Tata Diosï Jeoba uékasïndi eskaksï iámindu kʼuiripuecha jorhenguarhiaka imeeri ambe ka imeeri Reinueri ambe (1 Timoteu 2:3, 4). Ísï jimbo, Jeobaeri testiguechachi uaasïnga Bibliechani ka máteru publikasioniichani para iámindu kʼuiripuecha, asta para imeecha engaksï no újka kurhaani. Jo, juchaari organisasioni uánikua publikasioniichani petaastia bideu jimbo, jukari 100 idioma seniasi jimbo. a Peru ¿nénaksï únhasïni ka etsakunhani i publikasioniicha? ¿Néna sánderu sési únhaxaki i ánchikuarhita ini jurhiatikuechani jimbo?

 Iámu parhakpinirhu, uánikua ekipuechaksï jarhasti engaksï tradusirijka idioma seniasi jimbo. Mándani ekipu, sési exesïndi ka arhintani imani publikasionini engaksï jatsika para tradusirini. Tátsekuaksï exesïndi nénaksï sánderu sési péntaa indeni publikasioni seniasi jimbo. Ka últimu, bideuksï ma grabarisïndi. Iásï jamberi, jarhastiksï 60 ekipuecha engaksï someni tradusirini jarhajka publikasioniichani engaksï marhuajka para Biblieri ambe jorhenguarhini. Ka máteru 40 ekipuechaksï ménichantkuksïsï tradisirijti.

 Ióntki, kánikua sentabu uétarhisïreendi para bideuechani uaani seniasi jimbo, jimbokaksï sánderu jukaparhaspka kámareecha ka aparatuecha engaksï úrakuarhienga. Ístu uétarhisïreendi kuartu ma jatsini enga solu úrakuarhipiringa para grabarini. Ménichanchi jatsisïreenga para jucha edifisiu úni o ístu ménisï solu uétarhisïreendi sési jántskantani parachi jima grabarini. Jiájkani, paraka ekipu ma jatsipiringa iámu ambe para ueenani tradusirini, jukari 30 mili dolari b uétarhisïreendi.

 Para sési úraani donasioniichani, juchaari organisasioni kánikua jánguarhintasïndi para jirinhakuntani néna sánderu sési tradusirini joperu no uánikua ambe úraparini. Ka para ísï úni, úraaxakachi sánderu jimbanhi aparatuechani, engaksï no xáni jukaparhaka ka engaksï sánderu sési marhuajka. Pori ejemplu, nóteru uétarhisïndia eskaksï jauaka kuartuecha engaksï solu jindeuaka para grabarini. Iásï mándani ekipu úsïndi grabarini imeeri ofisinarhu. Solu uétarhisïndi eskaksï peeraaka ambe ma enga xunhapiuaka (o croma). Ka engaksï uánikua erachiicha xarharaaka bideurhu, mándani arhini úsïndi imeeri ofisinarhu grabarini o imeeri kʼumanchikuarhu.

 Ístu, uaaskachi máru programeecha para komputadoreecha para sánderu jarhuataani ekipuechani engaksï tradusirijka. Ísï jimbo, nóteru xáni tiempu uétarhisïndia para publikasioni ma petani seniasi jimbo ka erachiichaksï kánikua jukaparharasïndi i ambakiti ambe. Erachi ma enga Alexander arhinhajka, uandasïndi: “Kánikuani sési pʼikuarherasïnga jimboka iásï sánderu uánikua bideuechaksï uérasïngia seniasi jimbo. Iásï úsïngia pauani pauani exeni bideu ma”.

 Iásï, paraka ekipu ma jatsiaka iámu ambe para ueenani tradusirini, sáno 5 mili dolarijku uétarhisïndi. Ísï jimbo, iásïchi úsïnga bideuechani uaani seniasi jimbo engaksï mámaru paisirhu anapueka.

 Enga na kʼamaranhajkia grabarini publikasioni ma, iásï jatsisti para imeecha intsïnhani engaksï uétarhinchani jaka. Ióntki, axakuasïreendiksï inde grabasioniichani máru empreseechani paraksï imeecha kopiariuani bideosinta jimbo ka DVD ambe jimbo, ka tátsekua kúnguarhikuechanksï axakuasïreendiksï. Joperu para iámindu ini ambe úni, uétarhisïreendi kánikua ánchikuarhini, kánikua tiempu ka kánikua sentabu. Uéxurhini 2013 jimbo, jukari 2 miioni dolariicha úrakuarhespti para DVD ambe petani seniasi jimbo.

 Imeecha engaksï no újka kurhaani, kánikuaksï sési pʼikuarherasïreendi jimbokaksï jatsiaspka ini bideuechani. Joperu ménichani kánikua úkua jukasïreendi úraani ka sánderia jimbokaksï sánhani arhixapka sánderu uánikua bideuecha uérani. Ménichani, uánikua diskuecha DVD uétarhisïreendiksï para ma librujku Biblieri. Brasil anapu erachi ma enga Gilnei arhinhajka, i ambe uandasïndi: “Engachi uékeenga tekstuni ma exeni, orhetachi jatsisïreenga para jirinhantani aberi náki bideosinta jimbo jarhaspi ka tátsekua jirinhantania bersikuluni. Kánikua úkua jukasïreendi”. Pirenchi ma enga Rafayane arhinhajka ka enga úreenga diskuecha DVD seniasi jimbo, uandasïndi: “Kánikuani kuatarasïreenga para Bibliani jorhenguarhini. Kánikua tiempu úrasïreenga para exeantani tekstuechani ka máteru publikasionichani”. Paraksï aianhpini, erachiichaksï jatsisïreendi paraksï iámindu bideosinteechani ka diskuecha DVD paani, ka enga kʼuiripu ma uékapiringa míteni Biblieri ambe, imeeri telebisionirhuksï jatsikusïreendi para exeni. Asta máru erachiichaksï pákuarhisïreendi aparatu ma para úni kʼuiripuecheeri telebisioniicharu jatsikuantani diskuechani. Joperu tátsekua, uérasptksï máru pantaia sapirhatiicha para DVD ambe exeni ka uánikua erachiichaksï ueenaspti indeechani úraani. Bobby enga Estados Unidos irekajka, uandasïndi: “Engari na exerpiengia textu ma ka uékani máteru exerpini, jatsisïreengari para diskuni mójtakuni. Ka jimboka kánikua tiempu uétarhisïreenga para ísï úni, úkua jukasïreendi Bibliani úrani para aianhpini”.

 Uéxurhini 2013, Tata Diosï Jeobaeri organisasioni petaspti aplikasioni JW Library Sign Language, ka ini jingoni, erachiichaksï úsïndia késkuani ka exeani bideuechani imeecheeri selularirhu o tabletarhu. Jiánisï, i aplikasioni solu Estados Unidos anapu senias jimbo jarhaspti, joperu 2017 jimbo, mójtakusptiksï parakaksï erachiicha engaksï seniasi úreenga máteru paisiicharhu ístuksï úpiringa úrani ini aplikasionini. Erachiichaksï kánikua tsípixapti. Brasil anapu erachi ma enga Juscelino arhinhajka, uandasïndi: “No úsïreenga jakajkuni. Méntkuni eratseni jarhasïreenga eska Grupu enga Orhejtsïkuajka iámindu kúnguarhikuechani, kánikuajtsïni uékasïnga juchantsïni engachi no újka kurhaani ka uékasïndi eskachi juchajtu sánderu jorhenguarhiaka jurhimbikueri ambe májkueni eskaksï imeecha engaksï újka kurhaani. Kánikuani tsípixapka enga uérapka i aplikasioni ka sánderuni uékaxapkia Bibliani jorhenguarhini”.

 Iásïchi dijitali petaasïngia iámu bideuecha seniasi jimbo ka etsakuasïngachi juchaari pájina internetirhu ka ístu juchaari aplikasioni jimbo JW Library Sign Language. Ísï jimbo, iásï máru jurhiatikuechajkusï uétarhijti para tradusiriini, grabarini ka etsakuni bideuni ma seniasi jimbo, nóteru uétarhisïndia uánikua mesiicha o uéxurhiniicha. Máru seniasiiri idiomeecha májkuenksï petaani jarhasïndi publikasioniichani komueska ima idiomeecha para kʼuiripuecha engaksï k’oru újka kurhaani ka uandani.

 Exe je ambe engaksï uandajka máru erachiicha engaksï no újka kurhaani. Pirenchi ma enga Klízia arhinhajka, uandasïndi: Méntku no járhasti máteru organisasioni enga xáni pendienti pájka juchantsïni jimbo engaksï no újka kurhaani ka engajtsïni íntskujka xáni uánikua ambe parachi úni sánderu míteni Tata Diosïiri ambe. Tata Diosï Jeobaeri kúnguarhikuajkusï ísï újti”. Ka Vladimir uandasïndi: “Bideuchajtsïni xarhatachesïndi eskajtsïni Tata Diosï Jeoba xénchasïnga juchantsïni engachi no újka kurhaani ísï eska na xénchaajka imeechani engaksï kʼóru újka kurhaani”.

 Uánikua juchaari bideuecha seniasi jimbo, íni ambeksï uandasïndi: “Ari publikasioni jindeesti para jorhenguarhini Biblieri ambe, ka ánchikuarhita máesti enga úkuarhijka iámindu parhakpinirhu, jarhuatakuarhiparini imani sentabu jimbo engaksï kʼuiripuecha íntspijka tsípikua jingoni”. Kánikuaksïni diosmaiamukua arhisïnga indeni donasioniichani jimbo engajtsï íntspiajka, ménichani úraparini pájinani donate.pr418.com. I sentabujtsïni jarhuatasïndi para Bibliechani uaani ka máteru publikasioniichani enga jarhuatauajka iámindu kʼuiripuechani paraksï Biblieri ambe jorhenguarhini, asta para imeecha engaksï idiomeecha úraajka engaksï seniasi jimboeka.