Римлыларга 11:1—36
11 Шулай итеп, сездән сорыйм: әллә Аллаһы үз халкын кире какканмы?+ Һич тә юк! Мин дә бит Ибраһим токымында,* Биньями́н кабиләсендә туган исраилле.
2 Аллаһы алдан сайлап алган үз халкын кире какмаган.+ Сез Язмада Ильяс пәйгамбәрнең Аллаһыга Исраилдән зарланып әйткән сүзләрен белмисезме әллә?
3 «Йәһвә,* алар синең пәйгамбәрләреңне үтерделәр, корбан китерү урыннарыңны җимерделәр, бер мин генә калдым, һәм алар минем җанымны да алырга җыена».+
4 Ә Аллаһы аңа нәрсә ди? «Мин үзем өчен Бага́л алдында тез чүкмәгән 7 000 кеше калдырдым».+
5 Хәзерге вакытта да Аллаһының юмарт игелеге буенча сайлап алынган калдык+ бар.
6 Ә инде юмарт игелек+ буенча икән, димәк, эшләргә карап түгел.+ Югыйсә юмарт игелек инде юмарт игелек булмас иде.
7 Инде нәрсә әйтик? Исраи́л ихлас эзләгәнен алмады, ә сайланганнар алды.+ Калганнары исә туң күңелле кешеләргә әйләнде.+
8 Шулай дип әйтелгән дә: «Аллаһы аларны тирән рухи йокыга талдырды,+ аларга күрми торган күзләр, ишетми торган колаклар бирде. Бүгенге көнгә кадәр алар шул хәлдә кала».+
9 Давыт та болай ди: «Аларның табыны үзләре өчен тозак, ятьмә, абыну ташы һәм җәза булсын.
10 Күзләре караңгыланып, күрмәс булсын, аркалары гомер буе бөкрәйгән хәлдә булсын».+
11 Шулай булгач, сорыйсым килә: әллә алар абынып, күтәрелмәслек итеп егылганнармы? Һич тә юк! Әмма аларның ялгыш адымнары башка халык кешеләренә котылу китерде һәм, нәтиҗәдә, үзләрендә көнчелек уятты.+
12 Ә инде аларның ялгыш адымнары дөньяны һәм саннарының кимүе башка халык кешеләрен рухи яктан баеткан икән,+ аларның тулы саны тагы да күбрәк рухи байлык китерәчәк!
13 Ә хәзер сезгә, башка халык кешеләренә әйтәм. Мин, башка халыклар рәсүле буларак,+ үз хезмәтемне данлыйм.+
14 Шулай итеп үз халкымнан булган кешеләрдә көнчелек уятып, аларның кайберләрен коткара алырмын дип өметләнәм.
15 Чөнки аларны кире кагу+ дөнья өчен Аллаһы белән татулашу икән, аларның кабул ителүләре үлемнән яшәүгә күчү булмасмы?
16 Әгәр камырдан беренче җимеш итеп алынган өлеш изге икән, бөтен камыры да изге, һәм тамыр изге икән, ботаклар да изге була.
17 Шулай да кайбер ботакларны сындырып, сине, кыргый зәйтүн агачы булсаң да, алар арасына ялгаганнар икән һәм үзең дә зәйтүн агачының сусыл тамырыннан туена башлагансың икән,
18 ботаклар арасында масаеп* торма. Ә инде масаясың* икән,+ шуны истә тот: син тамырны түгел, ә тамыр сине тотып тора.
19 Син исә: «Ботакларны мине ялгар өчен сындырганнар»,— диярсең.+
20 Әйе, дөрес! Аларны иманнары булмаганга сындырганнар,+ ә син иман иткәнгә үз урыныңда торасың.+ Тәкәбберләнмә, киресенчә, сак бул,
21 чөнки Аллаһы агачның үз ботакларын кызганмаган икән, сине дә кызганмас.
22 Шуңа күрә игътибар ит: Аллаһы игелекле дә,+ кырыс та. Ул юлдан язганнарга карата кырыс,+ ә сиңа карата игелекле, әмма моның өчен сиңа аның игелегенә лаеклы булып яшәргә кирәк, юкса үзеңне дә кисеп ташларлар.
23 Әмма юлдан язганнар имансыз булып калмаса, аларны да кире ялгарлар.+ Аллаһы аларны яңадан ялгый ала бит.
24 Чөнки син, кыргый зәйтүн агачыннан киселеп, бакчада үскән зәйтүн агачына табигатькә каршы ялгангансың икән, аның үз ботаклары яңадан үз агачына бигрәк тә ялганган булачак!
25 Кардәшләр, сез үзегезне акыллыга санамасын өчен, мондый изге серне белүегезне телим:+ башка халык кешеләренең тулы саны җыелганга кадәр кайбер исраиллеләр туң күңелле булып калачак,
26 һәм шулай итеп бөтен Исраил+ котылачак. Шулай дип язылган да: «Сионнан коткаручы киләчәк+ һәм Ягъкуб угылларын үзләренең бозык эшләрен ташларга этәрәчәк.
27 Аларның гөнаһларын алып ташлагач,+ алар белән килешүем менә шул булыр».+
28 Әйе, яхшы хәбәрне кире какканга, алар — Аллаһының дошманнары, һәм бу сезгә файда китерә. Әмма Аллаһы аларның кайберләрен, ата-бабаларына вәгъдә биргәнгә, үз дуслары итеп сайлаган.+
29 Чөнки Аллаһы үзенең бүләкләр бирүенә һәм чакыруына үкенмәячәк.
30 Кайчандыр сез Аллаһыга тыңламаучан идегез,+ хәзер исә аларның тыңламаучанлыгы аркасында+ сезгә шәфкать күрсәтелде.+
31 Ә хәзер алар тыңламаучан, һәм шуңа күрә, аларга да шәфкать күрсәтелсен өчен, сезгә шәфкать күрсәтелә.
32 Аллаһы, кешеләрнең барысына шәфкать күрсәтер өчен,+ бар кешеләргә тыңламаучанлык тоткыннары булырга юл куйды.+
33 Аллаһының байлыгы, зирәклеге һәм белеме нинди бөек! Аның хөкемнәре акыл ирешмәслек, аның юллары төшенә алмаслык!
34 Болай дип язылган бит: «Йәһвәнең* уй-фикерләренә кем төшенгән? Я кем аңа киңәшче була ала?»+
35 Я «кем аңа, аны кире кайтарырга тиешле итеп, нәрсә дә булса беренче булып биргән?»+
36 Һәммәсе аңардан, аның аша һәм аның өчен бит. Аңа мәңгегә дан булсын. Амин.
Искәрмәләр
^ Сүзгә-сүз «орлыгында».
^ А5 кушымт. к.
^ Яки «мактанасың».
^ Яки «мактанып».
^ А5 кушымт. к.