1 Ишмуил 11:1—15
11 Бер көнне Наха́ш исемле бер амунлы+ Гила́д җирендәге Ябе́ш+ шәһәре каршысына лагерь корып урнашты. Ябештә яшәгән бар кешеләр Нахашка: «Әйдә, килешү төзик, һәм без сиңа хезмәт итәрбез»,— диделәр.
2 Амунлы Нахаш аларга болай диде: «Әйдәгез. Ләкин башта һәрберегезнең уң күзен чокып алсыннар. Мин бөтен Исраилне түбәнсетергә телим».
3 Ябеш өлкәннәре аңа мондый җавап кайтарды: «Безгә җиде көн вакыт бир, һәм без Исраилгә хәбәрчеләр җибәрербез. Безне коткарырлык һичкем булмаса, синең кулыңа бирелербез».
4 Тиздән хәбәрчеләр Шау́л Гибәсенә+ килеп, бу сүзләрне халыкка җиткерде, һәм бөтен халык үкереп елаша башлады.
5 Ул арада Шаул кырдан көтүен алып кайтып килә иде. Ул: «Нәрсә булды? Халык ник елый?» — дип сорады. Һәм аңа Ябеш кешеләренең сүзләрен сөйләп бирделәр.
6 Моны ишетү белән Шаулга Аллаһы рухы иңде,+ һәм аның ачуы купты.
7 Шунда ул ике үгезне алып, аларны кисәкләргә чабып ташлады да, шул кисәкләрне хәбәрчеләр аша Исраилнең бөтен төбәкләренә җибәреп: «Шаул белән Ишмуилга иярмәгән һәркемнең малы белән менә шулай булыр!» — диде. Шунда халыкны Йәһвәдән килгән курку биләп алды, һәм алар бөтенесе бер булып юлга чыкты.
8 Шаул Бәзектә аларның санын исәпләгәч, 300 000 исраилле һәм 30 000 Яһүд кешесе булып чыкты.
9 Килгән хәбәрчеләргә болай диделәр: «Гиладтагы Ябеш кешеләренә әйтегез: „Иртәгә, көннең иң кызу чагында сезгә котылу килер“». Хәбәрчеләр бу сүзләрне Ябеш кешеләренә җиткерде, һәм тегеләре бик сөенде.
10 Шунда Ябеш кешеләре амунлыларга: «Иртәгә без сезнең кулга бирелербез, һәм безнең белән ни теләсәгез, шуны эшләгез»,— диделәр.+
11 Киләсе көнне Шаул кешеләрне өч төркемгә бүлде. Алар таң атканчы* лагерьга үтеп керделәр һәм көндезге кызулыкка кадәр амунлыларны һәлак иттеләр.+ Ә исән калганнары таралып бетте, хәтта икәү бергә калучы да юк иде.
12 Аннары халык Ишмуилдан болай дип сорады: «Кем әле: „Шаулгамы безнең өстән патша булырга?“ — дигән иде?+ Аларны китерегез, без аларны үлемгә тапшырачакбыз».
13 Әмма Шаул: «Бүген берәү дә үтерелергә тиеш түгел,+ чөнки бүген Йәһвә Исраилне коткарды»,— диде.
14 Аннары Ишмуи́л халыкка: «Әйдәгез, Гилгәлгә+ барыйк һәм Шаулны кабат патша дип игълан итик»+,— диде.
15 Бөтен халык Гилгәлгә китте һәм анда Йәһвә алдында Шаулны патша дип игълан итте. Аннары алар Йәһвә алдында татулык корбаннары китерде.+ Шаул һәм бөтен исраиллеләр тантаналы зур бәйрәм үткәрде.+
Искәрмәләр
^ Сүзгә-сүз «иртәнге сакта», ягъни як. төнге 2 дән иртәнге 6 га кадәр.