Eneruni 2021 jimbo, Grupu enga Orhejtsïkuajka Iámindu Kúnguarhikuechani, aianhpispti eska japiringia jimbanhi libru ma para Biblieri ambe jorhentpini enga arhinhajka Tsípikua jingoni ireka je. a¿Nájtsï pʼikuarheraspi engajtsï kurhaapka ini ambe? Matthew enga Canadá anapueka, uandantasïndi na enga pʼikuarherapka: “¡No úsïreenga jakajkuni! Ka sánderuni tsípispka engani kurhauapka arhijtsïkperateechani ka exeani bideuechani engaksï uandeenga andisï únha i libru ka eskaksï máru erachiicha tsʼéjkuspkia na enga marhuapiringa para jorhendaani kʼuiripuechani. ¡Meru uékaxapkia exeni ini libruni ka ueenani uarhani!”.

 Ini librurhu jimbanhi ambe jarhasti para Biblieri ambe jorhentpini, joperu no ini ambe jimbojkusï ménderueniiti eskaksï máteru libruecha engachi antesi úrauenga. Ka engajtsï exekia ini librurhu sïranda jimbo, jamberijtsï kuenta íntskukuarhekia eska jarhaska máteru ambe enga jimbo ménderueniika. ¿Uékasïntsï míteski ambeeski? Jindeesti na enga úka jaka i libru Tsípikua jingoni ireka je.

 Na enga xáni taiapika sïranda. Para úni ini libruni Tsípikua jingoni ireka je uétarhisïreendi eska sïranda sánderu taiapepiringa, Jimboka jukari 600 dibujuechani jukaaska, sáni 10 uelta sánderu eska libru ¿Ambejtsïni jorhendasïni Biblia? Ístu, sánderuksï espasiucha jarhasti, no xáni letra jukasti ni dibujuecha. Ini ambe jingoni, no úpirindi sési pakarani enga sïranda tsʼirimbipiringa, jimbokaksï dibujuecha sánisï xarharapinga tátsepani. Paraka no ísï úkuarhipiringa, erachiicha engaksï Grupurhu jaka enga exejka na enga Imprimiriinhajka Iámu Parhakpinirhu enga Wallkill (New York) jaka, tsʼéjkusptiksï tʼámu sïrandeecha jingoni engachi úraajkia imprenteecharhu. Ka Grupu enga Publikasionichani Karaajka exespti na engaksï uérapka ka imani erakuspti engaksï letreecha ka dibujuecha no xáni xarhareenga tátsepani. I jásï sïranda 16 % sánderu jukaparhasti eska ima engachi sáno méntkisï úrajka. Ísï jimbo, jorhenguarhiriicha engaksï úrajka ini libru Tsípikua jingoni ireka je, úsïndiksï sési úrani jimboka no xarharasïnga ambe enga jaka tátsepani.

 Na enga jásï plástiku taparhaka. Taparhakua i librueri Tsípikua jingoni ireka je ménderueni pʼikuarkukuarhisïndi eska máteru libruecheeri, jimboka no na uéjki jásï plástiku máeska. Máteru libruecheeri plástiku mereasïndi, peru i librueri nómbe ka ísïksï dibujuecha sánderu sési xarharasïndi. Ístu, i jásï plástiku jingoni, libru no sántku no no sési jáxesïndi nájkiruka ma kánikua úrajka. I jásï plástiku enga no mereajka, niárasïndi 5 uelta sánderu jukaparhani eska plástiku enga mereajka. Ísï jimbo, uánikua Beteliichaksï májku k’éri piásïndi ini jásï plástikuni paraka no xáni jukaparhakua uéraaka.

 Jiájkani, enga sánderu jukaparhaka, ¿andiksïsï i jásï plástiku úrajki? Erachi ma enga Grupurhu jaka enga exejka na enga Imprimiriinhajka Iámu Parhakpinirhu, uandasïndi: “Jimboka i libru kánikua úrakuarheaka, nóchi uékasïnga eska sóntku no sési jáxeaka”. Eduardu enga Ofisina de Imprentarhu ánchikuarhijka Brasil anapu Betelirhu, uandasïndi: “Kánikuachi sési pʼikuarherasïnga enga organisasioni xáni ambakiti materiali úrani jaka parakachi tsitiaka úrani ini xáni sési jásï libruni ka enga ióni marhuauaka, ka ístuchi seguiriini jarhani sési úraani donasioniichani”.

 Marsuni 2021 jimbo, ueenaspkachi imprimiriini ini libruni Tsípikua jingoni ireka je enga pandemia japka COVID-19, ísï jimbo, uánikua ambe jimbo úkua jukaspti. Jimbokaksï Beteliicha míkuarhetixapka, boluntariuechaksï nóteru úsïreendia nirani jarhuajpeni imprentarhu, niksï ueeni pʼímarhiani sánderu erachiichani paraksï Beteli marhuani. Jimboksïsï uánikua erachiicha kueratani japti ka máteru Beteliicharhuksï jatsispti para míkani imprentani jimboka jima anapu Gobiernu ísï uandaspka.

 ¿Nénaksï úspi orhepani uérani? Engaksï ménderu úpiringia imprimiriini, pʼímarhiasptiksï erachiichani engaksï máteru departamentuecharhu japka parakaksï ma tiempu imprentarhu ánchikuarhipiringa. Joel, enga Grupurhu jaka enga exejka na enga Imprimiriinhajka Iámu Parhakpinirhu, uandasïndi: “Úspkachi úni ini ánchikuarhitani, jimbokaksï i erachiicha xarhataspka eskaksï tsitisïnga jorhenguarhini jimbanhi ambe ka ístuksï tsitisïndi jarhuajpeni”.

 Nájkiruka xáni úkua jukapka, uáni joperu uáni libruechanchi imprimiriuaskia, Tsípikua jingoni ireka je, ka uánikua ambe úrakuarhesti, komu plancha para imprimiriini, plástiku, sïranda, tinta ka matakutarakua ambe. Imani 5 mesi jimbo enga ueenapka imprimiriinhani, ma 2,3 miioni dolarisï úrakuarhesptia solu ini ambe jingoni. Parachi no xáni sentabu úrani, xáni libruechantkusï imprimiriuaxaka na engaksï xáni meru uétarhini jaka kúnguarhikuecharhu.

 ¿Náksï pʼikuarherasïni ini libruni úrani imeecha engaksï jorhentpijka Biblieri ambe ka imeecha engaksï jorhenguarhini jaka? Australia anapu erachi ma enga arhinhajka Paul, uandasïndi: “Xáni tsitisïnga úrani ini libruni engani tsitijka Biblieri ambe jorhentpini. Sési jáxesti ka úsïndi eskari uandontskuarheaka kʼuiripu jingoni, sési úkata jarhasti, sési kurhangukuarhisïndi, kurhamarhikuechaksï sési eratsekata jarhasti, bideuecha, dibujuecha, tableecha ka ístu meteecha para imeecha enga jorhenguarhini jaka. Meru sési úkata jarhasti, uékasïnga ini libru jingoni sánderu sési jorhentpini”.

 Estados Unidos anapu kʼuiripu ma enga Biblieri ambe jorhenguarhini jaka, uandasïndi: “Kánikua tsitisïnga ini jimbanhi libruni. Dibujuechajtsïni jarhuatasïndi parani úni sánderu sési kurhanguni ka bideuechajtsïni mintsitarhu niárachesïndi ka úsïndiksï eskani uékaaka ísï úni eskani na jorhenguarhini jaka”. I kʼuiripu enga jorhenguarhini jaka Biblieri ambe niraxati iámindu tánguarhikuecharhu ka tsimani xanhari jorhenguarhisïndi mándani semana.

 Útasïchi jatsiska para uáni joperu uáni libruechani imprimiriuani uánikua idiomeecha jimbo. Grupu enga Orhejtsïkuajka Iámindu Kúnguarhikuechani, uandastia eska i libru 710 idiomeecha jimbo jauaka, 340 sánderu eska libru ¿Ambejtsïni jorhendasïni Biblia?

 ¿Nani uérasïni sentabu para iámu i ambe? Engaksï kʼuiripuecha íntspijka para ánchikuarhita enga interu parhakpinirhu úkuarhijka. Úsïndi íntspinhani donasioni ixú donate.pr418.com. Kánikuachi jukaparharasïnga engajtsï xáni intsïmpitiika. Ini ambe jimbo, úsïngachi ini járhati libruechani uaani para Biblieri ambe jorhentpini, para ima kʼuiripuecha engaksï uéjka jorhenguarhini Tata Diosï Jeobaeri ambe ka jatsini tsípikua para méntkisï (Salmo 22:26).