Jurhiatikua 24 de eneru de 2023, sientifikuechaksï uandasti eska inde ambe enga ísï mítekateeka komueska Reloj del Juicio Final a sánderkusï kueratani jakaia para terujkani chúri niárani, i ambe arhikuekasïndi eska kʼamakurhiakia no ióni jimbo parhakpini.

•   “I martesï, Reloj del Juicio Final, enga arhikuekajka na enga xáni no sési jaka parhakpini, sánderku jimbojkusï jatiia para terujkani chúri niárani indeni jimbo enga guerra úkuarhini jaka Ucrania, enga chénhani jaka eska niáraaka guerra nuclear ma úkuarhini ka jimboka klima xáni mójtakurhixaka” (Servicio internacional de noticias de la agencia AFP).

•   “Sientifikuechaksï uandasti eska i martesï, jimaksï peeraska indeni Reloj del Juicio Finalini para 90 segunduterku kueratani jarhania para terujkani chúri niárani, i ambe xarhatasïndi eska axuterku jarhaskia para kʼamakurhini parhakpini” (ABC News).

•   “Máru sientifikuecha interu parhakpini anapuecha, uandasïndiksï eska i tiempu kánikua no sési jánhaskuarhixaka ka chéxatiksï eskaksï kʼuiripuechani niáraaka kʼamakurhini” (The Guardian).

 ¿Nóteru ióni kuerataxakiia parakaksï kʼuiripuecha kʼamakurhiaka ka ístu Echeri? ¿Jatsiskichi para chéni imani ambe jimbo enga sánderu orhepatini úkuarhiaka? ¿Ambe uandasïni Biblia?

 Biblia uandasïndi “Echeri méntkisï jauati”, ka ístu uandasïndi eskaksï jauaka kʼuiripuecha engaksï jima ‘irekaaka para méntkisï’ (Eclesiastés 1:4; Salmo 37:29). Ísï jimbo, kʼuiripuechaksï no kʼamajkuati Echerini ka nijtuksï uaa úni eska xáni no sési jauaka engaksï jamberi kʼuiripuechani nóteru uaakia ixú irekani.

 Joperu Biblia uandasïndi eska kʼóru kʼamakurhiaka ambe ma. Jimboka uandasïnga “parhakpini kʼamaraati” (1 Juanu 2:17).

•   Engajtsï uéjka míteni ambe arhikuekasïni Biblia enga uandajka eska parhakpini kʼamaraaka, arhinta je artikuluni “¿Se acerca el fin del mundo? ¿Qué es el apocalipsis?”.

•   Parajtsï míteni ambe uandasïni Biblia ima ambeeri enga úkuarhiaka parhakpinirhu, arhinta je artikuluni “¿Káni kʼamakurhia i parhakpini?”.

 Bibliajtsïni jarhuatasïndi parachi tsípikua jingoni irekani nájkiruka iásï xáni no sési jánhaskuarhini jaka parhakpinirhu. ¿Nénajtsïni jarhuatasïni?

•   Bibliajtsïni ambakiti konsejuechani íntskuasïndi (2 Timoteo 3:16, 17). Engajtsï uéjka míteni nénaksïni uaa jarhuatani Biblia parajtsï tsípikua jingoni irekani arhinta je artikuluni “Qué puedo hacer para no preocuparme tanto”.

•   Bibliajtsïni ístu arhisïndi eskachi uaaka mintsikani eska sánderu orhepatini ambakiti ambe úkuarhiaka (Roma 15:4). Sési uandasïndi ambe enga úkuarhiaka iásï ka sánderu orhepatini, ka inde ambejtsïni jarhuatasïndi parachi no chéni ambe enga úkuarhiaka parhakpinirhu.

 Parajtsï sánderu sési míteni ambe uandasïni Biblia, tsípikua jingonksïni pʼímarhixaka parajtsï iásï mismu exeni na engachi jorhendaajka kʼuiripuechani Biblieri ambe.