Jeobaeri testiguechaksï ambakiti ambe úsïndi para jarhuataani máteruechani jukari 200 paisicha jimbo. Peru solu 35 ima paisicheri úsïndiksï maiampikuarhini ambe enga xáni uétarhijka imeecheri territoriurhu, imani sentabu jingoni engaksï jima mismu anapu erachicha íntspijka. ¿Jimajkani ambe úkuarhisïni ima lugaricha jimbo enga no kánikua sentabu jarhajka?

 Grupu enga Orhejtsïkuajka iámindu kúnguarhikuechani exesïndi ambe engaksï uétarhinchajka Jeobaeri testiguecha interu parhakpinirhu paraksï úni kómarhini Tata Diosï Jeobani ka aianhpini ambakiti aianhperakuani. Ka sésiksï úrasïndi sentabuni enga íntspinhajka. Enga Beteli ma intsïnhajka sentabu jukari sáni na enga xáni uétarhinchajka, axasïndi máteru Betelicharhu engaksï uétarhinchani jauaka ima sentabuni. Iásïjtu ísï úkuarhisïndi eskaksï na ueenga primeru siglurhu anapu kristianuecha, imaksï úraspti ambe engaksï pakaranchapka para jarhuataani máteru kristianuechani engaksï no kánikua jatsikuarhepka ka “ísïksï májku jásï jarhuajperani jarhani” (2 Korintu 8:14).

 ¿Nénaksï pʼikuarherasïni ima erachicha engaksï intsïnhaka ima sentabu engaksï máteru Betelicha jimbo pakarajka? Pori ejemplu jini Tanzania, nani engaksï sáno iámindu kʼuiripuecha 40 pesu jingontku irekajka ma jurhiatikua, úrastiksï ima sentabu engaksï intsïnhapka para sési jájkuntani Kʼumanchikua Reinuerini kúnguarhikua Mafingani. I kúnguarhikuarhu anapu erachichaksï uandaspti: “Jiáni uératini engaksï sési jájkuntapka Kʼumanchikua Reinuerini, sánderu uánikua tánguarhinhasïndia. Kánikuachi diosmaiamukua arhisïnga Jeobaeri kúnguarhikuani ka ístu erachichani engaksï interu parhakpini jimbo jaka, jimbokaksï xáni intsïmpitiska. Iásïchi jatsiskia sési jásï lugari ma parachi k’éri ambe arhini Tata Diosï Jeobani”.

 Pandemia COVID-19 jimbo, máru erachichaksï Sri Lanka anapuecha nóksï kánikua jatsikuarhexapti paraksï tʼireni. Ma jindeesti pirenchi Imara Fernando ka imeeri sapi Enosh. Peru ima sentabu jingoni engaksï máteru paisicha íntspipka, úsptiksï intsïnhani jarhuajperata engaksï uétarhinchani japka. Tátsekua Imara ka imeeri sapi úsptiksï tarjeta ma ka karasptiksï: “Kánikuachi diosmaiamukua arhiasïnga erachichani engajtsïni xáni uékperakua xarhatachepka ini tiempu jimbo enga xáni úkua jukapka. Kánikuachi tsípixaka kuenta úkuarhini ini familiani jingoni ka seguirixakachi kómarhini Jeobani eska seguiriuaka jarhuataani erachichani ini últimu jurhiatikuechani jimbo”.

 No arhiparini nani engaksï irekaka juchaari erachicha, iáminduechaksï tsitisïndi íntspini ambe engaksï jatsikuarheka. Pori ejemplu Enosh úspti kaja sapichu ma para jatsirani sentabu para íntsaani ka jarhuataani familiechani engaksï sánderu uétarhinchajka. Pirenchi Guadalupe Álvarez ístu kánikua intsïmpitisti, ima irekasti ireta ma jimbo jini México nani engaksï sáno iámindu kʼuiripuecha no méntkisï jatsijka ánchikuarhita ma ka máruksï sántku andasïndi mándani jurhiatikua. Peru ima jánguarhintasïndi na enga xáni uaaka para jarhuajpeni. Pirenchi Guadalupe uandasïndi: “Kánikua diosmaiamukua arhisïnga Tata Diosï Jeobani imeeri xénchperakua ka pʼamojperakua jimbo. Míteska eska ima sentabu engani íntspijka máteru erachicha jingoni kánikua marhuauaka para jarhuataani erachichani engaksï no sési nitamakuarhini jarhajka”.

 Kánikuaksï tsípisïndi ima Betelicha engaksï axajka sentabu paraksï jarhuajpeni. Anthony Carvalho enga marhuajka Grupurhu enga Brasili anapu Betelini orhejtsïkujka, uandasïndi: “Uánikua uéxurhinicha jimbo, máteru Betelichajtsïni jarhuatasti sentabu jingoni, ini jarhuajperata jimbo úspkachi exeni na enga aianhperakua sánderu etsakuarhini japka. Ka iásï engachi sánderu sáni jatsikia sentabu, jatsiskachi inde kóntperata para jarhuataani máteruechani. Erachichaksï ísï exesïndi aianhperakuani komu ánchikuarhita ma enga interu parhakpini úkuarhini jaka ka kuentaksï íntskukuarhesïndi eskaksï uaaka jarhuajpeni, komu ambakiti Kristueri chúxapaticha”.

 ¿Nénaksï uaa Jeobaeri testiguecha jarhuataani imeecheri erachichani engaksï uétarhinchakua jatsijka? Sánderu sési jauati eskaksï íntspiaka sentabu para ima ánchikuarhita enga interu parhakpinirhu úkuarhijka ka eskaksï no axaaka sentabu máteru paisirhu anapu Betelicharhu, uaatiksï jatsirani kúnguarhikuarhu anapu kajarhu enga arhijka para ima ánchikuarhita enga interu parhakpinirhu úkuarhijka o uaatiksï axani sentabu donate.pr418.com jimbo. Iámindu sentabu engaksï íntspijka kánikua jukaparhakuesti.