Саннар 36:1—13
36 Йосыф улларының гаиләләреннән Манашше́ улы Маһи́р+ улы Гила́д токымнарының гаилә башлыклары килеп, Муса һәм исраиллеләрнең башлыклары белән сөйләшә башлады.
2 Алар болай диде: «Йәһвә сиңа, безнең хуҗабызга, бу җирне жирәбә салып,+ исраиллеләргә бүлеп бирергә кушты. Шулай ук Йәһвә хуҗабызга безнең туганыбыз Сәлүфхадның мирасын аның кызларына бирергә боерды.+
3 Әгәр алар Исраилнең башка кабиләсеннән булган ир-атларга кияүгә чыкса, бу хатыннарның мирасы да аталарыбызның мирасыннан алынып, аларның булачак ирләре кабиләсенең мирасына кушылыр, һәм шулай итеп ул безгә жирәбә салып билгеләнгән мирастан алыныр.
4 Һәм Исраи́л халкы өчен Азатлык елы+ килгәч, бу хатыннарның мирасы мәңгегә аларның булачак ирләре кабиләсенең мирасына кушылыр. Шулай итеп аларның мирасы аталарыбыз кабиләсенең мирасыннан алыныр».
5 Шунда Муса, Йәһвәнең кушуы буенча, исраиллеләргә болай дип боерды: «Йосыф улларының кабиләсе әйткән сүзләр хак.
6 Йәһвә Сәлүфха́д кызларына мондый әмер бирде: „Алар үзләренә ошаган кешегә кияүгә чыга ала. Әмма алар үз аталары кабиләсе гаиләсеннән берәр кешегә кияүгә чыксын.
7 Исраиллеләрнең бернинди мирасы бер кабиләдән икенчесенә күчмәсен, чөнки исраиллеләр үз ата-бабалары кабиләсенең мирасын сакларга тиеш.
8 Исраиллеләр үз ата-бабаларының мирасын саклый алсын өчен, Исраил кабиләләре арасында мираска ия булган һәр кыз үз атасы кабиләсеннән булган кешегә кияүгә чыксын.+
9 Бернинди мирас бер кабиләдән икенчесенә күчмәсен, чөнки Исраил кабиләләре үз мирасларын сакларга тиеш“».
10 Сәлүфхад кызлары нәкъ Йәһвә Мусага кушканча эшләде.+
11 Шулай итеп, Сәлүфхад кызлары — Махла́, Тирсә́, Һөглә́, Милкә́ һәм Ноа+ — үз аталары туганнарының улларына кияүгә чыкты.
12 Аларның мирасы үз аталарының гаиләсендә калсын өчен, алар Йосыф улы Манашше гаиләләреннән булган ир-атларның хатыннары булып китте.
13 Болар — Йәһвә исраиллеләргә Муса аша Моа́б даласында, Үрдү́н янында, Әрихә́ каршысында биргән әмерләр һәм хөкемнәр.+