¡MÉNTKISÏ JINGONTKU JA JE!
Jeobaeri testiguecha ka Holocausto | ¿Ambe uandasïni Biblia?
Jurhiatikua 27 de eneru de 2023, uánikua kʼuiripuechaksï miántasïndi jiáni engaksï xáni uánikua judiuecha uándikunhaka (Día Internacional en Memoria del Holocausto). Jukari 75 uéxurhiniistia enga xáni no sési ambe úkuarhika, ka ísï jimbo, jamberijtsï chá kurhamarhikuarhijka andisï Tata Diosï jurajkupi eskaksï xáni uánikua judiuecha uándikunhapiringa o eska úkuarhipiringa Holocausto.
Parajtsï míteni ambe uandasïni Biblia, arhinta je artikuluni: “¿Andiksïsï uándikuapi uánikua judiuechani? ¿Andisï Tata Diosï jurajkupi para i ambe úkuarhini?”.
Holocausto jimbo, judiuechaksï kánikua no sési nitamakuarhispti ka iámindu ambe organisadu jarhaspti paraksï uándikuani. Joperuksï ístu jarhaspti máteru kʼuiripuecha engaksï no sési kánhapka ka uándikunhani Holocausto jimbo. Máru inde kʼuiripuechaksï jindeespti Jeobaeri testiguecha, íjtuksï kánikua no sési kánhaspti jimbokaksï jakajkusïreenga ambe enga uandajka Biblia.
Parajtsï sánderu ambe míteni, arhinta je artikuluni “¿Ambeksï úkuarhinchaspi Jeobaeri testiguecha Holocausto jimbo?”.
Parajtsï sési irekani ka erokuarhikuajtsï ma jatsini
Uánikua kʼuiripuechaksï chésïndi eska ménderu niáraaka xásï ambe úkuarhini eska Holocausto jimbo. Joperujtsïni kánikua sési pʼikuastasïndi enga Biblia uandajka eska sánderu orhepatini nóteru méni niáraaka xásï no sési jásï ambe úkuarhini.
“Jimbokani ji sési míteska ambe engani eratseni jaka para chá, ísï uandasïndi Tata Diosï Jeoba. Eratsexaka parajtsï pínandikua jatsini, ka no kómu nitamakua ambe. Parajtsï sánderu orhepani sési irekani ka parajtsï erokuarhikua ma jatsini” (Jeremías 29:11). a
I ambe jiáni úkuarhiati enga Tata Diosï Jeoba kʼamajkuaka no sési jásï ambeni ka enga iámindu ambe sési peentaaka. No ióni jimbo, Tata Diosï ini ambe uaati:
Kʼamajkuauati no ambarhati kʼuiripuechani, imeechani engaksï xáni no sési kaajka máteruechani (Proverbios 2:22).
Sési pʼikuastantauati iámindu imeechani engaksï no sési nitamakuarhijka (Jaŋaskuecha 21:4).
Tsítantauati ixú Echerirhu iámindu imeechani engaksï uarhikia (Juanu 5:28, 29).
Chájtsï uaaka mintsikani eska úkuarhiaka i xáni sési jásï ambe enga Biblia aiatspeni jaka. Engajtsï uéjka míteni andijtsïsï uaa mintsikani ini ambe, pʼímarhisïngaksïni parakajtsï exeaka na engachi jorhentpijka jucha Biblieri ambe.
a Tata Diosï, Jeoba arhinhasïndi (Salmo 83:18).