3  Йәһвә Муса белән Синай тавында+ сөйләшкән вакытта Һарун белән Мусаның токымнары мондый иде. ²  Һарун улларының исемнәре: беренчесе Нада́б, шулай ук Абиһу́,+ Илгаза́р+ һәм Итама́р.+ ³  Болар Һарунның руханилар булып хезмәт итәргә билгеләнгән улларының — майланган руханиларның исемнәре.+ ⁴  Әмма Надаб белән Абиһу, Синай чүлендә Йәһвә каршында тиешсез ут китергәндә, Йәһвә алдында үлделәр,+ аларның уллары юк иде. Ә Илгазар+ һәм Итамар+ үз аталары Һарун белән руханилар булып хезмәт итүләрен дәвам иттеләр. ⁵  Йәһвә Мусага болай диде: ⁶  «Үзең белән Ле́ви+ кабиләсен алып килеп, аларны Һарун рухани янына бастыр. Алар аңа ярдәм итсеннәр.+ ⁷  Алар очрашу чатыры янында, бу чатыр белән бәйле хезмәтләрен башкарып, Һарун алдындагы һәм бөтен җәмгыять алдындагы бурычларын үтәсеннәр. ⁸  Алар очрашу чатырының бар кирәк-яракларын кайгыртсын+ һәм чатыр белән бәйле хезмәтләрен башкарып, исраиллеләр алдындагы бурычларын үтәсен.+ ⁹  Һарун белән аның улларына ле́вилеләрне бир. Алар исраиллеләр арасыннан Һарунга хезмәт итәр өчен бирелгән.+ ¹⁰  Һарун белән аның улларын руханилык вазифаларын үтәргә билгелә.+ Моңа хокукы булмаган* берәр кеше изге урынга якынлашса, үтерелсен».+ ¹¹  Йәһвә, сүзен дәвам итеп, Мусага болай диде: ¹²  «Менә, мин исраиллеләр арасыннан аларның бөтен беренче балалары урынына ле́вилеләрне алам,+ һәм алар минеке булыр. ¹³  Чөнки һәр беренче бала минеке.+ Мисыр җирендә һәр беренче баланы һәлак иткән+ көнне мин Исраилдәге кешеләрнең һәм хайваннарның һәр беренче баласын үзем өчен изгеләндердем.+ Алар минеке булырга тиеш. Мин Йәһвә». ¹⁴  Йәһвә Синай чүлендә+ Мусага тагын болай дип әйтте: ¹⁵  «Ле́ви улларын аларның нәселләре һәм гаиләләре буенча исемлеккә керт. Бер айлык һәм аннан олырак яшьтәге һәр ир затын санап чык».+ ¹⁶  Шунда Муса Йәһвәнең боерыгы буенча, нәкъ үзенә кушылганча, аларны исемлеккә кертте. ¹⁷  Ле́ви улларының исемнәре Гирсә́н, Коһа́т һәм Мерари́+ иде. ¹⁸  Гирсәннең уллары: Либни́ һәм Шимгы́й+ иде. Алардан барлыкка килгән гаиләләр аларның исемнәрен йөртә. ¹⁹  Коһатның уллары Амра́м, Исһа́р, Хебру́н һәм Узии́л+ иде. Алардан барлыкка килгән гаиләләр аларның исемнәрен йөртә. ²⁰  Мерариның уллары Маһли́+ һәм Муши́+ иде. Алардан барлыкка килгән гаиләләр аларның исемнәрен йөртә. Бу ле́вилеләрнең үз нәселләре буенча гаиләләре булды. ²¹  Гирсәннән либнилеләр+ гаиләсе һәм шимгыйлылар гаиләсе барлыкка килгән. Болар — гирсәнлеләр гаиләләре. ²²  Аларның исемлеккә кертелгән бер айлык һәм аннан олырак яшьтәге барлык ир затларының саны 7 500 булды.+ ²³  Гирсәнлеләр гаиләләре изге чатыр артында, аның көнбатыш ягында, чатырларын кордылар.+ ²⁴  Гирсәнлеләрнең нәсел башлыгы — Ләи́л улы Ильяса́ф. ²⁵  Очрашу чатырында Гирсән+ уллары кайгыртырга тиеш нәрсәләр шул: чатыр,+ аның төрле япмалары,+ очрашу чатырының керү урынының пәрдәсе,+ ²⁶  ишегалды пәрдәләре,+ чатыр һәм мәзбәх* тирәли булган ишегалдының керү урынындагы ишек пәрдәсе,+ баулар һәм болар белән бәйле бар хезмәт. ²⁷  Коһаттан амрамлылар гаиләсе, исһарлылар гаиләсе, хебрунлылар гаиләсе һәм узииллеләр гаиләсе барлыкка килгән. Болар — коһатлылар+ гаиләләре. ²⁸  Аларның бер айлык һәм аннан олырак яшьтәге барлык ир затларының саны 8 600 булды. Алар изге урынны кайгырту өчен җаваплы.+ ²⁹  Коһат улларының гаиләләре изге чатырның көньяк ягында чатырларын кордылар.+ ³⁰  Коһатлылар гаиләләренең нәсел башлыгы — Узии́л+ улы Илисафа́н. ³¹  Алар килешү сандыгы,+ өстәл,+ шәмдәл,+ мәзбәхләр,+ изге урында хезмәт итәр өчен кирәк-яраклар,+ чаршауны+ кайгыртырга һәм болар белән бәйле бар хезмәтне үтәргә тиеш.+ ³²  Ле́вилеләрнең өлкән башлыгы — Һарун руханиның улы Илгазар.+ Ул изге урынны кайгырту өчен җаваплы кешеләрне күзәтте. ³³  Мераридан маһлилеләр гаиләсе һәм мушилылар гаиләсе барлыкка килгән. Болар — Мерари+ гаиләләре. ³⁴  Аларның исемлеккә кертелгән бер айлык һәм аннан олырак яшьтәге барлык ир затларының саны 6 200 булды.+ ³⁵  Мерари гаиләләренең нәсел башлыгы — Абиһаи́л улы Сурие́л. Алар изге чатырның төньяк ягында чатырларын кордылар.+ ³⁶  Мерари уллары кайгыртырга тиеш нәрсәләр шул: изге чатырның рамнары,+ аның колгалары,+ баганалары,+ ырмаулы нигезләре, бар кирәк-яраклары+ һәм болар белән бәйле бар хезмәт,+ ³⁷  шулай ук ишегалды әйләнәсендәге баганалар, аларның ырмаулы нигезләре,+ казыклары һәм баулары. ³⁸  Изге чатыр алдында, аның көнчыгыш ягында — очрашу чатыры алдында, кояш чыга торган якта — Муса, Һарун һәм Һарунның уллары үз чатырларын кордылар. Алар исраиллеләр хакына үз бурычларын үтәп, изге урын турында кайгыртырга тиеш. Моңа хокукы булмаган* берәр кеше изге урынга якынлашса, ул үтерелсен.+ ³⁹  Гаиләләре буенча исемлеккә кертелгән ле́вилеләрнең бер айлык һәм аннан олырак яшьтәге барлык ир затларының саны 22 000 булды. Муса һәм Һарун аларны Йәһвә кушканча санап чыкты. ⁴⁰  Аннары Йәһвә Мусага болай диде: «Исраиллеләрнең бер айлык һәм аннан олырак яшьтәге барлык беренче булып туган улларының исәбен ал,+ аларны сана һәм аларның исемлеген төзе. ⁴¹  Син минем өчен исраиллеләрнең бөтен беренче балалары урынына ле́вилеләрне алырга+ һәм исраиллеләр малларының беренче булып туган барлык балалары урынына ле́вилеләрнең малларын алырга тиеш.+ Мин Йәһвә». ⁴²  Шунда Муса, нәкъ Йәһвә кушканча, исраиллеләрнең бөтен беренче балаларын исемлеккә кертте. ⁴³  Исраиллеләрнең исемлеккә кертелгән бер айлык һәм аннан олырак яшьтәге барлык беренче улларының саны 22 273 булды. ⁴⁴  Йәһвә, сүзен дәвам итеп, Мусага әйтте: ⁴⁵  «Исраиллеләрнең бөтен беренче балалары урынына ле́вилеләрне ал һәм аларның маллары урынына ле́вилеләрнең малларын ал. Ле́вилеләр минеке булырга тиеш. Мин Йәһвә. ⁴⁶  Исраиллеләрнең беренче балалары ле́вилеләрдән 273 кешегә күбрәк булды.+ Аларны йолып алу максаты белән+ ⁴⁷  һәрберсе өчен изге урынның шәкыле* белән биш шәкыл* ал.+ Бер шәкыл 20 герага* тиң.+ ⁴⁸  Ле́вилеләрдән артыграк булган кешеләр саны өчен йолым итеп алынган акчаны Һарун белән аның улларына бир». ⁴⁹  Шунда Муса ле́вилеләрнең саныннан артыграк булганнарны йолып алу өчен бирелгән йолым акчасын җыеп алды. ⁵⁰  Ул исраиллеләрнең беренче балалары өчен изге урын шәкыле белән 1 365 шәкыл акча алды. ⁵¹  Аннары Муса, Йәһвәнең сүзе буенча, нәкъ Йәһвә үзенә кушканча, йолым итеп бирелгән акчаларны Һарунга һәм аның улларына бирде.