Яхъя 19:1—42
19 Шуннан соң Пила́т Гайсәне алып китеп камчыларга кушты.+
2 Гаскәриләр аның башына чәнечкеле үсемлектән үрелгән таҗ, ә өстенә кызгылт-шәмәхә төстәге өс киеме кидерделәр.+
3 Аннан соң алар, аның янына килеп: «Исәнме,* яһүдләр Патшасы!» — дия-дия, яңакларына суктылар.+
4 Шунда Пилат, кабат халык янына чыкты да: «Менә мин аны гаепләрлек бер сәбәп тә күрмим. Сез моны белсен өчен, аны сезнең янга чыгарам»,— диде.+
5 Шуннан соң башына чәнечкеле үсемлектән таҗ, ә өстенә кызгылт-шәмәхә төстәге өс киеме кигән Гайсә чыкты, һәм Пилат аларга: «Менә ул кеше!» — дип әйтте.
6 Ләкин өлкән руханилар һәм сакчылар, аны күргәч: «Аны баганага кадакла! Аны баганага кадакла!»+ — дип кычкырдылар. Пилат аларга: «Аны алыгыз да үзегез кадаклагыз, чөнки мин аңарда бернинди гаеп тапмыйм»,— диде.+
7 Моңа яһүдләр: «Безнең кануныбыз бар, һәм канун буенча ул үләргә тиеш,+ чөнки ул үзен Аллаһы улы дип атый»+,— диделәр.
8 Бу сүзләрне ишеткәч, Пилат тагы да ныграк куркуга төште,
9 һәм, янә идарәче сараена кереп, Гайсәдән: «Син кайдан?» — дип сорады. Әмма Гайсә аңа җавап бирмәде.+
10 Шунда Пилат: «Минем белән сөйләшмисеңме? Сине азат итәргә дә, баганага кадаклап үтерергә дә хокукым барлыгын әллә белмисеңме?» — диде.
11 Гайсә аңа мондый җавап бирде: «Сиңа югарыдан бирелгән булмаса, минем өстән һичбер хакимлегең булмас иде. Шуңа күрә мине сиңа тапшырган кешенең гөнаһы синекеннән зуррак».
12 Шуңа күрә Пилат аны азат итү әмәлен табарга тырышты. Ләкин яһүдләр: «Аны азат итсәң, син кайсарга* дус түгел. Үз-үзен патша итүче һәркем кайсарга каршы чыга»+,— дип кычкырдылар.
13 Бу сүзләрне ишеткәч, Пилат, Гайсәне алып чыгып, «Таш басма», ә еврейчә Габата́ дип аталган җирдәге хөкем итү урынына барып утырды.
14 Бу Паса́х бәйрәменә Әзерләнү көне иде.+ Сәгать алтылар* тирәсе иде. Шунда Пилат яһүдләргә: «Менә сезнең патшагыз!» — диде.
15 Ә алар: «Үтер аны! Үтер! Аны баганага кадакла!» — дип кычкырдылар. Пилат алардан: «Патшагызны кадаклыйммы?» — дип сорады. «Кайсардан башка патшабыз юк»,— диделәр өлкән руханилар.
16 Шунда Пилат аны баганага кадакларга кушты.+
Алар Гайсәне алып киттеләр.
17 Гайсә, үзенең җәфалану баганасын* күтәреп, «Баш Сөяге»,+ ягъни еврейчә Голго́фа,+ дип аталган урынга килеп җитте.
18 Анда аны баганага кадакладылар.+ Аның бер ягындагы баганада бер кеше, икенчесендә икенче кеше бар иде, ә үзе ул уртада иде.+
19 Пилат тактага «Яһүдләр Патшасы насаралы Гайсә» дип язды да аны җәфалану баганасы* өстенә урнаштырырга кушты.+
20 Гайсәнең баганага кадакланган урыны шәһәргә якын булганга, ул язуны күп кенә яһүдләр укыды. Ул язу еврейчә, латинча һәм грекча язылган иде.
21 Ә яһүдләрнең өлкән руханилары Пилатка болай диде: «„Яһүдләр Патшасы“ дип түгел, ә ул әйткәнчә, „Мин яһүдләр Патшасы“ дип яз».
22 Пилат: «Нәрсә яздым, шуны яздым инде»,— дип җавап бирде.
23 Ә гаскәриләр, Гайсәне баганага кадаклагач, аның өс киемен алдылар да дүрткә бүлделәр: һәрберсенә бер өлеш чыкты. Алар аның эчке күлмәген дә алдылар, ул җөйсез, бербөтен тукымадан иде.
24 Шуңа күрә алар: «Моны ертмыйк, ә жирәбә салыйк, кемгә чыгар икән»,— диештеләр.+ Бу Язмадагы: «Алар өс киемемне бүлешә, киемем өчен жирәбә сала»+,— дигән сүзләр үтәлсен өчен булды. Гаскәриләр нәкъ шулай эшләде дә.
25 Гайсәнең җәфалану баганасы* янында аның әнисе,+ әнисенең сеңелесе, Кләпәснең хатыны Мәрьям һәм магдалалы Мәрьям басып тора иде.+
26 Гайсә, әнисен һәм шунда басып торган яраткан шәкертен+ күреп, әнисенә: «Әнием, хәзер ул синең улың!» — диде.
27 Аннары шәкерткә: «Менә хәзер ул синең әниең!» — дип әйтте. Шунда шәкерт аны үз өенә алды.
28 Шуннан соң Гайсә, һәрнәрсәнең тормышка ашканын белеп, һәм Язмадагы сүзләр үтәлсен өчен: «Эчәсем килә»+,— диде.
29 Анда бер савыт ачыган шәраб тора иде. Шунда ачыган шәрабка манчылган губканы иссоп* сабагына беркеттеләр дә аның авызына китерделәр.+
30 Гайсә ачыган шәрабны татыгач: «Тормышка ашты!»+ — диде дә, башын иеп, үлде.*+
31 Бу көн Әзерләнү көне+ булганга, яһүдләр гәүдәләрне Шимбә көнгә җәфалану баганасында калдырмас өчен+ (ә ул бөек Шимбә көне иде),+ Пилаттан аларның аякларын сындырып гәүдәләрен алып куюын сорадылар.
32 Шунда гаскәриләр килеп, башта Гайсәнең бер ягындагы, аннан соң икенче ягындагы кешенең аякларын сындырдылар.
33 Әмма Гайсә янына килгәч, аның инде үлгән булуын күреп, аякларын сындырмадылар.
34 Шунда гаскәриләрнең берсе сөңге белән аның кабыргалары арасына чәнчеде.+ Аңардан шунда ук кан катыш су агып чыкты.
35 Моны күргән кеше шаһитлек бирә, һәм аның шаһитлеге хак. Ул хакыйкать сөйләгәнен белә һәм моны сез дә ышансын өчен эшли.+
36 Боларның барысы Язмадагы: «Аның һичбер сөяге сынмас»,— дигән сүзләр үтәлсен өчен булды.+
37 Язманың башка бер урынында: «Алар үзләре чәнчегән адәмгә карап торырлар»,— дип тә язылган.+
38 Шуннан соң яһүдләрдән курыкканга Гайсәнең шәкерте булуын яшереп йөргән аримафейлы Йосыф Пилаттан Гайсәнең гәүдәсен алырга рөхсәт сорады.+ Пилат рөхсәт бирде, һәм Йосыф Гайсәнең гәүдәсен барып алды.+
39 Гайсә янына беренче тапкыр төнлә килеп киткән Никәди́м+ дә килде һәм үзе белән якынча 30 килограмм* ми́рра белән алоэ* катнашмасы* алып килде.+
40 Алар, Гайсәнең гәүдәсен алып, яһүдләрнең күмү йоласы буенча, аны шул хуш исле үләннәр белән бергә җитен кәфенгә төрделәр.+
41 Гайсә баганага кадаклап үтерелгән урында бер бакча, ә бакчада әле беркем салынмаган яңа төрбә бар иде.+
42 Бу көн яһүдләрнең Әзерләнү көне+ булганга һәм төрбә якын урнашканга, Гайсәне шунда салдылар.
Искәрмәләр
^ Яки «Сәламлибез сине».
^ Яки «императорга».
^ Ягъни көндезге уникеләр.
^ Сүзгә-сүз «рухын бирде».
^ Күрәсең, алоэ агачы бүлеп чыгара торган хуш исле матдә, алоэ вера түгел.
^ Я, бәлки, «салынган бер төргәк».
