Jukari terujkani ima grupuecheri engaksï tradusirijka, ánchikuarhisïndiksï Ofisinecharhu nani enga Tradusirinhajka publikasionicha ka no Beteli ma jimbo. ¿Néna marhuasïni i ambe? ¿Ambeksï uétarhinchasïni traduktoricha engaksï ánchikuarhijka Ofisinecharhu nani enga Tradusirinhajka publikasionicha? ¿Andisï Ofisinecha nani enga Tradusirinhajka publikasionicha marhuajki paraka sánderu sési uéraaka traduksioni?

 Ima ofisinecha jimbo nani enga tradusirinhajka publikasionicha, traduktorichaksï úsïndi irekani ima lugari jimbo nani enga uandanhajka ima idioma engaksï jimbo tradusirijka. Karin enga jindeeka traduktori ma alemán bajoni, uandantasïndi: “Desde engachi mótsika Ofisina nani enga Tradusirinhajka publikasionicha enga Cuauhtémoc jaka jini Chihuahua (Mexico), méntkisïchi uandasïnga alemán bajo, uandontskuarhesïngachi alemán bajo jimbo máteru traduktoricha jingoni o aianhperakuarhu ka ístu engachi nirajka piáni ambe ma. Irekaxakachi nani enga iáminduecha uandajka alemán bajo ka ísï jimbo kurhaasïngachi uandakuechani engachi iónisï nóteru kurhauengia ka iásïchi míteska náki sánderu jimbanhi uandakuechanksï úraasïni kʼuiripuecha”.

 James irekasti Ghana ka ánchikuarhisïndi komu traduktori idioma Frafra jimbo, ima uandasïndi eska ménichani jirinhantasïnga Beteli anapuechani. Peru ístu uandasïndi: “Kánikua tsitisïnga ánchikuarhini Ofisina nani enga Tradusirinhajka publikasionicha. Kánikua tsípisïnga exeni na engaksï kʼuiripuecha sési kurhaaka ambakiti aianhperakuani ka engani aianguauaka imani idioma jimbo enga jima uandanhajka”.

 ¿Néna erakunhasïni lugari ma nani enga jauaka Ofisina nani enga Tradusirinhajka publikasionicha? Josep jarhuajpesïndi sukursalirhu anapu máru erachicha jingoni engaksï Konstruksioniri ambe Exejka interu Parhakpinirhu jini Warwick (Nueva York), ka ima uandantasïndi: “Ménichani úkua jukasïnga máru lugaricharhu jimboka no méntkisï jarhasïnga itsï o lusi, ka ístu no kánikua interneti jarhani para késkuani archibuechani enga tradusirikuarhiaka. Ísï jimbo, ante dechi uandani nani jaua Ofisina nani enga Tradusirinhajka publikasionicha, exesïngachi nani ka nani uandanhasïni ima idioma”.

 Sáno méntkisï sánderu sésisïndi ka no xáni jukaparhani peerani Ofisina nani enga Tradusirinhajka publikasionicha, Kʼumanchikuarhu nani enga Kʼéri Tánguarhikuecha úkuarhijka, Kʼumanchikua Reinueri ma o Kʼumanchikua ma para misioneruecha nani engaksï traduktoricha uaaka nirani ka junguani jarhani. Enga ma inde lugaricharhu no uaaka inde ambe úkuarhini, erachichaksï sésikua kurhajkuarhisïndi paraksï piáni lugari ma nani engaksï traduktoricha uaaka irekani ka ofisinecha nani engaksï ánchikuarhiaka. Enga niárapiringa mójtakuarhini ambe engaksï traduktoricha uétarhinchajka, i lugarichaksï uaati ataranhantani ka ima sentabu úrakuarheni nani enga uétarhiaka.

 Uéxurhini serbisiueri 2020 úrakuarhesti 13 miioni dólari para sési jatsiani Ofisinecha nani enga Tradusirinhajka publikasionicha. Grupu traduktoricheri uétarhinchasïndiksï komputadorechani, programechani para ánchikuarhiani ka ekipu ma para grabariani audiuechani ka interneti o máteru ambe engaksï uétarhinchaaka, komu lusi ka itsï ambe. Pori ejemplu, uétarhisïndi 750 dólari para piáni komputadora ma ka listu jatsini programechani enga uétarhiaka para ánchikuarhini. Ístu traduktorichaksï uétarhisïndi programa Watchtower Translation System, enga jarhuatauaka paraksï sési peerani imeecheri ánchikuarhita ka nani engaksï uaaka exeantani dokumentuechani engaksï tradusiriuaka.

 Traduktorichaksï ístu intsïnhasïndi ekipuechani para grabarini audiuechani imeecheri ofisinecharhu. Íksï ekipuecha kánikua marhuaspti jiáni enga uénakuarhipka pandemiani COVID-19, jimbokaksï uánikua traduktoricha úspka páni imeecho ka seguirini grabarini publikasionichani ka bideuechani.

 Ístuksï jarhasti jima anapu erachicha engaksï jarhuajpejka rebisariuani traduksionichani ka jarhuajpeni para sési jatsiani edifisiuechani. Cirstin enga ánchikuarhijka Ofisina nani enga Tradusirinhajka publikasionicha afrikáans jimbo, jini siudadi del Cabo (Sudáfrica), uandasïndi: “Uánikua aianhpiricha ka prekursori regularichaksï úsïndi jurhani ánchikuarhini ixú”.

 Íksï erachicha kánikua tsitisïndi ixú ánchikuarhini. Pori ejemplu, pirenchi ma uandasïndi eska jarhuajpeni Ofisina nani enga Tradusirinhajka publikasionicha jindeeska “ambe ma enga kánikua sési pʼikuarheratajka ka enga újka eska uinhapintaka”. Máru jima anapu erachichaksï jarhuajpesïndi imeecheri bosicha jingoni paraksï úni grabarinhani audiuecha. Pirenchi Juana enga totonaco jimbo tradusirijka jini Veracruz (México), aiangusïndijtsïni: “Iásï engachi sánderu nóteru iauani irekakia ima lugaricha nani enga uandanhajka juchaari idioma, sánderu fásilisti eskaksï uánikua erachicha juuaka grabariuani publikasionichani ka bideuecheri audiuecheri”.

 ¿Peru meru marhuasïni Ofisinecha nani enga Tradusirinhajka publikasionicha paraka sánderu sési uéraka traduksioni? Uánikua engaksï arhiantajka juchaari publikasionicha uandasïndiksï eska jo. Cédric enga ánchikuarhijka traduksionirhu idioma kongo jimbo, jini República Democrática del Congo, uandasïndi: “Máru erachichaksï uandasïreendi eskachi tradusirisïreenga kongo Watch Toweriri, jimboka no terukuntasïrenga ima idioma jingoni engaksï imeecha uandaenga. Peru iásï uandasïndiksïa eskachi tradusirisïnga kongo jimbo, jimboka ima kʼóru jindeeska idioma engaksï imeecha uandajka pauani pauani”.

 Erachi Andile, enga Xhosa jimbo tradusirijka, uandasïndi eska Sudáfrica sáno májkueni ambe úkuarhisïnga: “Uánikuaksï exesïndi eska traduksioni mójtakurhiskia, asta máru sapiicha engaksï antesi arhintaenga La Atalaya inglesi jimbo, iásïksï arhintasïndia xhosa jimbo. Ka kánikuaksï tsitisïndi arhintani Traducción del Nuevo Mundo jimboka ísï karakata jarhaska eskaksï imeecha na uandajka”.

 Iámindu sentabu enga úrakuarhejka para Ofisinecha nani enga Tradusirinhajka publikasionicha ka paraka ícha sési jauaka ka ístu para imeecha engaksï jima ánchikuarhijka, úkuarhisïndi ima sentabu jingoni engaksï íntspinhajka para ima ánchikuarhita enga úkuarhijka interu parhakpinirhu, asta ima sentabu jingoni enga íntspinhajka donate.pr418.com jimbo.