Uéxurhini serbisiueri 2021 jimbo, a iámu parhakpinirhu kánikua no sési jánhaskuarhispti COVID-19 jimbo. Eska na uandapka artikulu “Ini pandemia jimbo interu parhakpini anapu erachichaksï jarhuajpexati”, uánikua miioni dolari b úranhasti para i pandemia ka niárastiksï jarhani jukari 950 Grupuecha para Jarhuajpeni.

 Mientrasi enga pandemia jimbo kánikua no sési jánhaskuarhini japka parhakpinirhu, ístu máteru desastresicha engaksï úkuarhini japka ka máteru ambe enga kʼuiripu no sési úni japka, ístu i ambe úspti eskaksï erachiicha no sési nitamakuarhipiringa. Ísï jimbo, Grupu enga Jarhuajperata Íntspijka sési exespti no solu úrani sentabuni enga jindeepka para pandemia, sino eska ístu úrakuarhepiringa 8 miioni de dolari para jarhuajpeni jukari 200 desastresi naturalicharhu engaksï úkuarhipka. Ju je exeni néna enga úrakuarhika donasioniicha tsimani desastresi naturalicha jimbo engaksï iásï no ióni nitamaka.

 Jiáni 22 de maiu 2021 jimbo, bolkani Nyiragongo enga República Democrática del Congo jaka, ueenasptia chpiri kʼuanikuni. Chpiri kurhiraspti kʼumanchikuechani, eskuelechani ka nani engaksï itsï patsenga. Peru no indejku ambeespti. Uánikua jurhiatikuechani, bolkani polbu kʼuanikuxapti enga kánikua no sési útspienga iretarhu enga Goma arhinhajka ka someni jenchexapti. Jukari terujkani ireta kénditanhaspti. Ka uánikua kʼuiripu sïpakuarhispti ka máruksï niáraspti asta Ruanda.

 Ima kʼuiripuecheeri engaksï kénditanhapka, jarhasptiksï jukari 5.000 Jeobaeri testiguecha. Máruksï tsïtakuarhispti kʼumanchikuechani ka máteruechanksï sïpakuaspti ambe engaksï nóteru jima japkia. Grupuecha para Jarhuajpeni Ruanda ka República Democrática del Congo anapu, jarhuajperasptiksï. Congo anapu betelijtsïni aiangusïndi ambe enga úpka inde grupu ma: “Antedeksï kénditanhani, grupu enga jarhuajpejka ueenaspti íntsaani tʼirekua, itsï, karonichani, sábanechani ka takusï ambe, nájkiruka iretarhu kánikua no sési janhani japka”. Grupuecha para Jarhuajpeni peeraaspti tiendasi de kamapania, íntsaasptiksï kubrebokechani ka arhiasptiksï néna engaksï jámapiringa paraksï no kérikuarhini COVID-19 ni kólera.

 Tanimu mesiichani jimbo, juchaari erachiichaksï etsakuspti jukari 6 tonelada arrosu, 6 tonelada arina, jukari 8.000 litru aseiti para tʼirekua úntani ka jukari 8.000 litru itsï. Paraka beteli no jukari sentabu úrapiringa, jimajkuksï piáspti kánhachani tʼirekua parakaksï no máteru nani ísï juaani japiringa sánderu jukaparhakua jimbo.

 Pirenchi ma uandantasïndi: “Kánikuachi no sési nitamakuarhixapka”. Bolkani xerentaspti imeeri jimbanhi kʼumanchikuani, joperu tátsekua ima ka imeeri familia intsïnhasptiksï ambe engaksï uétarhinchani japka ka ístuksï jarhuataspti paraksï sési jarhani Tata Diosï jingoni. Iásï uandasïndi: “Tata Diosï Jeobaeri jarhuajperata jimbo, jatsiskachi ambe engachi uétarhinchajka. Ka exeskachia eskajtsïni Tata Diosï Jeoba jarhuatasïnga juchaari uandanhiateecha jingoni ka úsïndi eska no xáni úkua jukaaka tekaantani”.

 Venezuela ióni páxatiia engaksï kʼérati problemecha jaka sentabu jimbo. No xáni jarhasti tʼirekua ambe ka sánderu no sési jánhaskuarhixati. Para juchaari erachiicha kánikua úkua jukasti ísï irekani. Joperu Tata Diosï Jeobaeri kúnguarhikua jarhuataxati.

 Uéxurhini serbisiueri 2020 jimbo, jukari ma miioni ka terujkani úrakuarhesti para piáni tʼirekua ka xapu ambe ka pákuanksï imani familiechani engaksï sánderu uétarhinchani japka. Venezuela anapu beteli uandantasïndi: “Kánikua úkua jukasti páni mándani mesi 130 tonelada tʼirekua para imani erachiichani pákuani engaksï uétarhinchani jarhajka”. Paraka tʼirekua no xarhipiaka, erachiichaksï imani ambe axasïndi enga no sóntku tsïjpejka. Beteli seguirisïndi uandani. “Kasi iámu tʼirekua engachi piántajka, imani tiempu jimboesïndi enga kánikua jarhajka, kánhachanchi piásïnga ka jiáni enga no xáni jukaparhajka. Ka tátsekuachi jirinhantasïnga modu para pákuani no xáni sentabu úraparini”.

 Leoneli imani grupu jimbo jarhasti enga jarhuajpejka Venezuela ka kánikua tsitisïndi imeeri ánchikuarhitani. Ima uandantasïndi: “Para ji, kʼéri kóntperata máesti ini grupurhu jarhuajpeni jarhani. Jiáni uératini enga juchiiti uarhiiti uarhika COVID-19 jimbo, kánikuarini jarhuatasti parani nóteru xáni no sési pʼikuarherania. Ístuni okupadu jarhasïnga ka exesïnga eskani uaaka jarhuataani imeechani engaksï uétarhinchani jarhajka. Ji mismuni exeskia eska Tata Diosï Jeoba no méni jurajkusïnga imeeri iretani”.

 Exe je ambe enga erachi ma uandantajka enga antesi ánchikuarhipka imani grupu jimbo enga jarhuajpejka: “Iásï jísïni uétarhinchani japka eskajtsïni jarhuatapiringa. No solujtsïni imani ambe íntskuspti engani uétarhinchani japka. Erachiichajtsïni jarhuatasti juchiiti uarhiitini ka jíndeni para no xáni uandanhiani, sésijtsïni pʼikuastantaspti, kuidarisptijtsïni ka uinhaperantani”.

 Máru desastresi naturalichaksï ma repentku úkuarhisïndi. Nájkiruka ísï úkuarhijka juchaari kúnguarhikua sóntku tánasïndi ka etsakuni ambe enga uétarhiaka, imani sentabu jimbo enga chá íntspijka para ánchikuarhita enga iámu parhakpinirhu úkuarhijka. Jima enga arhijka donate.pr418.com exeakajtsï nénajtsï uaaka íntspini sentabu. ¡Kánikua diosmaiamu je jimbokajtsï kánikua íntsïmpitiiska!