Әюп 42:1—17
42 Әюп Йәһвәгә болай дип җавап бирде:
2 «Хәзер мин синең бар нәрсәне эшли алганыңны,Һәр ниятеңне үти алганыңны беләм.+
3 Син әйттең: „Кем ул белеме булмый торып, уй-ниятләремне томанлы итә?“+
Әйе, мин аңламыйча сөйләдем шул,Үзем белмәгән, үзем өчен гаҗәеп булган нәрсәләр турында әйттем.+
4 Шулай ук болай дидең: „Тыңла әле, ә мин сөйләрмен.
Мин сорармын, ә син җавап бир“.+
5 Колакларым синең турында ишеткән иде,Әмма хәзер сине күзләрем белән күрәм.
6 Шуңа күрә мин сүзләремне кире алам,*+Тузан һәм көлгә утырып тәүбә итәм».+
7 Йәһвә Әюп белән сөйләшеп бетергәннән соң, теманлы Илифазга Йәһвә болай диде:
«Сиңа һәм ике иптәшеңә+ ачуым кабынды, чөнки сез минем хакта, дөресне сөйләгән хезмәтчем Әюп кебек, дөресне сөйләмәдегез.+
8 Җиде үгез белән җиде сарык тәкәсе алып, хезмәтчем Әюп янына барыгыз һәм үзегез өчен яндыру корбаны китерегез, ә хезмәтчем Әюп сезнең өчен дога кылыр.+ Мин аның үтенечен кабул итеп, сезгә акылсызлыгыгызга карап җәза бирмәячәкмен, сез бит минем хакта, дөресне сөйләгән хезмәтчем Әюп кебек, дөресне сөйләмәдегез».
9 Шунда теманлы Илифа́з, шуахлы Билда́д һәм нагамалы Сәфә́р, китеп, Йәһвә кушканча эш иттеләр. Һәм Йәһвә Әюпнең догасын кабул итте.
10 Әюп үз иптәшләре турында дога кылгач,+ Йәһвә аны бөтен кайгы-хәсрәтеннән азат итте+ һәм аның бар милкен торгызды. Йәһвә аңа элеккегә караганда ике мәртәбә күбрәк мал-мөлкәт бирде.+
11 Аның бөтен абый-энеләре, апа-сеңелләре һәм элеккеге дуслары+ килеп, аның белән бергә йортында ашадылар. Алар аның кайгысын уртаклаштылар һәм Йәһвә рөхсәт иткән бөтен бәла-казалардан соң аны юаттылар. Һәрберсе аңа көмеш акча һәм алтын йөзек бүләк итте.
12 Йәһвә исә Әюп гомеренең соңгы елларын элеккегә караганда күбрәк фатихалады.+ Әюп 14 000 сарыкка, 6 000 дөягә, 1 000 пар эре терлеккә һәм 1 000 ишәккә ия булды.+
13 Аның шулай ук җиде улы һәм өч кызы туды.+
14 Беренче кызын ул Җәмимә́, икенчесен Кәтсия́, өченчесен Керенгәпү́һ дип атады.
15 Бер җирдә дә Әюпнең кызларыдай гүзәл хатын-кызлар юк иде. Абый-энеләренә биргән кебек үк, аталары аларга да мирас бирде.
16 Шуннан соң Әюп тагын 140 ел яшәде һәм үзенең балалары белән оныкларын — дүрт буынны күрде.
17 Әюп бик озак яшәде һәм тормышыннан канәгать булып вафат булды.
Искәрмәләр
^ Яки «үз сүзләремнән баш тартам».
