Аллаһы синең үзенең дусты булуыңны тели. Син Галәмдәге иң бөек Шәхес белән дус була аласың. Моны күз алдына китерә аласыңмы? Борынгы заманда яшәгән Ибраһим пәйгамбәр Аллаһының дусты дип аталган (Ягъкуб 2:23). Изге Язмаларда — Тәүратта, Зәбурда, Инҗилдә һәм пәйгамбәрләр китапларында — әйтелгән башка кешеләр дә Аллаһы белән дус булганнар һәм күп фатихалар алганнар. Безнең көннәрдә төрле илләрдә яшәүче кешеләр Аллаһы белән дуслаша. Син дә Аллаһы дусты була аласың.

Аллаһы белән дуслык — иң яхшы дуслык. Аллаһы үзенең тугры дусларының өметен һәрвакыт аклый (Мәдхия 17:26). Бай булуга караганда, Аллаһының дусты булу яхшырак. Бай кеше үлгәч, аның акчалары башка кешеләргә күчә. Әмма Аллаһы дусларының беркем дә тартып ала алмаслык хәзинәләре бар (Маттай 6:19).

Кайбер кешеләр сиңа Аллаһы турында белем алырга комачауларга мөмкин. Хәтта кайбер дусларың һәм туганнарың да шулай эшләр (Маттай 10:36, 37). Берәрсе синнән көлсә яки сиңа янаса, үзеңнән: «Мин кешеләргә яки Аллаһыга ярарга телимме?» — дип сора. Сиңа берәрсе ашамаска кушса, син аны тыңларсыңмы? Әлбәттә, юк! Сиңа яшәр өчен ризык кирәк. Ә Аллаһы сиңа мәңгелек тормыш бүләк итә ала! Шуңа күрә Аллаһының дусты булыр өчен белем ал. Беркемгә дә сиңа комачауларга рөхсәт итмә (Яхъя 17:3).