksï imani marhuakuati” (Salmo 72:11).
Jesúsi jindeesti sánderu ambakiti juramuti, jimboka sési jimbo uandanhiasïndi kʼuiripuechani jimbo ka uékasïndi jarhuataani, sánderia imeechani engaksï no sési kánhaka.
“Jimboka ima jarhuataaka imani enga no jatsikuarheka ka enga jarhuajperata kurhajkuarhini jaka, ístu imani enga kaxumbitiika ka imani enga no jatsika né enga jarhuataaka. Pʼamojkuati imani enga kaxumbitiika ka imani enga no jatsikuarhirika, ka pʼímutantauati imechani engaksï no jatsikuarhirika. Kuájpiauati paraksï nóteru kómu nitamakuarhinia” (Salmo 72:12-14).
Jorhenguarhi je sánderu ambe indeni gobiernueri enga Jesúsi juramutiika, Tata Diosïiri Reinueri ambe, ka na engaksïni uaaka jarhuatani chánksïni i Reinu ka ístu nénajtsï uaa chá apoiariini indeni Reinuni.
Exe je bideuni ¿Ambeski Tata Diosïri Reinu?
Arhinta je artikuluni “El Reino de Dios: un gobierno sin corrupción”.