Маттай 10:1—42
10 Шуннан соң ул 12 шәкертен чакырып алды да аларга җеннәрне куып чыгарыр өчен һәм кешеләрне һәртөрле авырудан һәм чирдән савыктырыр өчен хакимлек бирде.+
2 Менә шул 12 рәсүлнең исеме:+ беренчесе Шиму́н (аны Пете́р дип тә атыйлар),+ аның бертуганы Әндри́,+ Зебеди́ уллары Ягъкуб белән Яхъя,+
3 Фили́п белән Бартолма́й,+ Тома́с+ һәм салым җыючы Матта́й,+ Алфа́й улы Ягъкуб һәм Фадда́й,
4 Шимун Кәнәни́* һәм Яһүд Искарио́т, ул соңрак Гайсәгә хыянәт итте.+
5 Гайсә шушы 12 не мондый күрсәтмәләр биреп җибәрде:+ «Башка халыкларга алып баручы юлларга чыкмагыз, Сама́риянең шәһәрләренә дә кермәгез,+
6 ә Исраи́л халкының югалган сарыклары янына барыгыз.+
7 Барганда исә, вәгазьләгез һәм: „Күкләр Патшалыгы якынлашты“+,— диегез.
8 Авыруларны савыктырыгыз,+ үлгәннәрне терелтегез, махаулыларны тазартыгыз, җеннәрне куып чыгарыгыз. Бушлай алдыгыз — бушлай бирегез.
9 Билбавыгыздагы янчыкка алтын да, көмеш тә, бакыр тәңкәләр дә алмагыз.+
10 Үзегез белән юлга ризык салынган капчык та, алмаш кием дә, аяк киеме дә, юл таягы да алмагыз,+ чөнки эшче ризыкка лаек.+
11 Берәр шәһәр яки авылга кергәч, анда лаеклы булганнарны табыгыз һәм киткәнгә кадәр анда калыгыз.+
12 Өйгә кергәндә, андагы кешеләрне сәламләгез.
13 Өй лаеклы булса, сез теләгән иминлек анда булсын,+ ә лаеклы булмаса, иминлегегез үзегездә калсын.
14 Сезне берәр җирдә кабул итмәсәләр һәм сүзләрегезне тыңламасалар, шул йорттан яки шәһәрдән чыкканда, аякларыгыздагы тузанны кагып төшерегез.+
15 Сезгә хак сүз әйтәм: Хөкем көнендә Сәдү́м белән Гамура́+ җирләренә шул шәһәргә караганда җиңелрәк булачак.
16 Менә! Мин сезне бүреләр арасына сарыкларны җибәргәндәй җибәрәм, шуңа күрә еланнар кебек сакланучан һәм күгәрченнәр кебек мәкерсез булыгыз.+
17 Кешеләр сезне судка бирерләр+ һәм синагогаларында+ камчыларлар,+ шуңа күрә сак булыгыз.
18 Сез минем шәкертләрем булганга, сезне идарәчеләр белән патшалар алдына китерерләр,+ һәм сез аларга һәм халыкларга минем хакта шаһитлек бирә алырсыз.+
19 Әмма сезне судка тапшырганда, ничек һәм нәрсә сөйләргә дип борчылмагыз, чөнки сезгә ул сәгатьтә кирәкле сүзләр бирелер.+
20 Сез үзегез генә түгел, ә сезнең аша Атагызның рухы да сөйләр.+
21 Туган — туганын, ата — баласын, ә балалар ата-аналарын, аларга каршы чыгып, үлемгә тапшырыр.+
22 Сез минем шәкертләрем булганга, барысы да сезне нәфрәт итәр,+ ләкин ахырга кадәр нык калган кеше котылыр.+
23 Алар сезне бер шәһәрдә эзәрлекли башласалар, башкасына качыгыз,+ чөнки сезгә хак сүз әйтәм: Адәм Улы сез Исраилнең барлык шәһәрләрен әйләнеп чыкканчы килер.
24 Шәкерт — остазыннан, ә хезмәтче хуҗасыннан өстен булмый.+
25 Шәкерт — остазы, ә хезмәтче хуҗасы кебек булса, шул җитә.+ Йорт хуҗасын Билзибу́л*+ дип атаганнар икән, һичшиксез, өйдәгеләрен дә шулай дип атарлар!
26 Шуңа күрә алардан курыкмагыз, чөнки ачыкланмый калачак яшерен һичнәрсә юк һәм беленми калачак серле һичнәрсә юк.+
27 Мин сезгә караңгылыкта сөйләгәнне яктылыкта сөйләгез һәм пышылдап әйтелгәнне өй түбәләреннән вәгазьләгез.+
28 Тәнне үтереп тә, җанны* үтерә алмаучылардан курыкмагыз,+ ә Гәһәннәдә* җанны да, тәнне дә һәлак итә алучыдан куркыгыз.+
29 Ике чыпчык бер тиенгә* сатыла түгелме соң? Шулай да аларның берсе генә булса да җиргә төшсә, күктәге Атагыз моны белеп торачак.+
30 Ә сезнең башыгыздагы һәр чәч бөртеге дә саналган бит.
31 Шуңа күрә курыкмагыз. Сез күп чыпчыкларга караганда кадерлерәк.+
32 Кешеләр алдында мине таныган+ һәркемне мин дә күктәге Атам алдында танырмын.+
33 Ә кешеләр алдында миннән ваз кичүче һәркемнән мин дә күктәге Атам алдында ваз кичәрмен.+
34 Мине җиргә тынычлык китерергә килде дип уйламагыз. Мин тынычлык түгел, ә кылыч китерергә дип килдем.+
35 Чөнки мин аерырга дип килдем: улы — атасына каршы, кызы — анасына каршы, килен каенанасына каршы булыр.+
36 Кеше өчен өйдәгеләре дошман булыр.
37 Атасын яки анасын миңа караганда күбрәк яратучы кеше миңа лаек түгел. Улын яки кызын миңа караганда күбрәк яратучы кеше миңа лаек түгел.+
38 Үз җәфалану баганасын* алып, миңа ияреп барырга теләмәгән кеше миңа лаек түгел.+
39 Җанын* саклап калырга тырышучы аны югалтыр, ә җанын* минем хакка югалтучы аны саклап калыр.+
40 Сезне кабул итүче мине дә кабул итә, ә мине кабул итүче мине Җибәрүчене дә кабул итә.+
41 Пәйгамбәрне пәйгамбәр булганы өчен кабул итүче, пәйгамбәр әҗерен алыр,+ ә тәкъваны тәкъва булганы өчен кабул итүче, тәкъва кеше әҗерен алыр.
42 Сезгә хак сүз әйтәм: шушы кечеләрнең берсенә шәкерт булганы өчен эчәргә бер чынаяк салкын су булса да бирүче үз әҗерен һичшиксез алачак».+
Искәрмәләр
^ Яки «ашкынучан».
^ Шайтанга карата кулланыла торган исем. Җеннәрнең мирзасы я идарәчесе.
^ Яки «тормышны», ягъни яшәүгә өметне.
^ Сүзгә-сүз «бер ассарийга». Ә14 кушымт. к.
^ Яки «Тормышын».
^ Яки «тормышын».
