Маттай 17:1—27

17  Алты көннән соң Гайсә, үзе белән Петерне, Ягъкубны һәм аның бертуганы Яхъяны алып, биек тауга менде.+ 2  Анда алар алдында аның кыяфәте үзгәрде. Аның йөзе кояштай балкып китте, ә киемнәре яктылык кебек ап-ак булды.+ 3  Шунда алар алдында Муса белән Ильяс хасил булды. Алар Гайсә белән сөйләшә иделәр. 4  Һәм Пете́р Гайсәгә: «Хуҗам, монда шундый рәхәт. Каршы булмасаң, мин монда өч чатыр корам: берсен сиңа, берсен Мусага, берсен Ильяска»,— диде. 5  Петер әле сөйләгән вакытта аларны якты бер болыт каплады, һәм болыт эченнән: «Бу минем сөекле Улым, мин аны хуплыйм.+ Аны тыңлагыз»,— дигән тавыш+ ишетелде.+ 6  Моны ишеткәч, шәкертләр йөзтүбән капландылар һәм бик нык курыктылар. 7  Шунда Гайсә алар янына килде дә аларга кагылып: «Торыгыз, курыкмагыз»,— диде. 8  Шәкертләр күтәрелеп караса, Гайсәдән башка беркем дә юк. 9  Таудан төшкәндә, Гайсә аларга: «Адәм Улы үледән терелеп торганчы, бу күренеш турында берәүгә дә сөйләмәгез»,— диде.+ 10  Әмма шәкертләр аңардан: «Ни өчен, алайса, канунчылар башта Ильяс килергә тиеш диләр?» — дип сорадылар.+ 11  Ул аларга мондый җавап бирде: «Ильяс чыннан да киләчәк һәм барын да яңадан торгызачак.+ 12  Ләкин мин сезгә шуны әйтәм: Ильяс инде килде. Аны танымадылар һәм аның белән ни теләсәләр, шуны эшләделәр.+ Адәм Улына да алардан күп газап чигәргә туры киләчәк».+ 13  Шунда шәкертләр аның Чумдыручы Яхъя турында сөйләгәнен аңладылар. 14  Алар халык төркеме янына килгәч,+ Гайсә алдына бер кеше килеп тезләнде һәм болай диде: 15  «Хуҗам, улымны кызганчы, ул эпилептик һәм бик аяныч хәлдә. Ул еш кына әле утка, әле суга егыла.+ 16  Мин аны шәкертләрең янына алып килгән идем дә, алар аны савыктыра алмады». 17  Ул җавап итеп: «И имансыз һәм бозык* буын,+ иманыгыз үссен өчен миңа сезнең белән тагын күпме булырга? Миңа сезне күпме түзеп торырга? Аны минем янга китерегез»,— диде. 18  Шунда Гайсә җенне шелтәләде, һәм җен баладан чыкты. Бала шунда ук савыкты.+ 19  Шуннан соң Гайсә янына шәкертләре, үзләре генә килеп: «Ник без аны куып чыгара алмадык?» — дип сорадылар. 20  Ул аларга: «Иманыгыз зәгыйфь булганга. Сезгә хак сүз әйтәм: иманыгыз горчица орлыгы хәтле генә булса да, сез бу тауга: „Моннан тегендә күч“,— диярсез, һәм ул күчәчәк, һәм сезгә мөмкин булмаган һичнәрсә булмаячак»+,— диде. 21  —— 22  Гайсә үз шәкертләре белән Гәлилә́ядә булганда, аларга болай диде: «Адәм Улы дошманнар кулына тапшырылырга тиеш,+ 23  алар аны үтерәчәкләр, әмма өченче көнне ул терелеп торачак».+ Шунда шәкертләр бик зур кайгыга төште. 24  Алар Кәпернаумга килеп җиткәч, ике драхмалык салым җыючы кешеләр Петер янына килеп: «Остазыгыз ике драхмалык салым түлиме?»+ — дип сорадылар. 25  «Әйе»,— диде Петер. Ул өйгә кергәч, беренче булып сүзне Гайсә башлады һәм: «Шиму́н, син ничек уйлыйсың, җирдәге патшалар салымны я ясакны кемнән түләтәләр? Үз улларыннанмы, я чит кешеләрдәнме?» — дип сорады. 26  Петер: «Чит кешеләрдән»,— диде. Шунда Гайсә аңа болай дип әйтте: «Димәк, угыллар салым түләүдән азат ителә. 27  Әмма безнең турында начар сүз чыкмасын өчен,+ диңгезгә барып кармак сал һәм беренче эләккән балыкны алып, аның авызын ач, һәм анда көмеш тәңкә табарсың. Аны алып, минем өчен дә, үзең өчен дә аларга бир».

Искәрмәләр

^ Яки «үҗәт».

Искәрмәләр

биек тауга: Монда, бәлки, Филипия Кайсариясе янындагы Хәрмун тавы турында сүз барадыр. (Мт 16:13 кә аңлатманы кара.) Аның биеклеге диңгез өсте тигезлегеннән 2 814 м кадәр җитә. Гайсә кыяфәтенең үзгәрүе Хәрмун тавы очларының берсендә булгандыр. (Ә10 кушымт. кара.)

аның кыяфәте үзгәрде: Яки «аның күренеше үзгәрде». Шул ук грек фигыле (метаморфо́о) Рм 12:2 дә очрый.

мин аны хуплыйм: Яки «мин аннан канәгать». (Мт 3:17; 12:18 гә аңлатмаларны кара.)

тавыш: Яхшы хәбәрләрдә сурәтләнгәнчә, кешеләргә Йәһвәнең тавышы өч очракта ишетелгән; бу андый очракларның икенчесе. (Мт 3:17; Ях 12:28 гә аңлатмаларны кара.)

Адәм Улы: Мт 8:20 гә аңлатманы кара.

тезләнде: Борынгы вакытларда Якын Көнчыгышта тезләнү, аеруча дәрәҗәсе югарырак кешеләргә берәр үтенеч белән мөрәҗәгать иткәндә, хөрмәт билгесе дип саналган.

эпилептик: Мт 4:24 кә аңлатманы кара.

Иманыгыз зәгыйфь: Бу грек сүзтезмәсе Мт 6:30; 8:26; 14:31; 16:8; Лк 12:28 дә «иманга зәгыйфь» дип тәрҗемә ителгән төшенчә белән тамырдаш. Гайсәнең үз шәкертләре бөтенләй имансыз булган дип түгел, ә иманнарын ныгытырга кирәк дип әйтәсе килгән. (Мт 6:30; 8:26 га аңлатмаларны кара.)

хак сүз: Мт 5:18 гә аңлатманы кара.

горчица орлыгы хәтле генә: Яки «горчица орлыгыдай кечкенә». (Мт 13:31, 32 гә аңлатмаларны кара.

Кайбер борынгы кулъязмаларда: «Шулай да андый рухларны дога белән һәм ураза тотып кына куып чыгарып була»,— дип язылган. (Мк 9:29 га аңлатманы кара.) Ләкин бу сүзләр борынгырак һәм ышанычлырак кулъязмаларда юк, һәм алар Аллаһы тарафыннан рухландырылган Язмаларның өлеше түгел икәне ачык. (А3 кушымт. кара.)

Кәпернаумга: Мт 4:13 кә аңлатманы кара.

ике драхмалык салым: Сүзгә-сүз «ике драхмалык тәңкә». (Ә14 кушымт. кара.) Салымнар ярдәмендә гыйбадәтханәдә төрле эшләр башкарылган (Чг 30:12—16). Күрәсең, Гайсә көннәрендә һәр җитлеккән яһүд ир кешесе, гореф-гадәт буенча, гыйбадәтханә хакына билгеле бер күләмдә еллык салым түләгән.

угыллар салым түләүдән азат: Гайсә көннәрендә патша гаиләсенең әгъзалары салым түләүдән азат булган.

кармак: «Кармак» дип тәрҗемә ителгән грек сүзе Мәсихче Грек Язмаларында бу урында гына очрый. Ул, күрәсең, җеп очындагы суга салынган җимле кармакны аңлата. Грек Язмаларының башка урыннарында, балыкчы җайланмалары искә алынганда, сүз ятьмә турында бара.

көмеш тәңкә: Сүзгә-сүз «статир». Тетрадрахма булып санала. (Ә14 кушымт. кара.) Ул дүрт драхмага, бер шәкылгә тиң булган; нәкъ шул кадәр акча ике кеше гыйбадәтханә хакына салым түләргә тиеш булган (Чг 30:13).

Медиаматериал

Хәрмун тавы
Хәрмун тавы

Хәрмун тавының биеклеге 2 814 м җитә, һәм аның янында Филипия Кайсариясе урнашкан булган. Бу тау — Израиль тирәсендә иң биек тау. Аның карлы түбәләре су парларын конденсацияләп, мул итеп чык булдыра. Моның ярдәмендә корылык чорында үсемлекләр кибеп бетми (Зб 133:3). Хәрмун тавының эрегән карлары Үрдүн елгасын туендырып торуда төп роль үти. Гайсәнең кыяфәте, бәлки, Хәрмун тавында үзгәргәндер (Мт 17:2).

Хула үзәненнән караганда Хәрмун тавы
Хула үзәненнән караганда Хәрмун тавы

Вәгъдә ителгән җирнең төньяк чигендә урнашкан Хәрмун тавы берничә таудан тора. Аларның иң югарысының биеклеге диңгез өсте тигезлегеннән 2 814 м. Бу таулар Антиливан тау тезмәсенең көньяк өлешен тәшкил итә. Гайсәнең кыяфәте, бәлки, Хәрмун тавында үзгәргәндер.

ИЗГЕ ЯЗМАЛАР. ЯҢА ДӨНЬЯ ТӘРҖЕМӘСЕ (ӨЙРӘНҮ БАСМАСЫ)
Маттай 17
татар
Изге Язмаларны онлайн укыгыз
https://cms-imgp.jw-cdn.org/img/p/1001070103/univ/art/1001070103_univ_sqr_xl.jpg
nwtsty