¿Nanakeechaksï uaa seguru irekani? | ¿Ambe uandasïni Biblia?
Interu parhakpinirhu, uánikua nanaka ka nanaka sapirhatiichaksï no sési kánhasïndi. ¿Chá ménisï niáraski no sési kánhani? Ju je exeni andisï Tata Diosï xáni jukaparharajki eskaksï nanakeecha sési jauaka ka ambe enga uaaka ima parakaksï nanakeecha nóteru no sési kánhaakia.
“Engani nanaka sapichuepka, juchiiti ermanurini atasïreendi ka no sésirini arhini. Ka engani na uambuchapkia, ísturini juchiiti suegra no sési kámasïreendi. Juchiiti suegruechajtsïni ísï kámasïreendi enajkini ji jántspiri máepi. Uékasïreenga uandikukuarheni” (Madhu, a India).
Organización Mundial de la Salud uandasïndi eskaksï nanakeecha iápurisïsï no sési kánhajka. Ístu uandasïndi eska 1 de kada 3 nanakechaksï niárasïnga atanhani o afuersa jupikanhani.
Enga chá ménisï ini ambe nitamakuarhika, jamberijtsï chéjka nani uéjki engajtsï niuaka jimbokajtsï eratsesïnga eskajtsï niáraaka no sési arhinhani, atanhani o afuersa jupikanhani. Ini ambe jimbo, jamberijtsï eratsejka eska no nema jukaparharaasïnga nanakeechani. ¿Joperu na exeasïni Tata Diosï nanakeechani? ¿Ima jukaparharaasïni?
Biblia uandasïndi eska Tata Diosï uékasïnga eskaksï nanakeecha seguru irekaaka.
¿Néna exeasïni Tata Diosï nanakeechani?
Tekstu: ‘Tataka ka nanakani kuerauasti’ (Génesis 1:27).
Ambe enga arhikuekajka: Tata Diosï kueraasti tatakani ka nanakani jimboksïsï májkueni jukaparhati. Ístu uékasïndi eska acheeti xénchaaka uarhiitini ísï eska ima na xénchakuarhijka (Éfesu 5:33; Kolosasi 3:19). I ambe xarhatasïndi eska Tata Diosï uékasïnga eskaksï nanakeecha seguru pʼikuarheraaka.
“Engani nanaka sapichuepka, máru familiarhu anapuechajtsïni afuersa jupikaspti. Ka engani 17 jatiripkia, juchiiti patronirini arhispti eskarini chúntapiringa ánchikuarhitarhu engani no imani jingoni apondipiringa. Ka engani na sánderu jatiripkia, juchiiti acheeti, taatiicha ka besinuechajtsïni kánikua no sési kámasïreendi. Joperuni tátsekua mítespka Tata Diosï Jeobani, b imani engajtsïni kueraaka. Ka jorhenguarhispka eska ima kʼóru janhanharhiasïnga nanakeechani ka niáraspka jakajkuni eskarini ima xénchasïnga ka eskarini jukaparharasïnga” (María, Argentina).
¿Ambe uaa sési pʼikuastantani chaari mintsitani?
Tekstu: “Jarhasti amigu ma enga sánderu uékpijka eska ermanu ma” (Proverbios 18:24).
Ambe enga arhikuekajka: Ambakiti amigu o amiga ma, méntkisïksïni jarhuataati. Enga chá exejka eska ima kʼuiripu mintsinharhikueska ka eskajtsï chá sési pʼikuarherantaaka, aiangukuarhi je imani na engajtsï pʼikuarherajka.
“Ma 20 uéxurhini nitamaspti ka ji no nemani aianguspka eskarini nema afuersa jupikaspka. Ji méntkuni no sáni tsípikua jingoni jámasïreenga, no jánhaskasïreenga ambe úni ka kómu pʼikuarherasïreenga. Joperu engani aiangukuarhipka nemani ambe engani nitamakuarhipka, imarini jingontku kurhajchaspti ka ji kánikua sési pʼikuarherantaspka” (Elif, Turquía).
Tekstu: Tata Diosïni “jurajkuku je ambe engaksïni xáni uandanhiatajka, jimboka ima uandanhiasïnga chánksïni jimbo” (1 Pedru 5:7).
Ambe enga arhikuekajka: Enga chá kómarhijka Tata Diosïni, imaksïni méntkisï kurhajchasïndi (Salmo 55:22; 65:2). Tata Diosïksïni kánikua uékasïndi ka jimboksïnisï uékajti jarhuatani para chá exeni eskajtsï kánikua jukaparhakua ambeeska.
“Míteni Tata Diosï Jeobani, kánikuarini jarhuatasti sési pʼikuarherantani. Iásï imani aiangukuarhisïngia iámindu ambe. Tata Diosï ísïisti komueska ima amigu engareni meru sési kurhanguchijka na engani pʼikuarherani jarhajka” (Ana, Belice).
¿Niáraa ima jurhiatikua enga Tata Diosï nóteru jurajkuakia eska kʼuiripuni no sési kauaka nanakeechani?
Tekstu: “Tʼuri uaaka eskaksï sési kánhaaka uerandujupindicha ka imeecha engaksï kánikua no sési pʼikuarherani jaka paraka echerirhu anapu kʼuiripu nóteru chérauakia” (Salmo 10:18).
Ambe enga arhikuekajka: Nóteru ióni jimboia, Tata Diosï uaati eska jauaka justisia paraksï nanakeecha nóteru no sési kánhania ni no sési ambe úminhani.
“Kánikua sési pʼikuarherantaspka míteni eska no ióni jimbo, Tata Diosï Jeoba nóteru jurajkuakia eskaksï nanakeecha ka nanaka sapirhatiicha no sési kánhaaka. Úspti eskani nóteruni uandanhiapiringia” (Roberta, México).
Engajtsï uéjka sánderu ambe míteni ambe enga aiatspejka Biblia, ístu andijtsïsï uaa mintsikani ambe enga aiatspejka ka néna engachi Jeobaeri testiguecha jarhuajpejka Biblia jingoni, kurhajkuarhi je eskaksïni nema pʼorhembiaka.
a Nombriichaksï mójtakurhisti.
b Tata Diosï arhinhasïndi Jeoba (Salmo 83:18). Exe je artikuluni “¿Neeski Jeoba?”.