13  Йәһвә сүзен дәвам итеп Муса белән Һарунга болай диде: ² «Әгәр берәр кешенең тән тиресендә шеш, кутыр я тимгел барлыкка килеп, моның махау*+ чиренә әйләнү ихтималы булса, ул кешене Һарун руханига я рухани булып хезмәт иткән аның улларының берсенә китерергә кирәк.+ ³ Рухани аның тәнендәге җәрәхәтне тикшерсен. Әгәр андагы йон агарган булса һәм җәрәхәт тирәнгә киткән кебек күренсә, бу — махау авыруы. Рухани җәрәхәтне тикшереп, кешене нәҗес дип игълан итсен. ⁴ Әмма тәнендәге тимгел ак булып, карап торуга тире эченә тирәнгә китмәгән булса һәм андагы йон агармаган булса, рухани ул кешене башкалардан җиде көнгә аерып куйсын.+ ⁵ Җиденче көнне рухани аны янә тикшерсен. Әгәр җәрәхәт үзгәрмәгән кебек тоелса һәм тәненә таралмаган булса, рухани аны башкалардан тагын җиде көнгә аерып куйсын. ⁶ Рухани аны җиденче көнне тагын тикшерсен. Әгәр җәрәхәт төсен югалткан һәм тәненә таралмаган икән, рухани аны чиста дип игълан итсен.+ Бу кутыр гына булган. Кеше киемнәрен юсын һәм чиста булыр. ⁷ Әмма ул руханига күренеп, чиста дип игълан ителгәннән соң, кутыр* тәненә таралса, ул кабат руханига барып күренсен. ⁸ Рухани кутырны тикшерер һәм ул тәненә таралган булса, рухани кешене нәҗес дип игълан итсен. Бу — махау.+ ⁹ Әгәр кеше махау белән авырып китсә, аны руханига китерсеннәр. ¹⁰ Рухани аны тикшерсен.+ Әгәр аның тәнендә ак шеш булса, андагы йон агарган һәм шештә ачык яра+ булса, ¹¹ бу — аның тәнендәге күптәнге махау чире. Рухани аны нәҗес дип игълан итсен. Ул аны, күзәтер өчен, аерып куймасын,+ чөнки ул нәҗес. ¹² Ә махау авыруы бөтен тәненә чыгып, кешене, рухани күрә алган кадәр, баштан алып аягына кадәр капласа, ¹³ һәм рухани, аны тикшереп, махау аның бар тәнен каплаганын күрсә, ул авыру кешене чиста* дип игълан итсен. Аның бар тәне агарган, ул кеше чиста. ¹⁴ Әмма тәнендә ачык яра барлыкка килсә, ул нәҗес булыр. ¹⁵ Рухани, ачык яраны күргәч, кешене нәҗес дип игълан итсен.+ Ачык яра нәҗес. Бу — махау.+ ¹⁶ Ләкин ачык яра янә агарса, ул руханига килсен. ¹⁷ Рухани аны тикшерсен,+ һәм яра агарган булса, рухани бу авыру кешене чиста дип игълан итсен. Ул чиста. ¹⁸ Әгәр кеше тәненә чуан чыгып төзәлсә, ¹⁹ һәм аның урынында ак шеш я кызгылт-ак тимгел хасил булса, ул руханига күренсен. ²⁰ Рухани тимгелне тикшерсен.+ Әгәр ул тирәнгә киткән кебек күренсә һәм андагы йон агарган булса, рухани кешене нәҗес дип игълан итсен. Бу — чуан урынына чыккан махау авыруы. ²¹ Ләкин рухани тимгелне тикшерсә һәм анда ак йон булмаса, тимгел тире эченә тирәнгә китмәгән һәм төсен югалткан булса, рухани ул кешене башкалардан җиде көнгә аерып куйсын.+ ²² Тимгел тәнгә таралса, рухани ул кешене нәҗес дип игълан итсен. Бу — авыру. ²³ Ләкин тимгел үз урынында калып таралмаса, бу чуан аркасында килеп чыккан ялкынсыну гына. Рухани бу кешене чиста дип игълан итсен.+ ²⁴ Әгәр кемдер берәр җирен утта пешерсә һәм шундагы ачык ярага кызгылт-ак я ак тимгел чыкса, ²⁵ рухани ул тимгелне тикшерсен. Андагы йон агарган булса һәм ул тирәнгә киткән кебек күренсә, бу — пешкән урында килеп чыккан махау. Рухани ул кешене нәҗес дип игълан итсен. Бу — махау авыруы. ²⁶ Әмма рухани тимгелне тикшерсә һәм анда ак йон булмаса, тимгел тире эченә тирәнгә китмәгән һәм төсен югалткан булса, рухани ул кешене башкалардан җиде көнгә аерып куйсын.+ ²⁷ Рухани аны җиденче көнне тагын тикшерсен, һәм тимгел тәненә таралган икән, рухани аны нәҗес дип игълан итсен. Бу — махау авыруы. ²⁸ Әмма тимгел үз урынында калып, тәненә таралмаган һәм төсен югалткан икән, бу — пешкән урынның шешүе генә. Рухани аны чиста дип игълан итсен, чөнки бу — пешкән урынның ялкынсынуы. ²⁹ Әгәр берәр ир-атның я хатын-кызның башында я иягендә җәрәхәт барлыкка килсә, ³⁰ рухани моны тикшерсен.+ Ул тирәнгә киткән кебек күренсә һәм андагы чәч я йон сары һәм нечкә булса, рухани андый кешене нәҗес дип игълан итсен. Бу — баш тиресендә я сакалдагы йогышлы авыру. Бу — баштагы я ияктәге махау. ³¹ Әмма ул тире эченә тирәнгә китмәгән булса һәм анда кара чәч я йон булмаса, рухани авыру кешене башкалардан җиде көнгә аерып куйсын.+ ³² Җиденче көнне рухани зарарланган урынны тикшерсен. Тире авыруы таралмаган икән һәм анда сары чәч я йон үсмәгән һәм карап торуга ул тирәнгә китмәгән икән, ³³ ул кеше чәчен алсын я кырынсын, ләкин зарарланган урынга тимәсен. Аннары рухани авыру кешене башкалардан җиде көнгә аерып куйсын. ³⁴ Җиденче көнне рухани зарарланган урынны янә тикшерсен. Әгәр баш тиресендә я сакалдагы тире авыруы тәнгә таралмаган икән һәм тирәнгә китмәгән икән, рухани кешене чиста дип игълан итәргә тиеш. Ул кеше үз киемнәрен юсын һәм чиста булыр. ³⁵ Әмма ул чиста дип игълан ителгәннән соң тире авыруы тәнгә таралса, ³⁶ рухани кешене тикшерсен. Ул тәненә таралган икән, руханига сары чәч я йон эзлисе юк, ул кеше нәҗес. ³⁷ Әмма, тикшергәч, зарарланган урынның таралмаганы һәм анда кара чәч я йон үскәне ачыкланса, чир беткән. Ул кеше чиста, һәм рухани аны чиста дип игълан итсен.+ ³⁸ Әгәр берәр ир-атның я хатын-кызның тән тиресендә ак тимгелләр чыкса, ³⁹ рухани аларны тикшерсен.+ Тимгелләр тонык ак булса, бу — тәнгә чыккан зыянсыз тимгелләр. Ул кеше чиста. ⁴⁰ Әгәр берәр ир-ат, чәче коелып, пеләш калса, ул чиста. ⁴¹ Әгәр аның маңгай өстендәге чәче коелып, шул җире пеләш калса, ул чиста. ⁴² Әмма аның баш түбәсендәге я маңгай өстендәге пеләшендә кызгылт-ак яра барлыкка килсә, бу — пеләшкә чыккан махау. ⁴³ Рухани бу кешене тикшерсен, һәм аның баш очындагы я маңгай өстендәге пеләшендә булган ярадагы шеш кызгылт-ак булса һәм ул тәндәге махауга охшаса, ⁴⁴ ул кеше махаулы. Ул нәҗес, һәм рухани аны башындагы авыруы аркасында нәҗес дип игълан итсен. ⁴⁵ Махау авыруы булган кешенең киемнәре ертылган, башы тузгыган булсын, һәм ул мыегын каплап: „Нәҗес, нәҗес!“ — дип кычкырсын. ⁴⁶ Авырган бар көннәрендә ул нәҗес булыр. Нәҗес булганга, ул башкалардан аерым яшәсен. Аның яшәү урыны тукталу урыныннан читтә булсын.+ ⁴⁷ Әгәр махау йон я җитен киемгә, ⁴⁸ җитен яки йон тукыманың буй я аркау җебенә яки күнгә я күн әйбергә йокса ⁴⁹ һәм махау аркасында киемгә, күнгә, тукыманың буй я аркау җебенә я күн әйбергә саргылт-яшел я кызгылт тап чыкса, бу — махау билгесе, һәм аны руханига күрсәтергә кирәк. ⁵⁰ Рухани тапны тикшерсен һәм тап чыккан әйберне җиде көнгә аерып куйсын.+ ⁵¹ Ул җиденче көнне тапны тикшерсен. Тап киемгә, тукыманың буй я аркау җебенә я күнгә (бу күн ничек кенә кулланылмасын) таралган икән, бу — йогышлы махау, һәм ул нәҗес.+ ⁵² Махау чыккан киемне, йон я җитен тукыманы я күн әйберне яндырырга кирәк, чөнки бу — йогышлы махау. Ул утта яндырылсын. ⁵³ Әмма рухани тапны тикшерсә һәм тап киемгә, тукыманың буй я аркау җебенә я күн әйбергә таралмаган икән, ⁵⁴ рухани тап чыккан әйберне юарга кушсын һәм аны янә җиде көнгә аерып куйсын. ⁵⁵ Рухани тап төшкән бу әйберне, яхшылап юылганнан соң, тикшерсен. Әгәр карап торуга тап үзгәрмәгән булса, хәтта ул таралмаса да, ул нәҗес. Аны яндыр, чөнки ул эчке я тышкы яктан ашалган. ⁵⁶ Әмма рухани тапны тикшергәч, ул яхшылап юылганнан соң төсен югалткан булса, аны киемнән, күннән я тукымадан ертып алырга кирәк. ⁵⁷ Ләкин тап киемнең башка җиренә, я тукыманың буй я аркау җебенә, я күн әйбергә кабат чыкса, ул тарала бара, һәм тап чыккан әйберне утта яндырырга кирәк.+ ⁵⁸ Ләкин тап юылган киемнән, тукымадан я күн әйбердән юкка чыкса, ул нәрсә икенче мәртәбә юылсын һәм чиста булыр. ⁵⁹ Махау чыккан йон я җитен киемне, тукыманың буй я аркау җебен, күн әйберне чиста я нәҗес дип игълан итәр өчен канун — менә шул».