Uéxurhini 2020 jimbo uánikua ambe no sési ambe úkuarhispti uápurisï a. Máru lugaricha jimbo k’éri janispti ka tarhiani, África iorhentperanhaspti janikua jimbo, Venezuela no sési nitamakuarhinhaxapti jimboka no jarhaska t’irekua ka jini Simbabue jimboka nóteru janispkia ka ístu COVID-19 interu parhakpinirhu niáraspti. ¿Ambeksï xáni úskia Jeobaeri testiguecha paraksï jarhuatani imeechani engaksï no sési ambe úkuarhinchaka?

 Jarhastiksï máru erachicha engaksï ánchikuarhijka ima Grupu jingoni enga Orhejtsïkuajka iámindu kúnguarhikuechani ka májku k’ériksï exesïndi nani no sési jánhaskuarhexaki ka na engaksï jarhuajpeaka. Septiembri 2019 uératini asta agostu 2020 jamberi ima erachichaksï íntspisti 28 miioni de dólari para jarhuajpeni jimeesïsï enga no sési ambe úkuarhijka. Imani sentabu jingonksï úspti piáni t’irekua ambe, itsï, nani engaksï pakarapiringa, xapu ambe ka máteru ambe engaksï uétarhinchapiringa imeecha engaksï no sési nitamakuarhipka ka ístu doktori ma enga exeapiringa ka paraksï sési peentani ka sési jájkuantani kʼumanchikuechani. Exeakachi na engaksï jarhuajpikia jimeesïsï enga no sési ambe úkuarhipka.

 COVID-19. Interu parhakpinirhu pandemia úspti eskaksï juchaari erachicha no sési úkuarhinchapiringa ka eskaksï no sési pʼikuarherapiringa ka no xáni sentabu jatsini. Únhasti jukari 800 grupu para jarhuajpeni, i grupuechaksï exesïndi ambe engaksï uétarhiaka erachicha ka aianguntasïndiksï Grupuni enga Jarhuajperata Íntspijka paraka ícha axaaka ambe enga uétarhiaka.

 Jiniani uéxurhini, Grupu para Jarhuajpeni jarhuatasti uánikuechani parakaksï jatsipiringa tʼirekua, itsï, xapu ambe ka ambe engaksï uétarhinchapiringa ka medisina ambe, ka máru lugaricha jimbo márkuksï ánchikuarhisti jima anapu orhejtsïkuticha jingoni paraksï erachicha úpiringa intsïnhani gobiernueri jarhuajperata.

 Imeecha engaksï no Jeobaeri testigueka exesptiksï ambe engachi úpka para jarhuajpeni, pori ejemplu, Field Simwinga enga jindeeka jefi polisiecheri jini Nakonde (Zambia), arhiaspti erachichani: “Nóchi míteska nénaksïni maiamunta imani ambe jimbo engajtsï úka para jarhuatani imani ambe jingoni engaksï uétarhinchani japka ima familiechani engaksï no sési nitamanchapka”.

 Nóteru xáni tʼirekua jarhaspti jini Angola. Pandemia COVID-19 jimbo, nóteru kánikua tʼirekua jarhasti jini Angola, ka inde ambe ústi eska iámindu ambe kánikua jukaparhapiringa. Ísï jimbo, para juchaari erachicha kánikua úkua jukaspti piáni tʼirekua ambe.

 Ísï jimboksïsï kurhakupti Brasil anapu Betelini, eskaksï jarhuatapiringa Angola anapu erachichani axakuaparini tʼirekua ambe paketi jimbo. Paraksï sési úrani sentabu enga íntspinhapka, erachichaksï exespti néna sési japirini para piáni ka axaani tʼirekua ambe ka erakusptiksï piáni tʼirekua ambe maioreu jimbo. Mándani paketi jimbo úrakuarhesti 22 dólari para axani ka piáni, enga jatapka tʼatsïni, arrosi ka aseiti ambe, májku kʼéri jimbo sáno 20 kilu kʼuetsapespti (44 libras). Iásï jamberi axanhasptia 33,544 paketicha, májku kʼéri jimbo 654 toneladecha (721 tonelada amerikanuecha). Iámindu i ambe ka ístu ima ambe engaksï Beteli Angola anapuecha íntspipka, marhuaspti para tʼirerani jukari 50,000 kʼuiripuechani.

 ¿Nénaksï pʼikuarherasïni ini ambe jimbo juchaari erachicha? Alexandre enga iauani ireka Angola uératini, uandasïndi: “Exesïnga eskarini Jeoba xénchasïnga, eskani no jandiajku jarhaska, eskarini Jeobaeri kúnguarhikua kánikua jukaparharasïnga”. Mariza, uarhiiti ma enga jandiajku tʼarhexerani jaka imeeri sapiichani, uandantasïndi: “Jeoba kurhasti juchiiti kómarhikuani. Kánikua diosmaiamukua arhisïnga imani ka imeeri kúnguarhikuani”.

 Kʼarhingua jini Zimbabue. Uéxurhini serbisiueri 2020, kʼéri kʼarhingua ma jarhaspti Zimbabue enga úpka eska uánikua kʼuiripuechaksï sáno uarhipiringa kʼarhingua ma jimbo. Ini ambe jimbo uánikua erachichaksï úkua jukanchasïrendi piáni tʼirekua ambe.

 Únhasptiksï 5 grupuecha para jarhuajpeni paraksï nirani pákuani erachichani tʼirekua. Uánikua aianhpiricha jarhuajpestiksï paraksï tʼirekuani empaketarini ka trokechani jatsiranksï ka máteruecha kuánetastiksï imeecheri trokechani paraksï tʼirekuani parakuani. b Uéxurhini serbisiueri 2020 jimbo, úrakuarhesti 691,561 dólarichani para íntsaani tʼirekua jukari 22,700 kʼuiripuechani.

 Jiáni engaksï erachicha páminhapka tʼirekua, máruksï nóteru jatsisptia tʼirekua. Erachichaksï diosmaiamukua íntskuntaspti Jeobani ka máruksï uénaspti pirekuni.

 Ma lugari jimbo, tsimani pirenchicha engaksï tsïndipka nirasptiksï tánguarhikua ma jimbo imeecheri iretarhu, enga uandanhapka eska grupu ma enga no gobiernueripka jarhuatapiringa. Joperu engaksï tánguarhikuarhu japkia úndaspti politikaeri ambe uandanhani ka pirenchichaksï no uékaspti úni ambe enga kurhajkuarhini japka paraksï úni jarhuatanhani. Engaksï níntani japkia iáminduechaksï teresmarhuasti ka arhiasptiksï: “Asïjtsïni jáma je tátsekua tʼirekua kurhacheni”. Joperu tsimani semana tátsekua, erachichaksï pákuasti tʼirekua pirenchichani, sánderu sóntku pákuasti eska ima grupu enga jarhuajperata aiakuani japka.

 Ánchikuarhita enga úkuarhipka para jarhuatani Zimbabue anapu erachichani, ístu ústi eska Jeoba kʼéri ambe arhinhapiringa. Ju je exeni ambe enga nitamakuarhipka Prisca, enga ireta sapichu ma jimbo irekaka. Nájkiruka ima no sési nitamakuarhini japka kʼarhingua jimbo, Prisca mándani mierkulisï ka biernesï uérasïreendi aianhpini, asta imani tiempu jimbo enga tarhenhantaenga. Imeeri iretarhu anapuechaksï teresmarhusïreendi ka arhisïreendiksï: “Chiiti familia uarhiati xáni kʼarhimani nomasi jimbokari uékasïnga aianhpini jámani”. Peru Prisca arhiasïreendi: “Jeoba no méni jurajkuaxati imeeri marhuarichani”. Sánisï tátsekua, juchaari kúnguarhikua pákuspti tʼirekua. Máru imeeri besinuecha ískuksï pakarasti ka arhistiksï: “Tata Diosï nókini méni jurajkuxati, uékasïngachi míteni sánderu imeeri ambe”. Iásï siete imeeri besinuecha kurhaasïndiksïa radiu jimbo kúnguarhikueri anapu tánguarhikuechani.

 Enga kʼamandintskua sánderu janoni jauakia, sánderuchi uánikua uandanhiatechani jatsiauaka (Mateu 24:3, 7). Kánikua diosmaiamu arhisïngaksïni engajtsï intsïmpitiika ka engajtsï íntspijka sentabu mámaru ambe úraparini enga donate.pr418.com jimbo jaka. Kánikua marhuauati para jarhuatani imani erachichani engaksï no sési nitamakuarhini jaka.