Mándani mesi tsípikua jingonchi erokuarhiasïnga bideuechani ka programechani engajtsïni uinhaperantajka ka engaksï karhatanhajka JW Broadcasting. Joperuksï uánikua erachicha engaksï África anapueka nóksï úsïndi exeani interneti jimbo. ¿Andi?

 No uápurisï jarhasïndi interneti jini África ka nani enga jarhajka interneti no káni marhuasïndi o jukaparhasïndi. Pori ejemplu, ma jurhiani sirkuitueri orhejtsïkuti ma enga Madagascar anapueka, késkuspti programa JW Broadcasting siberirhu ma ka jatsispti para maiampini 16 dólari, íksï sánderu kánikua sentabuesti enga ma kʼuiripu andajka ma semana jimbo. a

 Nájkiruka xáni ini ambe úkuarhijka, uánikua kʼuiripu iásï jini África úsïndi exeni JW Broadcasting no úraparini interneti. ¿Néna úkuarhisïni i ambe?

 Imeecha engaksï África subsahariana irekaka desde 2017 jimboksï úsïndi exeni JW Broadcasting telebisioniri kanalirhu ma satelite jimbo. I kanali gratisi xarharani jarhasïndi interu jurhiatikua ka interu semana 16 idiomecha jimbo.

 Para úni ini ambe, Jeobaeri testiguechaksï maiampisïndi telebisioniri serbisiu ma para úni xarharani programecha ka bideuecha satelite jimbo. Sateliteri seniali andajkuarhisïndi niárani 35 paisicha jimbo jini África subsahariana ka i ambe jukari 12,000 dólari jukaparhasïndi mándani mesi jimbo. Ménisïksï jukari maiampisïndi paraksï máteru kanali jimbo xarhatani ambe enga úkuarhiaka imani mismu jurhiatikua jimbo. Ini ambe jimbo uánikua kʼuiripuechaksï úsïndi exeni kʼérati tánguarhikuecha rejioniri ka programa espesialichani engaksï úkuarhijka jiáni enga erachi ma Estados Unidos uératini anapu nirajka pʼorhembini jima anapu Betelini.

 Uánikua kʼuiripuecha engaksï Jeobaeri testigueka ka engaksï no jindeeka, exesïndiksï ini kanalini imeecheri telebisionicharhu. Joperu uánikua erachichaksï no úsïndi piáni iámindu ambe enga uétarhijka paraksï úni exeni ini kanali telebisioni jimbo. Jimbosïksï peerapti ekipuechani engaksï intsïnhajka senilai satelite jimbo máru 3,670 Kʼumanchikua Reinuerichani jimbo ka ísï erachichaksï úsïndi exeni JW Broadcasting jimini Kʼumanchikua Reinuericharhu. I ambe sáno 70 dólari jukaparhasti enbio jingoni, enga Kʼumanchikua Reinueri jatsiakia telebisioni o proiektori ma ka enga i ambe no jauaka, uaati jukaparhani asta 530 dólarisï.

 Erachichaksï kánikua agradesidu jarhasti ini kanali jimbo. Ma orhejtsïkuti Camerún anapu, uandasïndi: “Para juchiiti familia i ambe ísïisti komu maná desierturhisï”. Odebode, erachi Nigeria anapu ma, uandasïndi: “Familia jingonchi tánguarhintasïnga para indeni kanalini exeni tanimu jurhiatikua ma semana jimbo. Juchiiti sapiichaksï kánikua uékani jarhasïndi eska niáraaka inde jurhiatikuecha ka ístujtsïni arhisïndi eska máteru jurhiatikuecha jimbo jatsikukuntauakachi inde kanalini”. Rose enga ístu Nigeria anapueka, aiangusïndijtsïni: “¡Kánikua tsípini pʼikuarherasïnga! Ióntki méntkisï exeni jarhasïrenga imani kanali enga notisiecha xarharenga, joperu iásï sánderu tsitisïnga exeni kanali JW. Engani notisiechani exeauenga kánikua sóntku ikiasïrenga, asta presioni karhatasïrenga. Joperu kanali JW kánikua sési jásï ambe xarharasïreendi ka sésirini pʼikuastasïndi. Jindeesti kanali engani sánderuni tsitiska exeni. Jeobaeri kóntperata máesti”.

 Sirkuitueri orhejtsïkuti ma Mozambique anapu, arhisïndijtsïni eska imeeri sirkuiturhu intsïnhaskaksïa ekipuecha paraksï Kʼumanchikua Renuerichaksï jarhani seniali satelite jimbo ka únksï exeni kanali JW. Erachichaksï ma ora o jukari antesi niárasïndi Kʼumanchikua Reinuerirhu paraksï úni exeni JW Broadcasting ante de uénakuarhini imeecheri tánguarhikua.

 Kʼéri tánguarhikua internasionali 2019 jini Johannesburgo (Sudáfrica), úrakuarhesti i kanali para xarhatani máteru 9 lugaricha jimbo arhijtsïkperatecha enga nitamatarapka erachi ma enga jaka Grupurhu enga Orhejtsïkuajka iámindu kúnguarhikuechani. Sphumelele enga marhuajka Departamentu Broadkastinirhu enga Sudáfrica anapu Betelirhu jaka, uandasïndi: “Ióntki xarhatasïreengachi arhijtsïkperatecha interneti jimbo, ka para ini ambe úni uétarhinchasïreengachi ambakiti interneti ma ka piáni datuecha. Joperu nitamatarani kanali satelite jimbo, no xáni sentabu uétarhisïreendi ka sánderu seguruespti”.

 Diosmaiamu jimbokaksï xáni intsïmpitiska ka imani sentabu jimbo engajtsï íntspijka, iásïksï erachicha África anapuecha úsïndiksïa exeni JW Broadcasting satelite jimbo. Kánikua diosmaiamu imani sentabu jimbo engajtsï íntspijka para inde ánchikuarhita enga interu parhakpinirhu úkuarhijka úraparini mámaru ambe enga donate.pr418.com jimbo jaka.