Лүк 23:1—56
23 Шуннан соң алар барысы да, торып, Гайсәне Пила́т янына алып килделәр.+
2 Алар аны болай дип гаепли башладылар:+ «Без бу кешене халкыбызны юлдан яздыручы дип таптык. Ул кайсарга салым түләүне тыя+ һәм үзен Мәсих, патша дип атый».+
3 Шунда Пилат аңардан: «Яһүдләрнең Патшасы синме?» — дип сорады. «Син үзең моны әйтәсең»,— диде Гайсә.+
4 Шуннан соң Пилат өлкән руханилар белән халыкка: «Мин бу кешене гаепләрлек бер сәбәп тә күрмим»+,— диде.
5 Әмма алар: «Ул бөтен Яһүдиядә өйрәтеп, халыкны котырта. Башта Гәлилә́ядә булган, ә хәзер хәтта монда килгән»,— дип, үз сүзләрендә нык тордылар.
6 Моны ишеткәч, Пилат аның гәлилә́ялеме икәнен сорады.
7 Аның Һиру́д патша идарәсендәге өлкәдән булуын белгәч,+ аны Һируд янына җибәрде. Ул көннәрдә Һируд Иерусалимда иде.
8 Һируд Гайсәне күргәч, бик куанды: ул аның хакында күп ишеткән булган, шуңа күрә күптәннән аны күрәсе килгән,+ һәм ул Гайсә аңа нинди дә булса могҗиза күрсәтер дип өметләнә иде.
9 Шуңа күрә ул аңардан җентекләп сораштыра башлады, ләкин Гайсә җавап кайтармады.+
10 Ә өлкән руханилар белән канунчылар, торып, аны бик каты гаепләде.
11 Һируд һәм аның гаскәриләре Гайсәне кимсеттеләр+ һәм аңардан, аны купшы киемнәргә киендереп, мыскыллап көлделәр,+ шуннан соң ул аны кире Пилат янына җибәрде.
12 Шул көнне Һируд белән Пилат дуслашып китте, ә моңа хәтле алар бер-берсенә дошман иде.
13 Шуннан соң Пилат өлкән руханиларны, башлыкларны һәм халыкны җыеп,
14 аларга болай диде: «Сез миңа бу кешене халыкны фетнәгә котырта дип алып килдегез. Менә мин сезнең алда аңардан сорау алдым, ләкин аны сез әйткән гаепләрнең берсендә дә гаепле дип тапмадым.+
15 Һируд та аңарда бер гаеп тә тапмады, чөнки аны кире безгә җибәрде. Шулай итеп, ул үлем җәзасы бирерлек һичнәрсә эшләмәгән.
16 Шуңа күрә мин аны, җәзалаганнан соң,+ азат итәрмен».
17 *——
18 Әмма алар барысы: «Үтер аны, ә безгә Барабны азат ит!» — дип кычкырдылар.+
19 (Барабны төрмәгә шәһәрдә чуалыш күтәргәне өчен һәм кеше үтергәне өчен утыртканнар иде.)
20 Пилат, Гайсәне азат итәргә теләп, аларга кабат мөрәҗәгать итте.+
21 Шунда тегеләр: «Аны баганага кадакла! Баганага кадакла аны!» — дип кычкыра башладылар.+
22 Пилат аларга өченче мәртәбә болай диде: «Ник? Ул нинди явызлык эшләгән соң? Мин аңарда үлем җәзасы бирерлек һичнәрсә тапмадым, шуңа күрә мин аны, җәзалаганнан соң, азат итәрмен».
23 Ләкин алар, үзсүзлеләнеп, каты тавыш белән аны баганага кадаклап үтерүен таләп итте. Алар шулкадәр каты кычкырганга,+
24 Пилат биреште һәм алар таләп иткән карар чыгарды.
25 Ул халык азат ителүен таләп иткән кешене — чуалыш күтәргән һәм кеше үтергәне өчен төрмәгә утыртылган кешене азат итте, ә Гайсәне аларның ихтыярына тапшырды.
26 Гайсәне алып барганда, авылдан кайтып килүче Кири́нидә туган Шиму́н исемле бер кешене тотып алдылар да җәфалану баганасын* аның җилкәсенә салдылар. Ул аны Гайсә артыннан күтәреп барды.+
27 Аңа ияреп бихисап күп кеше барды. Алар арасында хатын-кызлар да бар иде, алар кайгырып күкрәкләренә суга-суга, аның өчен елый иделәр.
28 Гайсә аларга таба борылып, болай диде: «Иерусалим кызлары, минем өчен еламагыз, туктагыз, үзегез һәм балаларыгыз өчен елагыз,+
29 чөнки кешеләр: „Балага узмаган, бала тудырмаган һәм бала имезмәгән хатын-кызлар бәхетле!“ — дип әйтәчәк көннәр килер.+
30 Шунда кешеләр тауларга: „Безнең өскә авып, безне каплагыз!“ һәм калкулыкларга: „Безне каплагыз!“ — дип әйтә башлар.+
31 Яшел агач белән шулай эшлиләр икән, ул корыгач нәрсә булыр?»
32 Гайсә белән бергә җәзалап үтерер өчен, тагын ике кешене — җинаятьчеләрне алып бардылар.+
33 Алар Баш сөяге+ дип аталган урынга килде. Гайсәне баганага кадакладылар. Җинаятьчеләрнең берсе аның уң ягындагы баганада, ә икенчесе сул ягындагы баганада иде.+
34 Әмма Гайсә: «Әти, кичер аларны, чөнки нәрсә эшләгәннәрен белмиләр»,— диде. Аның киемнәрен бүләр өчен, жирәбә салдылар.+
35 Халык карап басып торды. Ә башлыклар: «Әгәр ул Аллаһының Мәсихе, Сайланганы икән, коткарсын үзен, башкаларны коткарды бит»,— дия-дия Гайсәдән мыскыллап көлделәр.+
36 Хәтта гаскәриләр дә аңардан мыскыллап көлделәр: аның янына килеп ачыган шәраб тәкъдим иттеләр+
37 һәм: «Яһүдләр Патшасы булсаң, коткар үзеңне»,— диделәр.
38 Аның баш өстенә «Бу — яһүдләр Патшасы» дигән язу урнаштырылган иде.+
39 Шунда баганадагы җинаятьчеләрнең берсе, аны хурлап:+ «Син Мәсих түгелме соң? Коткар, алайса, үзеңне дә, безне дә!» — дия башлады.
40 Икенчесе исә аны шелтәләргә тотынды: «Син нәрсә, әллә Аллаһыдан бер дә курыкмыйсыңмы? Син дә бит шундый ук җәзага дучар.
41 Безне гадел хөкем иттеләр, чөнки кылган эшләребезгә карап тиешлесен алдык, ә бу кеше һичбер начарлык кылмады».
42 Шуннан соң ул: «Гайсә, үз Патшалыгыңа килгәч,+ мине исеңә төшер»,— диде.
43 Гайсә аңа: «Хак сүз әйтәм сиңа бүген: син минем белән бергә оҗмахта булачаксың»+,— дип әйтте.
44 Сәгать алтылар* тирәсендә бөтен җир йөзен караңгылык каплап алды, һәм тугызлар* тирәсенә кадәр шулай булды,+
45 чөнки кояш яктылыгы югалды. Шуннан соң гыйбадәтханәнең чаршавы+ урталай ертылды.+
46 Шунда Гайсә каты тавыш белән: «Әти, үз рухымны синең кулыңа тапшырам»+,— дип кычкырды. Моны әйткәннән соң, ул үлде.*+
47 Бу вакыйганы күреп торган йөзбашы: «Бу кеше чыннан да тәкъва булган»,— дип, Аллаһыны данлый башлады.+
48 Моны карарга җыелган бөтен кеше, бу вакыйгаларны күреп, кайгыларыннан күкрәкләренә суга-суга, өйләренә таралыша башлады.
49 Ә аны белгән бар кеше читтәрәк басып тора иде. Анда шулай ук аңа Гәлилә́ядән ияреп килгән хатын-кызлар да бар иде, алар да моңа карап тордылар.+
50 Анда Йосыф исемле бер яхшы, тәкъва кеше бар иде. Ул Киңәшмә әгъзасы иде.+
51 (Ул Киңәшмәнең башка әгъзаларының ниятен һәм эшен хупламады һәм үз тавышын бирмәде.) Йосыф яһүдләрнең Аримафе́й шәһәреннән иде һәм Аллаһы Патшалыгын көтеп яши иде.
52 Ул Пилат янына барып, аңардан Гайсәнең гәүдәсен сорады.
53 Йосыф гәүдәне баганадан төшерде+ дә нәфис җитен тукымага төрде, шуннан соң аны кыяда уеп ясалган төрбәгә салды.+ Моңа кадәр анда һичкем дә салынмаган иде.
54 Ул көн Әзерләнү көне иде.+ Тиздән Шимбә+ көне башланырга тиеш иде.
55 Гәлилә́ядән Гайсә белән бергә килгән хатын-кызлар да барды һәм төрбәгә, шулай ук аның гәүдәсен ничек итеп салганнарын карап тордылар.+
56 Шуннан соң алар, өйләренә кайтып, хуш исле үләннәр һәм хуш исле майлар әзерләде. Шимбә+ көнне алар Канун әмере буенча ял итте.
Искәрмәләр
^ А3 кушымт. к.
^ Ягъни көндезге уникеләр.
^ Ягъни көндезге өчләр.
^ Яки «соңгы сулыш алды».
