Кырыс укытучылар. Яшьтәшләр басымы. Алҗыткыч имтиханнар һәм бетмәс өй эшләре. Әгәр мәктәпне яратмыйм дисәң, бер дә гаҗәп түгел a. Рэйчел b исемле яшүсмер болай ди:

 «Мин мәктәп урынына теләсә кая барыр идем. Пляжда я дусларым белән булыр идем я хәтта әти-әниемә берәр нәрсә пешерергә я җыештырырга булышыр идем!»

 Син үзеңне Рэйчел кебек хис итсәң, мәктәп елларың үзеңә төрмәдә утыру кебек тоелырга мөмкин. Син аларны, мәктәпне тәмамлап, иреккә чыгарылганчы, түзеп торырга тиеш. Мәктәптә үткәргән вакытыңа уңай караш үстереп буламы?

 Син беләсеңме? Мәктәпкә карата уңай карашта булсаң, анда үзеңне яхшырак хис итәрсең һәм укуыңны инде түзеп торырлык нәрсә итеп кабул итмәссең. Ниндидер мәгънәдә, мәктәп синең өчен алдагы тормышта кирәк булачак осталыкларны яхшырту коралы булып китә.

 Мәктәпкә карата уңай карашта булыр өчен, игътибарыңны мондый якларга тупларга тырыш.

 Белем алу. Күбрәк белем алган саен, син, башкаларга һәрвакыт таяныр урынына, эшеңдә һәм тормышыңның башка өлкәләрендә туачак авырлыкларны яхшырак хәл итә алачаксың. Үзеңнән сора: «Мин, мәктәптәге кайбер нәрсәләрне ошатмасам да, белем алудан нинди файда алам?»

 Изге Язмалардагы принцип: «Зирәклек һәм аңны сакла» (Гыйбрәтле сүзләр 3:21).

 Гадәтләр. Мәктәптә үстергән яхшы гадәтләрең сине вакытыңны дөрес кулланырга, үзеңне тәртипле булырга һәм тырыш эшче булырга өйрәтә ала. Ә бу сыйфатлар сиңа олы тормышыңда кирәк булачак. Үзеңнән сора: «Мәктәптә үстергән яхшы гадәтләрем миңа тәртипле һәм яхшы эшче булып китәргә ничек булыша? Бу өлкәләрдә нинди үзгәрешләр ясап була?»

 Изге Язмалардагы принцип: «Һәрбер тырыш хезмәтнең файдасы бар» (Гыйбрәтле сүзләр 14:23).

 Башкалар белән мөнәсәбәтләр. Мәктәптә сыйныфташларың белән аралашу сиңа башкаларга карата кызгану һәм хөрмәт үстерергә булыша ала. «Кешеләр белән аралашырга өйрәнү, тарих белән фәнне өйрәнү кебек, мөһим. Бу осталыкны син гомерең буе кулланырсың»,— дип әйтә Джошуа исемле яшь кеше. Үзеңнән сора: «Башка кешеләр белән, хәтта чыгышлары һәм карашлары минекеннән аерылып торган кешеләр белән, уртак тел табуга килгәндә, мәктәптә мин нәрсәгә өйрәндем?»

 Изге Язмалардагы принцип: «Һәр кеше белән тыныч-тату яшәргә... омтылыгыз» (Еврейләргә 12:14).

 Киләчәк. Мәктәп сиңа үз сәләтләреңне ачыкларга һәм тиешле максатлар куярга ярдәм итә ала. Брук исемле яшь хатын-кыз болай ди: «Син, бәлки, хәтта берәр махсус өлкәдә, мин өйрәтү алган кебек, өйрәтү ала алырсың. Шулай итеп мәктәпне тәмамлагач, син инде шул өлкәдә эшләргә яраклы булырсың». Үзеңнән сора: «Мәктәпне тәмамлагач, мин үземне ничек тәэмин итәрмен? Мәктәптә укыганда, моны исәпкә алып, мин андый эшкә ничек әзерләнә алам?»

 Изге Язмалардагы принцип: «Аягың басасы сукмакны такыр ит» (Гыйбрәтле сүзләр 4:26).