Ни өчен кешеләр мәңге яшәргә тели? Изге Язмаларда әйтелгәнчә, Аллаһы үзе бу теләкне күңелебезгә салган (Вәгазьче 3:11). Анда шулай ук: «Аллаһы — мәхәббәт ул»,— диелгән (1 Яхъя 4:8). Аллаһы безне мәңге яшәргә теләк белән булдырып та, безгә андый мөмкинлекне бирмәсә, бу ярату булыр идеме?

Әйе, беркемнең дә үләсе килми. Изге Язмаларда үлем юкка гына «дошман» дип аталмаган (1 Көринтлеләргә 15:26). Иртәме-соңмы, барыбыз да үләбез. Күпләргә үлем турында уйлау ошамый, кайберәүләрне хәтта куркыта да. Үлемне кайчан да булса җиңеп булырмы? Бу мөмкинме?

Сез гаҗәпләнерсез, әмма үлем беркайчан да Аллаһының ниятенә кермәгән. Изге Язмаларның Яратылыш китабыннан күренгәнчә, Аллаһы кешеләрнең җирдә мәңге яшәүләрен теләгән. Кешеләр җирдә рәхәт яшәсен өчен, Йәһвә * Аллаһы барысын эшләгән. Ул беренче кеше Адәмне барлыкка китергән һәм аны оҗмахка, Гадән дип аталган бакчага урнаштырган. «Аннары Аллаһы үзе барлыкка китергән нәрсәләрне күздән кичергән дә барысының бик яхшы булуын күргән» (Яратылыш 1:26, 31).

 Адәм Аллаһыга охшаш итеп, камил итеп барлыкка китерелгән булган (Канун 32:4). Аның хатыны Хаува да бар яктан камил булган. Йәһвә аларга болай дигән: «Үрчегез, ишәегез, җир йөзен тутырыгыз һәм аңа хуҗа булыгыз. Диңгездәге балыклар, күктә очучы тереклек ияләре һәм җирдә хәрәкәт итүче барлык тереклек сезгә буйсынсын» (Яратылыш 1:28).

Җир йөзен кешеләр белән тутырыр өчен, күп вакыт кирәк булган. Хауваның — балалары, бу балаларның үз балалары туарга тиеш булган. Ахыр чиктә, Аллаһы ниятләгәнчә, бөтен җир кешеләр белән тулыр иде (Ишагыя 45:18). Адәм белән Хаува үз балаларын һәм оныкларын гына күреп, ә бөтен җирнең тутырылганын күрмичә үләргә тиеш булса, Йәһвә аларга андый әмер бирер идеме?

Кешеләргә шулай ук хайваннарны буйсындырырга диелгән булган. Адәм хайваннарга исем кушарга тиеш булган, ә моның өчен күп вакыт кирәк булган (Яратылыш 2:19). Аларны буйсындыру шулай ук алар белән танышуны һәм алар турында кайгыртуны үз эченә алган. Бу исә тагы да күбрәк вакыт таләп иткән.

Әйе, Аллаһының җир йөзен тутыру һәм хайваннарны буйсындыру турындагы шушы ике әмере шуны күрсәтә: беренче кешеләр бик озак яшәргә тиеш булган. Һәм Адәм чыннан да озак яшәгән.

Изге Язмалардан күренгәнчә, кайчандыр кешеләр, бүгенге кешеләргә караганда, күпкә озаграк яшәгән. Анда: «Адәм барлыгы 930 ел яшәде»,— диелгән. Шул ук өзектә 900 дән артык ел яшәгән тагын алты кеше: Шет, Инуш, Кынан, Ярид, Мәтушәлих һәм Нух турында әйтелә. Аларның барысы да Нух көннәрендәге Туфанга кадәр яшәгән. Нух үзе Туфан килгәнче 600 ел гомер иткән (Яратылыш 5:5—27; 7:6; 9:29). Ничек алар шулкадәр озак яши алган?

Бар бу кешеләр Адәм белән Хаува камиллекне югалтканнан соң күп тә үтмәстән яшәгән. Күрәсең, бу аларның озын гомерләренең төп сәбәбе булгандыр. Ләкин камиллек озын тормыш белән ничек бәйле соң? Һәм үлемне ничек җиңеп булыр? Бу сорауларга җавап табар алдыннан, башта әйдәгез ни өчен без картаябыз һәм үләбез икәнен белик.