Изге Язмалардагы киңәш: «Байлык яратмыйча тормыш итегез, булганына канәгать булып яшәгез» (Еврейләргә 13:5).

Бүгенге дөнья, безгә исәпсез әйбер тәкъдим итеп, аларсыз яшәп булмый дип ышандырырга тырыша. Ләкин Изге Язмаларда без «булганына канәгать булып яши» алабыз дип әйтелә. Ничек итеп?

«Акча яратудан» качыгыз. Кешеләр акча хакына сәламәтлекләрен, гаилә, дуслык, әхлак һәм хәтта үз дәрәҗәләрен югалтырга әзер (1 Тимутигә 6:10). Ләкин бу чиктән тыш зур бәя түгелме?! Ахыр чиктә «байлык сөйгән кеше табышка туймас» (Вәгазьче 5:10).

Әйберләрне түгел, кешеләрне кадерләгез. Әлбәттә, материаль әйберләр файда китерә. Ләкин алар безне ярата да, кадерли дә алмый. Моны кешеләр генә эшли ала. Чын дуслар тормышыбызны бәхетлерәк итә (Гыйбрәтле сүзләр 17:17).

Изге Язмалардагы киңәш: «Шат йөрәк — яхшы дәва ул» (Гыйбрәтле сүзләр 17:22).

Шатлык, «яхшы дәва» кебек, чирләр белән көрәшүдә ярдәм итә. Ләкин сәламәтлек начар булганда, ничек шатлыклы булырга?

Рәхмәтле булыгыз. Гел авырлыкларыбыз турында гына уйласак, «һәрбер көнебез» начар булыр (Гыйбрәтле сүзләр 15:15). Ләкин Изге Язмаларда «рәхмәтле булыгыз» дип киңәш ителә (Көләсәйлеләргә 3:15). Хәтта кечкенә нәрсәләр өчен рәхмәтле булырга өйрәнегез. Матур кояш баюы, назлы җил, яраткан кешебезнең елмаюы — моның барысы тормышыбызны баета.

Башкаларга игелек кылыгыз. Сәламәтлек начар булганда да, «алуга караганда бирүдә бәхет күбрәк» (Рәсүлләр 20:35). Башкалар безгә кылган игелегебез өчен рәхмәтләрен белдергәндә, бу безне бәхетле итә һәм авырлыкларыбыз турында онытырга ярдәм итә. Башкаларга булышып, без үз-үзебезгә булышабыз.

Изге Язмалардагы киңәш: «Нәрсә мөһимрәк, шуны аера белегез» (Филипиялеләргә 1:10).

Бер-берсе белән аз вакыт үткәргән парлар еш кына бер-берсеннән ераклаша. Шуңа күрә ир белән хатын, үз гаиләсенә җитәрлек вакыт бүлеп куйганда, акыллы эш итә, чөнки гаилә — тормыштагы иң мөһим нәрсәләрнең берсе.

Бергәләп вакыт үткәрегез. Бергә нәрсәнедер эшләргә планлаштырыгыз. «Икәү булу ялгыз булуга караганда яхшырак»,— дип әйтелә Изге Язмаларда (Вәгазьче 4:9). Бергәләп ашарга пешереп, күнегүләр ясап, чәй эчеп, кафега барып я хобби белән шөгыльләнеп була.

Үз яратуыгызны белдерегез. Изге Язмаларда ир белән хатынга бер-берсен яратырга һәм хөрмәт итәргә киңәш ителә (Эфеслеләргә 5:28, 33). Җылы елмаю, назлы кочаклау я кечкенә генә бүләк гаиләгезне бик ныгыта ала. Һәм әлбәттә, ир белән хатын бер-берсенә тугрылык сакларга тиеш (Еврейләргә 13:4).