Consejo de Seguridad de la ONU, 19 de maiuni 2022 jimbo, tánguarhikua ma jatsispti nani engaksï jukari 75 kʼuiripuecha japka engaksï kʼérati ánchikuarhiteechani jatsiaka. Ini tánguarhikua jimbo, uandanhaspti eska “COVID-19 ka enga klima kánikua mójtakurhini jaka úska eska interu parhakpinirhu nóteru xáni japiringia tʼirekua, ka eska iásï ini guerra jimbo enga Ucrania úkuarhini jaka uaaka eska sánderu nóteru jauakia tʼirekua”. Ísï tátsekua, rebista The Economist karaspti eska ini parhakpini jimbo enga xáni no sési jakai, i guerra úxaka eskaksï uánikuecha no jatsiaka ambe tʼireni. Bibliajtsïni aiangusptia eska ini jurhiatikuecha jimbo no japiringa tʼirekua ambe, joperujtsïni ístu íntsaasïndi konsejuechani engajtsïni jarhuatajka parachi orhepani uérani.

•   Jesúsi ini profesiani uandaspti: “Jimbokaksï ma nasioni anapuecha jauaraaka paraksï uarhiperani máteru nasioni anapuechani jingoni, ka ístu ma juramukuarhu anapuecha máteru juramukuarhu anapuechani jingoni, ka jauati [...] kʼarhingua ambe” (Mateu 24:7).

•   Biblieri libru Jaŋaskuecha, uandaasïndi tʼámu kabaiu jatarichani. Ma kabaiu jatari guerrani arhikuekasïndi, máteru enga chúngumani jarhajka, kʼarhinguani. I profesia uandasïndi eska niárapiringa jurhiatikua enga sántku tʼirekua japiringa ka eska kánikua jukaparhapiringa. “Exespkani máteru kabaiu turhipitini, ka enga jima jatarini japka, kámasïreendi ma kʼuetsaperatarakua, ka luejkuni kurhaaspka [...] ma uandakua enga uandeenga: ‘Tsimani libra trigu, pori ma denariu, ka seisi libra sebada, pori ma denariu’” (Jaŋaskuecha 6:5, 6).

 I profesia enga uandajka eska sántku tʼirekua japiringa, kumplirikuarhixati ini jurhiatikuecha jimbo ka Biblia uandasïndi eskaksï jindeeska ‘últimu jurhiatikuecha’ (2 Timoteo 3:1). Engajtsï uéjka sánderu míteni ‘últimu jurhiatikuecheri ambe’ ka na engaksï jámani jaka i kabiu jatariicha, exe je bideuni En 1914 el mundo cambió de rumbo ka arhinta je artikuluni “¿Qué representan los jinetes del Apocalipsis?”.

•   Bibliajtsïni ambakiti konsejuechani íntsaasïndi parachi úni orhepani uérakuani kʼérati uandanhiateechani, komu enga sánderu jukaparhani jaka tʼirekua ka enga sántku jaka. Exea je máru konsejuechani ini artikulu jimbo “Cómo vivir con menos”.

•   Bibliajtsïni ístu sési pʼikuastantasïndi jimboka uandasïnga eska iámindu ambe sési niántaaka. Aiachisïndijtsïni eska niáraaka jurhiatikua enga kánikua tʼirekua jauaka ka eska nóteru nema kueratanchaaka tʼirekua (Salmo 72:16). Parajtsï sánderu míteni i xáni ambakiti ambeeri ka parajtsï exeni andijtsïsï uaa mintsikani ini ambe, arhinta je artikuluni “La esperanza real de un mañana mejor”.