“Nóchi eranhaskasïrenga eskachi úpiringa exeani iámindu publikasionichani, tableta o selulari jimbo”. ¿Májkuentsï eratsesïni? I uandakuechani uandaaspti erachi Geoffrey Jackson Aianhperakua 6, Grupueri enga Orhejtsïkuajka iámindu kúnguarhikuechani uéxurhiniri 2020. Ka ístu uandaspti: “Joperuchi kurhamarhikuarhisïnga, ¿nénachi jámapirini engachi no jatsipiringa JW Library iásï enga i pʼamenchakua jaka? Jeobajtsïni desde iónisï jorhendastia para ini jásï ambe jingoni”.

 ¿Nénajtsïni jarhuataxaki Tata Diosï Jeoba? ¿Ambe uétarhispi para úni únhani aplikasioni JW Library? ¿Ka ambe uétarhisïni úni para sánderu jimbanhi ambe jatsiranhani ka para sánderu ambe jimbo marhuani?

 Maiu de 2013 jimbo, Grupu enga Orhejtsïkuajka iámindu kúnguarhikuechani arhispti ima Grupuni enga MEPS Programarhijka ka enga Beteli de Estados Unidos jimbo jaka, eska úpiringa aplikasioni ma enga jatapiringa Traducción del Nuevo Mundo. Paul Willies, enga ini Grupu jingoni ánchikuarhijka, uandaspti: “Nóchi méni péraxapka aplikasioni ma aplikasionicheri tiendecharhu. Parachi úni ini aplikasionini jatsispkachi para anhaxustani máru ánchikuarhitechani, ekipu ma úni ka ánchikuarhini máteru grupuecha jingoni engaksï Beteli jaka. Kánikuachi kómarhispka ka exespkachi na engajtsïni Jeoba jarhuatapka: sinku mesichani tátsekua, tánguarhikuarhu enga mándani uéxurhini úkuarhijka uandanhaspti eska i aplikasioni jarhaspkia”.

 Ístuchi jatsispka para máteru ambe úni, úni eska JW Library biblioteka máepiringa, uánikua publikasionichani jataapiringa ka uánikua idiomecha jimbo. Eneru de 2015 jimbo, aplikasioni sáno iámindu publikasionichani jataspti inglesi jimbo ka seisi mesesi tátsekua, lista jarhasptia paraksï úni késkunhani publikasionicha uánikua idiomecha jimbo.

 Erachichaksï seguirixati jánguarhintani paraka aplikasioni sánderu ambe jimbo marhuauaka. Pori ejemplu, jatsirastiksïa bideuechani ka parti ma enga jukaka iámindu ambe enga marhuauaka para ma prepararikuarhini para tánguarhikuecha. Ístu úsïngachia exeani referensiechani Guía de estudio Bibliaeri uératini.

 JW Library 8 miioni mítanhasïndi mándani pauani tabletecharhu, selularicherhu ka komputadorecharhu, ka jukari 15 miioni mítanhasïndi mándani mesi. ¿Ambe uétarhisïni paraka aplikasioni sési ánchikuarhiaka tabletecharhu, selularicharhu ka komputadorecharhu? Paul Willies uandantasïndi: “Ánchikuarhita máesti engachi no méni kʼamaraaka. Méntkisïchi jimbanhi ambe jatsikusïnga ka jánguarhintasïngachi eska aplikasioni sánderu fásiliuaka para úrani. Jimboka sistema operatibu selularicheri, tabletecheri ka komputadorecheri méntku mójtakurhini jarhasïnga, jatsiskachi para seguirini ánchikuarhini paraka aplikasioni sánderu sési terukuntaaka sistema operatibuecha jingoni. Ka jimboka sánderu grabasionicha ka publikasionichaksï jarhaska JW Libraryrhu, jatsiskachi para aktualisarini jarhani software enga jukaka ka méntkisï exeni jarhani eska sési ánchikuarhiaka”. Iásï jamberi, JW Libraryrhu jarhastiksï 200,000 publikasionicha ka jukari 600,000 grabasionicha audiueri ka bideueri mámaru idiomecha jimbo.

 Para úni eska i aplikasioni sési ánchikuarhiaka, ístuchi uétarhinchasïnga máteru ambe. Jatsiskachi para piáni uánikua lisensiechani engaksï programecha jatsika. Ka solu ma lisensia niárasïndi jukaparhani 1,500 dólarisï ma uéxurhini jimbo. Ístu Grupu enga MEPS Programarijka úrasïndi 10,000 dólarisï ma uéxurhini jimbo para piáni selularichani, tabletechani ka komputadorechani mámaru markecha jimbo engaksï sánderu jimbanhika para exeni sini aplikasioni sési ánchikuarhixaki ini aparatuecha jimbo.

 JW Libraryni jimbo nóteruchi xáni úrasïngia sentabu para imprimiriani, enkuadernariani ka axauani publikasionichani. Pori ejemplu, ju je exeni ambe enga úkuarhipka foietu Karakata ma para mándani jurhiatikua jingoni. Ima enga 2013 jimbo uérapka soluchi imprimirispka 12 miioni, joperu imani jingoni enga 2020 jimbo uérapka, soluchi imprimiriaspka sinku miioni, nájkirukaksï 700,000 aianhpiricha sánderu japka. ¿Ambe úkuarhispi? Eska iásï juchaari erachichaksï arhintasïnga Karakata ma para mándani jurhiatikua JW Libraryrhu. a

 JW Library uaatijtsïni jarhuatani mámaru ambe jimbo. Pori ejemplu, Geneviève enga Canadá irekaka, exesïndi eska i aplikasioni jarhuataska para sánderu sési jorhenguarhini Biblieri ambe. Ima uandasïndi: “Engani jatsipiringa para uánikua libruechani úrani parani jorhenguarhini Biblieri ambe, no úpiringa i ambe úni mándani xarheni, joperu ini aplikasioni jimbo, ambe engani jatsika para úni jindeesti étskuntani juchiiti tableti ka jimini jatsisïngia iámindu ambe engani uétarhinchajka. Someni jorhenguarhini Biblieri ambe jarhuatastirini para juchiiti mintsikakua sánderu uinhapiti jarhani ka para ísï pʼikuarherani eskani sánderu andarhierasïnga Jeobani”.

 I aplikasioni kánikua marhuaxati ini pandemia COVID-19 jimbo. Pori ejemplu, Charlyn enga Estados Unidos anapueka, uandasïndi: “Jimboka COVID-19 iámu parhakpinirhu jarhaska, jukari ma uéxurhini páxakaia engani no ma exejka publikasioni sïranda jimbo. Joperu JW Libraryrhu jatsiskachi iámindu ambe engachi uétarhinchajka paraka juchaari mintsikakua Tata Diosï Jeoba jimbo sánderu uinhapiti jauaka. Diosmaiamukua arhisïnga Tata Diosï Jeobani ini intsïmperata jimbo”.

 Uánikuechaksï májkueni eratsesïndi eska Faye enga Filipinas irekaka, ima uandasïndi: “I aplikasioni kánikua marhuasïndi, iámindu ambe jatsisti engani uétarhinchajka para sánderu andarhierani Tata Diosï Jeobani. Tsípechani úrasïnga para arhintani, para kurhaani ambe ma engareni uinhaperantaka, engani úni jarhajka ambe ma k’umanchikuarhu, para prepararikuarhini tánguarhikuechani jingoni ka para Bibliani arhintani. Jiáni engani ísku jarhajka úrasïnga para bideuechani exeani ka engani erokuarhini jarhajka ambe ma filarhu. Úrasïnga para Bibliani arhintani ka juchaari publikasionichani. ¡I aplikasioni kánikua ambakiti ambeesti!”.

 Ístu, para aianhpini, i aplikasioni kánikua marhuasïndi. Pori ejemplu, pirenchi ma enga Camerún anapueka kánikua tsitispti karakata ma enga úrapka imeeri pámpiri aianhpikuarhu, máru semanechani tátsekua uékaspti úrani ini tekstuni, joperu no miásïrendi nákispi, ima uandantasïndi: “Miáxapka máru ambe enga arhienga i tekstu, ísï jimbo niraspka aplikasionirhu, mítaspka aplikasionini, inchaspka aplikasionirhu ka jirinhantaspka i karakatani jini enga lupa jaka. Ini aplikasioni jimbo, iásï exeantasïngia tekstuechani engani mirikuarhiaka”.

 Chaari donasionicha jimbo engajtsï íntspijka úraparini mámaru ambe jimbo enga jaka donate.pr418.com, úsïngachi úni aplikasionini JW Library, jimbanhi publikasionichani jatsirani ka úni eska sánderu sési ánchikuarhiaka. Ísï, erachicha engaksï iámu parhakpinirhu anapueka úsïndiksï marhuatani. Diosmaiamu chaari donasionicha jimbo engajtsï tsípikua jingoni íntspijka.

1. Oktubri de 2013: Uérasti i aplikasioni jimbanhi Biblia jingoni Traducción del Nuevo Mundo inglesi jimbo.

2. Eneru de 2015: Aplikasionirhu jatsiranhasti sánderu publikasionicha inglesi jimbo ka tátsekua máteru idiomecha.

3. Nobiembri de 2015: Jatsiranhasti erramienta ma enga marhuajka para kuirunharhikuni tekstuni.

4. Maiu de 2016: Jatsiranhasti jarhuajperata ma para “Reuniones”.

5. Maiu de 2017: Jatsiranhasti erramienta ma para notechani uáni.

6. Desiembri de 2017: Jatsirastiksï Biblia de estudiu inglesi jimbo.

7. Marsu de 2019: Jjatsirastiksï jimbanhi erramienta para úni késkuani audiuechani ka exeani bideuechani línea jimbo, ka para úni inchani ima referensia jimbo enga jaka Jarhuajperata paraksï Jeobaeri testiguecha estudiarini.

8. Eneru de 2021: Jatsirastiksï jimbanhi erramienta para uénani Biblieri ambe jorhenguarhini publikasionirhu ¡Méntkisï tsípikua jingoni ireka je!