Җыелыштан чыгарылган берәр кешенең Патшалык Залында кайда утырганы өчен башкаларга борчыласы юк. «Күзәтү манарасы»нда мәсихче әти-әниләргә үзләре белән бергә әле дә яшәгән җыелыштан чыгарылган балаларын, алар моны урынлы дип тапса, рухи яктан кайгыртып торырга кирәк дип күп тапкырлар киңәш ителгән иде. «Күзәтү манарасы» 2001 ел, 1 декабрь, 26—29 нчы битләрдә язылганча, әти-әниләр җыелыштан чыгарылган балигъ булмаган балалары белән хәтта Изге Язмаларны өйрәнә ала. Әти-әниләр шулай эшләсә, балаларының дөрес юлга кайтуы ихтимал.

Патшалык Залында утыру урыны турында әйткәндә, җыелыштан чыгарылган бала әти-әнисе янында беркемгә комачауламыйча гына утырып торса да була. Җыелыштан чыгарылган кешеләр Залның соңгы рәтләрендә утырырга тиеш дигән кагыйдә юк. Шуңа күрә җыелыштан чыгарылган бала, әти-әнисе кайда гына утырмасын, алар янына утыра ала. Андый очракларда беркем дә моңа каршы чыгарга тиеш түгел. Әти-әниләр, балаларын рухи яктан кайгыртканга, ул җыелыш очрашуларында игътибар белән тыңлыймы, юкмы икәнен күзәтер. Игътибарсыз калдырылган балага караганда әти-әнисе белән янәшә утырган бала очрашудан күбрәк файда ала.

Ә әти-әнисеннән аерым яши башлаган җыелыштан чыгарылган бала турында нәрсә әйтеп була? Ул әти-әнисе белән утыра аламы? Үткән елларда басмаларыбызда мәсихчеләргә үзләре белән инде яшәмәгән җыелыштан чыгарылган берәр туганы белән аралашуга кагылышлы киңәшләр бирелгән иде *. Ләкин җыелыштан чыгарылган баланың очрашу вакытында гаиләдәгеләре янында тыныч кына утыруы һәм аларның җитди сәбәп булмый торып аның белән аралашуы ике төрле нәрсә. Җыелыштан чыгарылган баланың гаиләсе үзен аның белән дөрес тота икән һәм андый очракларга кагылышлы Изге Язмалардагы киңәшләргә колак сала икән, бу баланың кайда утырганы өчен, күрәсең, борчыласы юк (1 Көр. 5:11, 13; 2 Яхъя 11).

Җыелыштан чыгарылган кеше гаиләдәгеләрнең берәрсе янында я башка берәр кардәшнең янында утырганда үзен дөрес тотса, беркем дә аның кайда утырганы өчен борчылырга тиеш түгел. һәрбер кешегә очрашу вакытында кайда утырырга икәнен әйтеп торсак, шартларга карап төрле авырлыклар туарга мөмкин. Җыелыш очрашуларына йөргән кешеләр, шул исәптән җыелыштан чыгарылган кешенең тугры гаиләдәгеләре, җыелыштан чыгарылуга кагылышлы Изге Язмалардагы принциплар буенча эш итә икән, һәм җыелыштан чыгарылган кешенең кайсы урында утыруы кардәшләр өчен киртә булып тормый икән, очрашуларыбызга килүчеләрнең кайда утырачагы өчен борчыласы юк.