Лүк 4:1—44
4 Гайсә, изге рух белән сугарылып, Үрдүн елгасы буеннан чүлгә китте, һәм рух аны чүлдә йөртте.
2 Анда ул кырык көн йөрде, һәм Иблис аны вәсвәсәләде. Кырык көн ул бернәрсә дә ашамады һәм ахырда ачыкты.
3 Шунда Иблис аңа болай диде: «Әгәр дә син Аллаһы улы икән, бу ташка икмәккә әйләнергә куш».
4 Гайсә исә аңа болай дип җавап бирде: «Язылган: „Кеше икмәк белән генә яшәргә тиеш түгел“».
5 Иблис аны биек урынга алып менде һәм аңа бер мизгелдә җиһанның бөтен патшалыкларын күрсәтеп,
6 болай диде: «Мин сиңа бу патшалыклар өстеннән хакимлекне һәм аларның данын бирермен, чөнки бу хакимлек миңа бирелгән, һәм мин аны кемгә теләсәм, шуңа бирәм.
7 Шуңа күрә, әгәр миңа бер табынсаң, боларның барысы синеке булачак».
8 Гайсә исә аңа болай дип җавап бирде: «„Йәһвә Аллаһыңа табын, аңа гына изге хезмәт башкар“,— дип язылган».
9 Аннары Иблис аны Иерусалимга китерде һәм гыйбадәтханә стенасының өстенә бастырып, аңа болай диде: «Әгәр дә син Аллаһы улы икән, шушы урыннан аска ташлан,
10 чөнки: „Ул үз фәрештәләренә сине сакларга боерыр“
11 һәм: „Алар сине, аякларың беркайчан да ташка бәрелмәсен өчен, кулларына күтәреп алып барачаклар“,— дип язылган».
12 Гайсә исә аңа болай дип җавап бирде: «„Йәһвә Аллаһыңны сынама“,— дип әйтелгән».
13 Иблис, вәсвәсәләвен тәмамлагач, аның яныннан китте һәм башка бер уңайлы вакыт көтә башлады.
14 Гайсә рухның кодрәте белән сугарылып Гәлиләягә кайтты. Бөтен тирә-яктагы кешеләр аның турында яхшы хәбәр тарата башладылар.
15 Ул аларның синагогаларында өйрәтте, һәм барысы аның турында мактап сөйләде.
16 Гайсә үзе үскән шәһәргә, Насарага килде һәм, гадәттәгечә, Шимбә көнне синагогага кереп, укырга дип торып басты.
17 Аңа Ишагыйя́ пәйгамбәр төргәген бирделәр, һәм ул төргәкне ачып мондый сүзләр язылган урынны тапты:
18 «Йәһвә миңа үз рухын бирде, чөнки ул мине ярлыларга яхшы хәбәрне игълан итәр өчен майлады, әсирләргә азатлык турында һәм сукырларга күзләре ачылачагы турында вәгазьләр өчен, ә җәберләнгәннәрне иреккә чыгарыр өчен,
19 шулай ук Йәһвәнең хуплау вакыты турында вәгазьләр өчен җибәрде».
20 Шуннан соң Гайсә, төргәкне кире төреп, аны хезмәтчегә бирде дә, утырды. Синагогадагы бар кеше аңа текәлеп карап тора иде.
21 Шунда ул аларга: «Сез әле генә ишеткән Язма өзеге бүген үтәлде»,— дип әйтте.
22 Барысы да Гайсә турында хуплап сөйләде һәм аның ягымлы сүзләренә таң калып: «Әллә ул Йосыф улы түгелме?» — диеште.
23 Гайсә моңа болай диде: «Әлбәттә, сез миңа карата: „Табиб, үз-үзеңне дәвала“,— дигән мәкальне кулланырсыз һәм: „Без Кәпернаумда булган эшләр турында ишеткән идек, монда да, үз туган җиреңдә, шундый ук эшләр башкар“,— дип әйтерсез».
24 Әмма ул аларга болай диде: «Сезгә хак сүз әйтәм: бер пәйгамбәрне дә үз илендә кабул итмиләр.
25 Мәсәлән, Илья́с көннәрендә күкләр өч ел ярым ябылып яңгыр яумады, һәм бөтен шул җирдә зур ачлык булды. Ул вакытта Исраилдә күп кенә тол хатын яши иде,
26 шулай да Ильяс аларның берсенә дә җибәрелмәде, ә Сидон җирендәге Саре́пт шәһәрендә яшәүче бер тол хатын янына гына җибәрелде.
27 Шулай ук Илиша́ пәйгамбәр көннәрендә Исраилдә махау авырулылар күп булса да, аларның берсе дә чистарынмады. Бары тик сурияле Наама́н гына чистарынды».
28 Моны ишеткәч, синагогадагы бар кешенең ачуы чыкты.
29 Алар торып бастылар да, Гайсәне шәһәрдән алып чыгып киттеләр. Алар аны, төртеп төшерер өчен, шәһәр салынган тауның кырыена алып килделәр.
30 Әмма Гайсә, алар арасыннан үтеп, үз юлы белән китте.
31 Шуннан соң ул юл буйлап Гәлиләянең Кәпернаум шәһәренә төште һәм Шимбә көнне халыкны өйрәтә башлады.
32 Алар аның өйрәтүенә хәйран калдылар, чөнки ул хакимлеккә ия кеше кебек сөйли иде.
33 Синагогада җенле, шакшы рухлы, бер кеше бар иде, һәм ул көчле тавыш белән:
34 «Насаралы Гайсә, сиңа бездән нәрсә кирәк? Син безне һәлак итәргә килдеңме? Мин синең кем икәнеңне бик яхшы беләм. Син — Аллаһының Изгесе»,— дип әйтте.
35 Әмма Гайсә аны шелтәләп: «Дәшмә, чык аңардан!» — диде. Шунда җен теге кешене бар халык алдында җиргә егып, зыян китермичә аңардан чыкты.
36 Барысы да таң калып бер-берсенә: «Нинди көчле сүзләр! Ул җеннәргә хакимлек һәм кодрәт белән боера, һәм алар чыгалар!» — дип әйтә башладылар.
37 Һәм аның хакындагы хәбәр тирә-яктагы җирләргә таралды.
38 Гайсә синагогадан чыккач, Шимунның өенә керде. Шимунның каенанасы кызышып ята иде, һәм Гайсәдән аңа ярдәм итүен үтенделәр.
39 Ул Шимунның каенанасы янына килеп, аңа таба иелде дә, аны кызышуыннан савыктырды. Хатын шундук торып басты һәм аларга хезмәт күрсәтә башлады.
40 Кояш баеп барганда, бар кеше төрле авырулардан газап чигүче якыннарын Гайсә янына алып килделәр. Ул аларның һәрберсе өстенә кулларын куеп, аларны савыктыра башлады.
41 «Син Аллаһы Улы»,— дип кычкыра-кычкыра, күпләрдән җеннәр чыга иде. Ләкин Гайсә аларны шелтәләде һәм аларга сөйләргә рөхсәт итмәде, чөнки алар аның Мәсих булуын белә иделәр.
42 Таң атканнан соң, Гайсә, аннан чыгып, аулак урынга китте. Ләкин күп кенә кеше аны эзли башлады һәм, тапкач, аңардан үзләре белән калуын үтенә башлады.
43 Шунда ул аларга: «Мин башка шәһәрләрдә дә Аллаһы Патшалыгы хакындагы яхшы хәбәрне игълан итәргә тиешмен, чөнки мин шуның өчен җибәрелдем дә»,— диде.
44 Һәм ул Яһүдия́ синагогаларында яхшы хәбәрне вәгазьләп йөрде.
