¡MÉNTKISÏ JINGONTKU JA JE!
Iásï sánderu aparhikuarhisïndia iámu parhakpinirhu | ¿Ambe uandasïni Biblia?
Uandanhasti eska juliu 2022 jimbo sánderu aparhikuarhisti iámu parhakpinirhu ísï eska no méni.
“Tsimani xanhariistia enga i mesi jimbo China anapu juramutiichaksï arhiajka kʼuiripuechani eska sáno 70 siudadiicharhu kánikua aparhikuarhiaka” (25 de julio de 2022, servicio de noticias de la CNN).
“Jimboka Europa kánikua aparhikuarhixaka uánikua paisiicha jimbo juáteechaksï kurhundexati” (17 de julio de 2022, The Guardian).
“I domingu jimbo uánikua siudadiicharhu Estados Unidos kánikua aparhikuarhispti jimboka kosta esteerisï, suririsï ka oesteerisï kánikua aparhikuarhixaka” (24 de julio de 2022, The New York Times).
¿Andisï xáni aparhikuarhini jaki? ¿Arhikuekasïni i ambe eska nóteru ióni jimbo nóteruchi uaakia irekani echerirhu? ¿Ambe uandasïni Biblia?
¿Biblia uandaspia eska xáni aparhikuarhini japiringa?
Jo. Enga ísï xáni aparhikuarhini jaka terukuntasïndi imani ambe jingoni enga Biblia uandajka eska úkuarhini japiringa ini jurhiatikuechani jimbo. Pori ejemplu Jesúsi uandaspti eskachi “chérpikueni jásï ambe” exepiringa o ambe ma engachi “no méni exeni japka ka engajtsïni kánikua chérapiringa” (Lukasʌ 21:11). Uánikua kʼuiripuechaksï chésïndi enga ísï xáni no sési aparhikuarhini jaka ka uandanhiasïndiksï engaksï kʼuiripuecha niáraaka kʼamajkuni Echerini.
¿Uaa útasï irenhani Echerirhu?
Jo uaati irenhani. Jimboka Tata Diosï kueraaska Echerini paraksï kʼuiripuecha ixú irekani para méntkisï (Salmo 115:16; Eclesiastés 1:4). Tata Diosï no jurajkuati eskaksï kʼuiripuecha kʼamajkuaka Echerini. Sánderu sésii, kʼamajkuauati “imeechani engaksï kʼamajkuni jaka Echerini” (Apocalipsis 11:18, TNM).
Ju je exeni máteru tsimani ambe engajtsïni Tata Diosï arhijka eska uaaka Echerini jingoni:
“Desiertu ka echeri kʼarhiri kánikuaksï tsípini jauati, ka pákua enga no ma ambe újka tsikini, tsípini jauati ka ísï tsïpaati komueska asafrani” (Isaías 35:1). Tata Diosï no jurajkuati eska Echeri desiertu máeuaka nani enga no nema uaaka irekani. Sánderu sési, sési jájkuntaati imani ambe engaksï kʼuiripuecha no sési úkuka Echerini”.
“Tʼuri kuidarisïnga Echerini ka úsïngari eska kánikua ambe íntspiaaka ka eska uánikua ambe jauaka” (Salmo 65:9). Tata Diosï Jeoba uaati eska Echeri sési jásï paraisu máeuaka.
Enga klima ísï mójtakurhini jaka terukuntasïndi imani ambe jingoni enga Biblia uandapka eska úkuarhini japiringa. Parajtsï sánderu ambe míteni iiri ambe arhinta je artikuluni “¿Qué dice la Biblia sobre el cambio climático y nuestro futuro?”.
Biblia aiatspesïndi eska klima sési niántaaka, parajtsï sánderu ambe míteni iiri ambe arhinta je artikuluni “¿Quién salvara el planeta?”.