«Чөнки Аллаһы әйткән бер сүз дә үтәлми калмый» (Лүк 1:37, «Яңа дөнья тәрҗемәсе»).

 «Чөнки Аллаһы булдыра алмаган эш юк» (Лүк 1:37, Изге Китапны тәрҗемә итү институты тәрҗемәсе).

 Чиксез Кодрәт Иясе Аллаһы кеше карашыннан мөмкин булмаганны башкара ала. Ул берәр нәрсә эшләргә сүз я вәгъдә бирсә, аңа моны эшләргә беркем дә комачаулый алмый.

 «Әйткән бер сүз дә» дип тәрҗемә ителгән грек сүзенең мәгънәсе Аллаһы тарафыннан әйтелгән «сүз; әйтем; игълан» булырга мөмкин. Ул шулай ук Йәһвә a Аллаһы әйткәннең нәтиҗәсен дә аңлата ала. Аллаһы әйткән һәр сүз үтәлгәнгә, Лүк 1:37 не болай да тәрҗемә итеп була: «Аллаһының вәгъдәләре һәрвакыт үтәлә» я «Аллаһы өчен барысы мөмкин». Грек текстын алай итеп тәрҗемә итү мондый төп хакыйкатьне раслый: Аллаһы әйткән сүз я биргән вәгъдәсе үтәлми калмый, чөнки аның өчен мөмкин булмаган нәрсә юк (Ишагыя 55:10, 11).

 Аллаһының вәгъдәле турындагы моңа охшаш сүзләрне Изге Язмаларның күп кенә урыннарында күреп була. Мәсәлән, Йәһвә үз фәрештәсен кулланып мондый вәгъдә биргән: Ибраһимның хатыны Сара, карт булса да, балага узачак. Аллаһы болай дип өстәгән: «Әллә Йәһвә булдыра алмаган нәрсә бармы?» (Яратылыш 18:13, 14). Аллаһы барлыкка китергән нәрсәләргә игътибар иткәннән соң, Әюп пәйгамбәр болай дигән: «Һәр ниятеңне үти алганыңны беләм» (Әюп 42:2). Гайсәнең шәкертләре, Аллаһы аларны коткарып калсын өчен, аның нормалары буенча яши алырлар микән дигән шик белдергәч, Гайсә аларга болай дигән: «Аллаһы барысын да булдыра ала» (Маттай 19:25, 26). b

 Лүк 1:37 дә Җәбраил фәрештәнең сүзләре китерелә. Ул бу сүзләрне Мәрьям исемле яшь хатынга әйтә. Җәбраил аңа болай ди: «Син... ир бала табарсың, аңа Гайсә дигән исем кушарсың. Ул бөек булыр һәм Аллаһы Тәгаләнең Улы дип аталыр». Шул ир бала мәңге идарә итәчәк Аллаһы Патшалыгының Патшасы булырга тиеш булган (Лүк 1:26—33; Ачылыш 11:15).

 Мәрьям фәрештәдән: «Минем ир-ат белән якынлык кылганым юк бит, ничек инде мин балага узармын?» — дип сораган (Лүк 1:34, 35). Җәбраил аңа бу Аллаһының изге рухы, ягъни эш итүче көче ярдәмендә мөмкин булачак дип әйткән. Ул вакытта Гайсә күктә, Аллаһының рухи улы булган. Йәһвә үз изге рухын кулланып, үз Улының тормышын Мәрьямнең карынына күчергән (Яхъя 1:14; Филипиялеләргә 2:5—7). Шулай итеп Мәрьям, могҗиза ярдәмендә, балага узган. Аның Аллаһы кодрәтенә иманын көчлерәк итәр өчен, фәрештә Мәрьямгә болай дигән: «Синең туганың Илисәбәт тә... олы яшендә балага узды һәм инде алтынчы ай йөкле йөри». Илисәбәт белән ире Зәкәриянең балалары булмаган, чөнки Илисәбәт балага уза алмаган (Лүк 1:36). Аларның уллары — Чумдыручы Яхъя туган. Аның хезмәте турында да Йәһвә алдан пәйгамбәрлек әйткән булган (Лүк 1:10—16; 3:1—6).

 Шуннан соң Җәбраил фәрештә Лүк 1:37 дәге сүзләрне әйтә. Бу сүзләрне әйткәндә ул, күрәсең, Мәрьямне дә, Илисәбәтне дә исәптә тоткан. Шул сүзләр Йәһвәнең хезмәтчеләрен бүген дә шуңа ышандырып тора: Аллаһы үз вәгъдәләрен һәрвакыт үтәп торачак. Аларның берсендә Аллаһы тиздән кеше хөкүмәтләрен үз Улы идарә иткән хөкүмәт белән алмаштырачак дип әйтелә. Гайсә Мәсихнең идарәсе гадел булачак. Гайсә — Аллаһының күктәге Патшалыгының Патшасы (Даниял 2:44; 7:13, 14).

 Лүк китабы турындагы кыска видеороликны карагыз.