Рәсүлләр 26:1—32

26  Шунда Әгри́п+ Паулга: «Сиңа үзеңне яклап сөйләргә рөхсәт ителә»,— диде. Пау́л кулын күтәрде дә сөйли башлады: 2  «Әгрип патша, бүген яһүдләрнең барлык гаепләүләреннән+ мин үземне сезнең алда яклый алам, шуңа күрә үземне бәхетле дип саныйм. 3  Сез яһүдләрнең барлык йолаларын һәм нәрсәләр турында бәхәсләр алып барганнарын бик яхшы беләсез, аеруча шуңа күрә мин куанам һәм мине сабырлык белән тыңлавыгызны үтенәм. 4  Минем яшь чагымнан ук үз халкым арасында һәм Иерусалимда ничек гомер иткәнемне барлык яһүдләр бик яхшы белә.+ 5  Алар инде күптән минем белән таныш һәм, теләсәләр, минем фарисей булып,+ динебезнең иң катгый таләпләре буенча яшәгәнем турында шаһитлек бирә ала.+ 6  Ә хәзер мин Аллаһы ата-бабаларыбызга биргән вәгъдәнең үтәлүенә өметләнгәнем+ өчен хөкем алдында торам. 7  Шул вәгъдәнең тормышка ашуына өмет баглап, безнең 12 кабилә дә көне-төне тырышып Аллаһыга изге хезмәтен башкара. Шул өмет өчен, и патша, яһүдләр мине гаепли дә.+ 8  Ни өчен сез Аллаһының үлеләрне терелтүе ышанмаслык эш дип саныйсыз? 9  Дөресен генә әйткәндә, мин үзем дә бар көчемне куеп насаралы Гайсә исеменә каршы көрәшергә тиешмен дип уйлый идем. 10  Һәм Иерусалимда мин нәкъ шулай эшләдем дә. Өлкән руханилардан вәкаләт алып,+ күп изгеләрне төрмәләргә ташлата идем+ һәм аларны үтерергә ризалыгымны бирә идем. 11  Мин аларны, иманнарыннан ваз кичсеннәр өчен көч куеп, бар синагогаларда еш кына җәзаладым һәм, аларга карата ачуым бик көчле булганлыктан, аларны хәтта башка шәһәрләрдә дә эзәрлекләдем. 12  Бер көнне, өлкән руханиларның кушуы буенча һәм алардан вәкаләт алып, шул эшләрне башкарыр өчен Дәмәшекъкә барганда, 13  көн уртасында, и патша, мин күктән иңгән яктылык күрдем. Ул кояш яктылыгыннан да яктырак иде һәм мине дә, юлдашларымны да чолгап алды.+ 14  Барыбыз да җиргә егылгач, мин бер тавыш ишеттем. Ул миңа еврей телендә: „Шау́л, Шаул, нигә син мине эзәрлеклисең? Мал үз хуҗасының таягына тибенгән кебек тибенеп, үзеңә зыян китерәсең“,— диде. 15  „Әфәнде, син кем?“ — дип сорадым мин. Шунда Хуҗам болай диде: „Мин — син эзәрлекли торган Гайсә. 16  Аякларыңа торып бас. Мин сине хезмәтче итеп куяр өчен, шулай ук хәзер күргәннәреңә һәм мин сиңа киләчәктә үзем турында күрсәтәчәк нәрсәләргә шаһит итәр өчен сиңа күрендем.+ 17  Мин сине бу халыктан коткарырмын. Башка халыклар да, мин сине алар янына җибәргәч,+ сиңа зыян китермәс. 18  Мин сине алар янына аларның күзләрен ачар өчен,+ аларны караңгылыктан+ яктылыкка,+ Шайтан хакимлегеннән+ Аллаһыга таба борыр өчен җибәрәм. Шулай итеп аларның миңа иман итү аша гөнаһлары кичереләчәк+ һәм алар изге ителгәннәр арасында мирас алачак“. 19  Шуңа күрә, Әгрип патша, Гайсәнең күренештә әйткәненә мин буйсындым 20  һәм бу хәбәрне башта Дәмәшекътә,+ аннан соң Иерусалимда,+ бөтен Яһүдия́ җирендә һәм башка халык кешеләренә тараттым. Мин моны алар тәүбә итсеннәр өчен һәм, тәүбә итүләрен күрсәтүче эшләр башкарып, Аллаһыга таба борылсыннар өчен эшләдем.+ 21  Нәкъ шуның аркасында яһүдләр мине гыйбадәтханәдә тотып үтерергә тырышты да.+ 22  Ләкин, Аллаһыдан ярдәм алып, мин бүгенге көнгә кадәр гадиләргә дә, бөекләргә дә шаһитлек бирүемне дәвам итәм. Мин бары тик пәйгамбәрләрнең һәм Мусаның киләчәктә булачак нәрсәләр турында әйткәннәрен генә сөйлим.+ 23  Ә алар, Мәсих газап чигәргә+ һәм, үледән тереләчәк+ беренче зат булып, бу халыкка һәм башка халыкларга яктылыкны игълан итәргә тиеш, дип әйткәннәр иде».+ 24  Ул шулай дип үзен яклаганда, Фисте́ аңа: «Паул, син акылыңнан шашкансың! Зур гыйлемлек сине акылдан яздыра!» — диде. 25  «Юк, мөхтәрәм Фисте,— диде Паул,— мин акылдан шашмадым, мин хак һәм төпле сүзләр сөйлим. 26  Хәер, моның барысы турында патшаның үзенә дә билгеле, шуңа күрә мин аның алдында кыюлык белән сөйли алам. Һәм мин бер дә шикләнмим, боларның берсе дә патшаның игътибарыннан читтә калмады, чөнки алар яшерен эшләнмәде.+ 27  Әгрип патша, пәйгамбәрләргә ышанасызмы? Беләм, ышанасыз». 28  Әмма Әгрип Паулга: «Сине тагын бераз тыңласам, мәсихче булып китәм инде»,— диде. 29  Моңа Паул: «Беразданмы яки соңракмы, сезнең генә түгел, мине бүген тыңлаучы бар кешеләрнең дә үзем кебек, әмма бу богауларсыз, мәсихче булып китүләрен Аллаһыдан үтенеп сорыйм»,— дип җавап кайтарды. 30  Шуннан соң патша, аның белән бергә идарәче, Бәрникә́ һәм башкалар үз урыннарыннан тордылар. 31  Чыгып барганда, алар: «Бу кеше үлемгә хөкем ителерлек яки төрмәгә утыртырлык һичнәрсә эшләми»+,— диештеләр. 32  Әгрип Фистегә хәтта болай диде: «Бу кеше кайса́р алдында хөкем ителергә теләген белдермәгән булса, аны азат итеп тә булыр иде».+

Искәрмәләр

Искәрмәләр

динебезнең: Рс 24:5 кә аңлатманы кара.

Аллаһыга изге хезмәтен башкара: Монда кулланылган грек фигыле латре́уо башлыча хезмәт итүне күрсәтә. Изге Язмаларда кулланылганда, ул Аллаһыга хезмәт итүне аңлата я аңа гыйбадәт кылу белән бәйле хезмәтне (Мт 4:10; Лк 2:37; 4:8; Рс 7:7; Рм 1:9; Фп 3:3; 2Тм 1:3; Ев 9:14; 12:28; Ач 7:15; 22:3), шул исәптән изге чатырда яки гыйбадәтханәдә хезмәт итүне белдерә (Ев 8:5; 9:9; 10:2; 13:10). Шуңа күрә кайбер контекстларда бу сүз «гыйбадәт кылу; табыну» дип тә тәрҗемә ителергә мөмкин. Берничә очракта ул ялган табыну — барлыкка китерелгән нәрсәләргә хезмәт итү я табыну — белән бәйле кулланыла (Рс 7:42; Рм 1:25). Еврей телендәге Мәсихче Грек Язмаларының кайбер тәрҗемәләрендә (Б4 кушымт. Й14—17 дип атала) монда «Йәһвәгә хезмәт итә (гыйбадәт кыла)» дип әйтелә.

насаралы: Мк 10:47 гә аңлатманы кара.

ризалыгымны бирә идем: Сүзгә-сүз «таш ташлый идем», ягъни сайлауда кулланылган таш. Монда кулланылган грек сүзе псе́фос кечкенә ташны белдерә һәм Ач 2:17 дә «таш» дип тәрҗемә ителә. Ташлар судларда хөкем чыгарылганда кулланылган булган. Ак ташлар аклау хөкемен, ә каралары гаепләү хөкемен аңлаткан.

еврей телендә: Ях 5:2 гә аңлатманы кара.

таягына... тибенеп: Андый очлы таяк белән мал куалый торган булганнар (Хк 3:31). «Таякка тибенү» дигән сүзтезмә бу — грек әдәбиятында очрый торган әйтем. Ул тормыштан алынган. Үҗәт үгез таяк белән төртүләргә каршы килеп, таякка тибенә һәм нәтиҗәдә үзенә зыян китерә. Шаул мәсихче булып киткәнче үзен шулайрак тоткан. Гайсәнең шәкертләрен эзәрлекләп, Паул үзенә җитди зыян китерә алган, чөнки мәсихчеләргә Йәһвә Аллаһы булышкан. (Рс 5:38, 39; 1Тм 1:13, 14 белән чагыштыр.) Вг 12:11 дә «көтүче таягы» күчмә мәгънәдә искә алына, һәм тыңлаучыларны киңәш буенча эш итәргә дәртләндерүче зирәкләрнең сүзләрен аңлата.

тәүбә итсеннәр: Монда кулланылган грек сүзе сүзгә-сүз «элекке фикердән кайту» дип тәрҗемә ителергә мөмкин. Бу фикер йөртүне, карашны я ниятне үзгәртү дигәнне аңлата. Бу контекстта «тәүбә итсеннәр» дигән өндәү Аллаһыга таба борылсыннар дигән сүзләр белән бәйле һәм шуңа күрә шуны күрсәтә: кеше Аллаһыга яраклы булыр өчен һәм аның белән мөнәсәбәтләргә ия булыр өчен үзгәрешләр ясарга тиеш. Чын-чынлап тәүбә иткән кеше тәүбә итүен күрсәтүче эшләр башкарырга тиеш. Башка сүзләр белән әйткәндә, аның эшләре фикер йөртүе я карашы чыннан да үзгәргән икәнен күрсәтәчәк. (Мт 3:2, 8; Лк 3:8 гә аңлатмаларны һәм сүзлектән «Тәүбә итү» кара.)

мәсихче: Рс 11:26 га аңлатманы кара.

кайсар: Яки «император». Ул вакытта Рим императоры — Нерон булган. Аның идарәсе б. э. 54 елында башланган һәм б. э. 68 елында, якынча 31 яшендә ул үзенә кул салгач, тәмамланган. Рәсүлләр китабының 25—28 нче бүлекләрендә кайсар турында әйтелгән һәр очракта Нерон күздә тотыла. (Мт 22:17; Рс 17:7 гә аңлатмаларны һәм сүзлекне кара.)

Медиаматериал

ИЗГЕ ЯЗМАЛАР. ЯҢА ДӨНЬЯ ТӘРҖЕМӘСЕ (ӨЙРӘНҮ БАСМАСЫ)
Рәсүлләр 26
татар
Изге Язмаларны онлайн укыгыз
https://cms-imgp.jw-cdn.org/img/p/1001070103/univ/art/1001070103_univ_sqr_xl.jpg
nwtsty