Mándani uéxurhini itsï atakuarhisïndiksï uánikua kʼuiripuecha. Ísï jimbo uétarhisïndiksï sánderu lugaricha para kómarhini Tata Diosï Jeobani. Ísï jimbo, Sukursalirhu anapu máru Erachicha engaksï Konstruksioniri ambe Exejka interu parhakpinirhu, exestiksï eska uétarhisïnga uaani o sési jájkuantani jukari 2,700 lugarichani para tánguarhini uéxurhini serbisiueri 2020 jimbo. a

 Peru pandemia COVID-19 jimbo úkua jukasti eskaksï úpiringa úkuarhini i ánchikuarhitecha. Para kuájchakuani erachichani ka úni ambe engaksï juramuticha uandajka parakaksï no kérikuarhipiringa, Grupu enga Publikasionicheri ambe Exejka ima Grupueri enga Orhejtsïkuajka iámindu kúnguarhikuechani, anhaxustaspti sáno iámindu i ánchikuarhitechani. Peru uéxurhini serbisiueri 2020 jimbo úsptiksï uaani ka sési jájkuantani jukari 1,700 lugarichani para tánguarhini ante de ueenani pandemia. Ístuksï kʼamakuasti jukari 100 ánchikuarhitechani konstruksioniri engaksï kánikua jukaparhakueka máru Betelicharhu. Ju je exeni tsimani i ánchikuarhitechani ka na enga marhuakuani jaka erachichani.

 Beteli Camerún anapu. Orheta anapu Beteli enga ireta Duala japka kánikua sapichuespti ka uétarhinchasïreendi uánikua ambe para sési jájkuntani. Grupu enga Publikasionicheri ambe Exejka eratsespti sési jájkuntani jima anapu Betelini, peru sánderu sentabu uétarhipirindi eska na enga xáni jukaparhapka. Ístuksï exespti eska sési japiringa jimbanhi Beteli ma úni máteru nani ísï o piáni edifisiu ma ka sési jájkuntani, peru no ma ambe úspti ísï úkuarhini.

 Erachichaksï mítespti eska jima anapu juramutichaksï eratsexapka úni karretera ma Duala nortirhu, jima no iauani enga jaka Kʼumanchikua ma engaksï K’eri Tánguarhikuecha úkuarhijka. Jimbanhi karretera úpirindi eskaksï sóntku niárapiringa Betelirhu ka eskaksï edifisiuecha jatsipiringa ambe engaksï uétarhinchapiringa, komu lusi, itsï ka máteru ambe. Grupu enga Orhejtsïkuajka iámindu kúnguarhikuechani sési exespti eska únhapiringa jimbanhi Beteli ma jima mismu enga jaka Kʼumanchikua engaksï K’eri Tánguarhikuecha úkuarhijka.

 Para úkuarhini ma parti i ánchikuarhiteri, erachichaksï meiamuspti empresani ma para úni ini ánchikuarhitani ka inde ambe ústi eska no xáni sentabu ka tiempu úrakuarhepiringa. Ka i ánchikuarhita no xáni káni sentabu úrakuarhespti eskaksï na eratseni japka ka aorrarisptiksï jukari dos miioni dólarisï. Beteli anapuechaksï mótsispti jimbanhi Betelirhu sanititu antesi enga ueenapiringa pandemia COVID-19.

 Camerún anapu betelitechaksï iásï sánderu sési irekasïndia ka ánchikuarhini, ísïksï exesïndi jimbanhi Betelini komu Jeobaeri intsïmperata ma. Temungurhiri ma uandasïndi: “Iásïchi uékasïngia sánderu ánchikuarhini ka xarhatani eskachi jukaparharasïnga ini intsïmperatani”.

 Ofisina nani enga Tradusirinhajka publikasionicha tojolabal jimbo jini (México). Uánikua uéxurhinicha jimbo, ekipu enga tojolabal jimbo tradusirijka, ánchikuarhispti Centroamérica anapu Betelirhu enga México jaka, peru tojolabal sánderu uandanhasïndi ini iretecha jimbo komu Altamirano ka Las Margaritas enga sáno 1,000 kilometro (620 millas) iauanisï jaka Centroamérica anapu Betelirhu. Ka komu traduktorichaksï no jima irekapka nani engaksï uandanhenga tojolabal, sánderuksï úkua jukanchasïrendi míteni jimbanhi uandakuechani engaksï úrakuarheni japka imeecheri idioma jimbo. Centroamérica anapu Beteli úkua jukanchaxapti jirinhani erachichani engaksï jima no iauani irekapka ka engaksï úpiringa jarhuajpeni para tradusirini ka grabariuani audiuechani.

 Ini ambe exeparini, Komite enga Bibliaeri Publikasionichani uaajka Grupueri enga Orhejtsïkuajka iámindu kúnguarhikuechani, sési exespti eskaksï traduktoricha mótsipiringa nani enga tojolabal uandanhajka. Ísï jimbo, Beteli piáspti edifisiu ma ka sési jájkuntaspti. I ambe no xáni jukaparhaspti eska uaani o rentariuani ofisinechani.

 Traduktorijtsïni ma aiangusïndi na enga pʼikuarherajka: “Ima 10 uéxurhini engani ánchikuarhipka komu traduktori jini Beteli, no méni exentaspka familiani ma enga uandapiringa juchiiti idioma. Iásï juchaari ofisina jima jarhasti nani enga uandanhajka tojolabal. Pauani pauani úsïnga uandontskuarheni ima kʼuiripuecha jingoni engaksï i idioma uandajka. I amberini jarhuatasti parani sánderu uandakuechani jorhenguarhiani ka ústi eskani sánderu sési uaaka juchiiti ánchikuarhitani”.

 I uéxurhini serbisiueri 2021 jiáni enga iámu ambe sési niántakia uétarhiati ánchikuarhini 75 ofisinecharhu para tradusirinhani ka ístu máru lugaricharhu para Eskuelecha engaksï Biblieri ambe jorhentpijka. Ístuksï seguiriuati 8 ánchikuarhitecha úkuarhini máru Betelicharhu, máru inde ánchikuarhitecha jindeestiksï Rámapo anapu (Nueva York), ka móskunhanksï Betelicha, Argentina ka Italia anapuecha, ístu uétarhixati jukari 1,000 jimbanhi Kʼumanchikua Reinuericha, ístu jarhasti jukari 6,000 lugaricha para tánguarhini engaksï no kánikua sési jaka ka engaksï uétarhijka para mójtakuani ka máteru 4,000 Kʼumanchikua Reinuerichani engaksï uétarhijka sési jájkuantani.

 ¿Náki sentabu jingoni úkuarhisïni iámindu i ánchikuarhitecha? Erachi Lázaro González enga ánchikuarhijka ima Grupu enga Centroamérica anapu Betelini orhejtsïkujka, mókuntasïndi i kurhamarhikua. Erachi i ambe uandasïndi ánchikuarhiteri enga úkuarhika Ofisinecha nani enga Tradusirinhajka publikasionicha tojolabal jimbo: “Juchaari territoriurhu anapu erachichaksï no káni sentabu jatsikuarhesti. Engajtsïni no jarhuatapiringa erachicha engaksï interu parhakpinirhu jaka nóchi úpiringa úni ini ofisinechani nani enga tradusirinhajka publikasionicha para juchaari erachicha engaksï máteru idioma uandajka. Ima sentabu engaksï juchaari erachicha íntspijka, úsïngachi axaani traduktorichani jima no iauanisï nani enga uandanhajka imeecheri idioma. Kánikuachi diosmaiamukua arhiasïnga juchaari erachichani jimbokaksï intsïmpitiska”. ¿Exeskijtsï? Iámindu i ánchikuarhitecha konstruksioniri úkuarhisïndi ima sentabu jimbo enga aianhpikuarhu úrakuarhejka ka uánikuaksï íntspisïndi sentabu úraparini donate.pr418.com.