«Сез мәңге яшәргә теләр идегезме?» дигән сорауга сез нинди җавап бирер идегез? Күпләр «әйе» дип җавап бирердер, ләкин алар бу мөмкин түгел дип уйлый. Аларның әйтүенчә, үлем — табигый нәрсә, һәр кешенең гомере бетә.

Әмма сорауны үзгәртеп: «Сез үләргә әзерме?» — дип сорасалар, җавабыгыз нинди булыр? Күпчелек кеше «юк» дип җавап бирер, мөгаен. Моннан нинди нәтиҗә ясап була? Кешеләрнең кичергән авырлыкларына карамастан яшәргә табигый теләге бар. Аллаһы кешеләргә мәңге яшәү теләген биргән.

Әмма чынбарлыкта кешеләр мәңге яшәми. Нәрсә булган соң? Һәм бу мәсьәләне хәл итәр өчен Аллаһы берәр нәрсә эшләгәнме? Изге Язмаларда күңел җылытырлык җавап бирелә. Анда шулай ук Гайсәнең ни өчен газап чиккәне һәм үлгәне аңлатыла.

Изге Язмалардагы Яратылыш китабының беренче өч бүлегендә язылганча, Аллаһы беренче кешеләр Адәм белән Хауваның мәңге яшәүләрен ниятләгән һәм аларга моның өчен нәрсә эшләргә кирәк булганын әйткән. Анда шулай ук аларның Аллаһыны тыңламаганы һәм мәңгелек яшәү мөмкинлеген югалтканы турында әйтелә. Бу хәбәр шулкадәр ачык һәм гади, кайберәүләр аны хәтта әкият дип саный. Әмма Яратылыш китабында язылганнарның, Инҗилдәге кебек, хак һәм тарихи булуына дәллиләр аз түгел *.

Адәмнең тыңламаучанлыгы нинди нәтиҗәләргә китергән? Изге Язмаларда болай дип әйтелә: «Дөньяга бер кеше [Адәм] аркылы гөнаһ, ә гөнаһ аша үлем үтеп кергән кебек һәм шулай итеп, һәр кеше гөнаһ кылганга, үлем барлык кешеләргә күчкән» (Римлыларга 5:12). Адәм Аллаһыга тыңламаучанлык күрсәтеп гөнаһ кылган. Шулай итеп ул мәңге яшәү мөмкинлеген югалткан һәм ахыр чиктә үлгән. Аның токымнары буларак, без гөнаһны мирас итеп алдык. Шуның аркасында без чирләргә, картлыкка һәм үлемгә дучар булабыз. Бу галимнәрнең фәнни ачышларына туры килә: ата-аналардан балаларга кайбер үзенчәлекләр күчә. Әмма бу мәсьәләне хәл итәр өчен Аллаһы нәрсә дә булса эшләгәнме?

Әйе, Адәм үз токымнарын мәңге яшәү мөмкинлегеннән мәхрүм иткән, әмма Аллаһы, чаралар күреп, алар өчен бу мөмкинлекне йолып алган, ягъни кире сатып алган. Ул нәрсә эшләгән?

Инҗилдә болай диелә: «Гөнаһ өчен түләү — үлем» (Римлыларга 6:23). Димәк, үлем гөнаһның нәтиҗәсе булып тора. Адәм гөнаһ кылган, шуңа күрә үлгән. Без дә гөнаһ кылабыз, һәм гөнаһ өчен түлибез — үлемгә дучар булабыз. Әмма гөнаһлы булып тууыбызда безнең гаебебез юк. Шуңа күрә Аллаһы яратудан чыгып үз Улы Гайсәне, безнең хакка гөнаһ өчен түләү бирсен дип, җибәргән. Бу ничек мөмкин булган?

Бер кешенең — камил Адәмнең тыңламаучанлыгы аркасында дөньяга гөнаһ белән үлем үтеп кергәнгә, безне шул йөктән арындырыр өчен, башка бер камил кешенең үз үлеменә кадәр тыңлаучан булып калуы кирәк булган. Изге Язмаларда бу фикер болай дип аңлатыла: «Бер кешенең тыңламаучанлыгы аша күпләр гөнаһлы булып киткән кебек, бер кешенең тыңлаучанлыгы аша да күпләр тәкъва булачак» (Римлыларга 5:19). Шул тыңлаучан «бер кеше» Гайсә булган. Ул күкне калдырып, камил кеше булып туган * һәм соңрак безнең хакка үлгән. Моның ярдәмендә без Аллаһы күзендә тәкъва булып санала алабыз, безнең шулай ук мәңге яшәү өмете бар.

Әмма моның барысы өчен Гайсәгә чыннан да үләргә кирәк булганмы? Әллә Чиксез Кодрәтле Аллаһы Адәмнең токымнарына болай гына мәңге яшәргә рөхсәт итә алмаганмы? Әлбәттә, аның андый хакимлеге булган. Ләкин алай эш итеп ул үзе чыгарган канунны (гөнаһ өчен түләү — үлем дигән канунны) бозган булыр иде. Бу канун — үтәми калып я, кирәксә, читләтеп үтеп булган әһәмиятсез бер кагыйдә түгел. Аны бозу чын гаделлекнең нигезен какшатыр иде (Зәбур 37:28).

Аллаһы бу очракта гаделлекне бозган булса, кешеләр, ул башка очракларда да шулай эш итмәсме, дип шикләнер иде. Мәсәлән, мондый сораулар туа  алыр иде: Адәм токымнарының кайсылары мәңге яшәячәк икәнен хәл иткәндә ул гаделлек буенча эш итәрме? Ул үз вәгъдәләрен үтәячәк дип ышанып буламы? Аллаһының кешеләрне гөнаһ белән үлемнән коткарыр өчен гаделлек буенча эш итүе безне аның һәрвакыт шулай эш итәчәгенә ышандыра.

Гайсә үз тормышын корбан итеп китергәнгә, Аллаһы кешеләргә җирдәге оҗмахта мәңге яшәр өчен юл ачкан. Гайсәнең Яхъя 3:16 да язылган сүзләренә игътибар итик: «Аллаһы бит дөньяны шулкадәр ярата ки, Улына иман итүче беркем һәлак булмасын өчен, ә мәңгелек тормыш алсын өчен, үзенең бердәнбер Улын бирде». Шулай итеп, Гайсәнең үлемендә Аллаһының үзгәрмәс гаделлеге һәм, иң элек, кешеләргә карата бөек мәхәббәте чагыла.

Әмма ни өчен Гайсәгә Инҗилдә тасвирланган зур газаплар чигеп үләргә кирәк булган соң? Көчле сынауларда тугры калып, Гайсә Иблиснең кешеләр сынаулар кичергәндә Аллаһыга тугры калмаячак дигән гаепләвенә бер тапкыр һәм мәңгегә җавап биргән (Әюп 2:4, 5). Шайтан камил Адәмне гөнаһ кылырга этәргәннән соң, андый гаепләү нигезле булып күренгәндер. Әмма Гайсә — Адәм кебек камил булган кеше — коточкыч газапларга карамастан тыңлаучан булып калган (1 Көринтлеләргә 15:45). Шулай итеп Гайсә шуны исбат иткән: Адәм дә, теләгән булса, Аллаһыга тыңлаучан булып кала алыр иде. Сынауларда нык калып, Гайсә безгә үрнәк калдырган (1 Петер 2:21). Аллаһы үз Улын камил тыңлаучанлык күрсәткәне өчен күктәге үлемсез тормыш белән бүләкләгән.

Гайсә безнең өчен үз тормышын биргән. Шулай итеп мәңгелек тормышка юл ачылган. Сез мәңге яшәргә телисезме? Гайсә моның өчен нәрсә эшләргә кирәк икәнлеген әйткән: «Мәңгелек тормышка ия булыр өчен, синең турында — бердәнбер хак Аллаһы турында һәм син җибәргән Гайсә Мәсих турында белем алырга кирәк» (Яхъя 17:3).

Шушы брошюраны нәшер итүчеләр сезне хак Аллаһы Йәһвә турында һәм аның Улы Гайсә Мәсих турында күбрәк белем алырга чакыра. Якын тирәдә яшәүче Йәһвә Шаһитләре сезгә ярдәм итәргә шат булыр. Файдалы мәгълүматны шулай ук сайтыбыздан табып була.