Беренче Елъязма 10:1—14
10 Бервакыт филистилеләр Исраилгә каршы сугыш ачты. Исраиллеләр филистилеләрдән качты, ә күпләре Гилбуа́ тавында ятып калды.+
2 Филистилеләр Шау́л белән аның улларын эзгә-эз эзәрлекләп барды. Ахыр чиктә, алар Шаулның уллары Йонафа́н, Абинада́б һәм Малкишуаны+ үтерделәр.
3 Шаулга каршы сугыш көчәйде. Укчыларның угы тиеп, аны җәрәхәтләгәч,+
4 Шаул корал йөртүчесенә: «Кылычыңны ал да мине үтер, югыйсә теге сөннәтләнмәгәннәр килеп, минем белән ерткычларча мөгамәлә итәрләр»*+,— диде. Ләкин корал йөртүчесе, нык курыкканга, аны үтерергә теләмәде. Шулчак Шаул, кылычын алып, кылычына егылды.+
5 Шаулның вафат булуын күргәч, корал йөртүчесе дә үз кылычына егылып үлде.
6 Шулай итеп, Шаул белән аның өч улы һәм аның бөтен йорты берьюлы һәлак булды.+
7 Үзәндәге бөтен исраиллеләр, Исраи́л сугышчыларының качканын, ә Шаул белән улларының вафат булганын күргәч, үз шәһәрләрен калдырып качып киттеләр. Һәм филистилеләр, килеп, шунда урнаштылар.
8 Икенче көнне филистилеләр, үлгәннәрнең әйберләрен алырга килгәч, Гилбуа тавында Шаулның һәм аның улларының үле гәүдәләрен таптылар.+
9 Шунда алар аның өстендәге киемнәрен салдырып, башын чабып өзделәр һәм коралларын алдылар да, үз илаһлары+ һәм халкы белсен өчен, бөтен Филисти́ җире буйлап моның турында хәбәр җибәрделәр.
10 Аннары алар аның кием-коралларын үзләренең илаһы гыйбадәтханәсенә илттеләр, ә башын Даго́н гыйбадәтханәсендә элеп куйдылар.+
11 Гиладтагы бөтен Ябе́ш+ кешеләре исә филистилеләрнең Шаул белән ни эшләгәнен ишеткәч,+
12 бөтен сугышчылар барып, Шаул белән аның улларының гәүдәләрен Ябешкә алып кайттылар һәм аларның сөякләрен Ябештәге бер зур агач төбенә күмеп куйдылар.+ Алар җиде көн буе ураза тотты.
13 Шулай итеп, Шаул Йәһвәнең сүзенә буйсынмавы белән Йәһвәгә карата тугрылыксызлык күрсәткәне өчен,+ шулай ук рухлар чакыручы хатын белән киңәшләшкәне+ өчен һәлак булды.
14 Әйе, Йәһвәдән сорар урынына, ул теге хатын белән киңәшләште. Шуңа күрә Ул аны үлемгә дучар итте һәм патшалык хакимлеген Иша́й улы Давытка бирде.+
Искәрмәләр
^ Яки «мине мәсхәрәләрләр».