Изге Язмаларда Гайсә турында еш кына «Аллаһы Улы» дип әйтелә (Яхъя 1:49). «Аллаһы Улы» дигән сүзтезмә шуны күрсәтә: Аллаһы бар нәрсәне, шул исәптән Гайсәне дә, барлыкка китергән һәм һәркемгә тормыш биргән (Зәбур 36:9; Ачылыш 4:11). Ләкин Изге Язмалар Аллаһы кешеләр кебек туры мәгънәдә балалар тудыра дип өйрәтми.

 Изге Язмаларда фәрештәләр дә «Аллаһының уллары» дип атала (Әюп 1:6). Шулай ук беренче кеше Адәм турында да «Аллаһының улы» диелә (Лүк 3:38). Ләкин, Йәһвә Гайсәне иң беренче итеп һәм үзе генә барлыкка китергәнгә, Изге Язмаларда Гайсә Аллаһының иң мөһим Улы итеп тасвирлана.

•  Гайсә җиргә килгәнче күктә яшәгәнме?

•  Җиргә килгәнче, Гайсә нәрсә эшләгән?

 Әйе. Җирдә кеше булып туганчы, Гайсә күктә рухи шәхес булган. Ул үзе турында: «Мин... күктән иңдем»,— дип әйткән (Яхъя 6:38; 8:23).

 Аллаһы Гайсәне иң беренче итеп барлыкка китергән. Изге Язмаларда Гайсә турында болай дип әйтелә:

•   «Ул... яратылганнарның беренчесе» (Көләсәйлеләргә 1:15).

•   Ул — «Аллаһының иң беренче итеп яраткан заты» (Ачылыш 3:14).

 Гайсәдә «чыгышы буенча борынгы заманнардан, элекке көннәрдән» булган зат турындагы пәйгамбәрлек үтәлгән (Микай 5:2; Маттай 2:4—6).

 Аның күктә югары дәрәҗәсе булган. Гайсә, дога кылганда, моның турында болай дип әйткән: «Әти, мине данла... дөнья яратылганга кадәр синең яныңда булган даныма ия булырга рөхсәт ит» (Яхъя 17:5).

 Ул үз Атасына бар нәрсәне барлыкка китерергә ярдәм иткән. Гайсә Аллаһы янында «оста һөнәрче» булган (Гыйбрәтле сүзләр 8:30). Гайсә турында Изге Язмаларда болай дип әйтелә: «Күктәге һәм җирдәге... һәммәсе... аның аркылы яратылган» (Көләсәйлеләргә 1:16).

 Аллаһы, Гайсәне кулланып, бар нәрсәне — бар рухи затларны һәм бөтен Галәмне барлыкка китергән (Ачылыш 5:11). Йәһвә Гайсә белән, архитектор төзүче белән кебек, хезмәттәшлек иткән. Архитектор проект уйлап чыгара, ә төзүче бу проектны тормышка ашыра.

 Ул Сүз булып хезмәт иткән. Изге Язмаларда, Гайсәнең кеше булып туганчыга кадәрге тормышы турында әйткәндә, ул «Сүз» дип атала (Яхъя 1:1). Күрәсең, Аллаһы, башка рухи затларга күрсәтмәләр бирер өчен, үз Улын кулланган.

 Гайсә, мөгаен, кешеләр өчен дә Аллаһының Хәбәрчесе булган. Гадән бакчасында Адәм белән Хаувага күрсәтмәләр биргәндә, Аллаһы Гайсәне Сүз буларак куллангандыр (Яратылыш 2:16, 17). Бәлкем, борынгы исраиллеләрне чүл аша алып барган фәрештә дә Гайсә булган һәм аның тавышына алар буйсынырга тиеш булган (Чыгыш 23:20—23) a.