2017 ел галимнәрнең аяныч хәбәр игълан итүләре белән башланды. Гыйнвар аенда галимнәрнең бер төркеме дөньяның иң зур афәткә тагы да якынлашканын белдерде. Кешелекнең дөньякүләм афәткә никадәр якын икәнен күрсәтер өчен, галимнәр символик Кыямәт көне сәгатен кулланган: аның минут телен 30 секундка алга күчергән. Кыямәт көне сәгате хәзер төн уртасына нибары ике ярым минут калганын күрсәтә. Аның 60 тан артык ел эчендә дөньякүләм афәткә шулкадәр якын вакыт күрсәткәне булмаган!

2018 елда галимнәр без белгән дөньяның бетүе никадәр якын икәнен тагын карап чыгарга планлаштыра. Кыямәт көне сәгате һаман да котылгысыз һәм моңарчы булмаган афәтне күрсәтеп торырмы? Сез ничек уйлыйсыз? Дөнья хәле өметсезме? Бу сорауга җавап табу кыендыр. Хәтта белгечләрнең дә фикерләре капма-каршы бит. Кайберәүләр котылгысыз кыямәт көненә ышанмый.

Чынлыкта, миллионлаган кеше якты киләчәккә ышана. Алар кешелекнең һәм җирнең мәңге булачагын һәм тормышның яхшырачагын күрсәтүче дәлил бар дип әйтә. Бу дәлил ышанычлымы? Дөнья хәле өметсезме?