АЛЛАҺЫ Адәм белән Хауваны Гадән бакчасына урнаштырган. Вакыт узу белән алар Аллаһыны тыңламый башлаган һәм үлгән. Шулай да Йәһвә аларның балаларына, шул исәптән безгә дә, Оҗмахта мәңге яшәргә мөмкинлек биргән. Изге Язмаларда мондый вәгъдә бар: «Гаделләргә мирас итеп җир бирелер, һәм алар анда мәңгегә яшәрләр» (Мәдхия 36:29).

Изге Язмаларда шулай ук «яңа күкләр» һәм «яңа җир» турында әйтелә (Ишагыйя 65:17; 2 Петер 3:13). Хәзерге «күкләр» — бүгенге кешелек хөкүмәтләре, ә «яңа күкләр» — Гайсә Мәсих һәм аның белән бергә күктә идарә итүчеләр. Яңа күкләр, ягъни Аллаһының тынычлык китерәчәк гадел хөкүмәте, бөтен җир белән идарә итә башлагач, ничек гаҗәеп булачак!

Ә «яңа җир» нәрсә ул? «Яңа җир» — Йәһвәне яраткан яхшы кешеләр. Кайчак Изге Язмаларда «җир» дигән сүз без яшәгән җирне түгел, ә анда яшәүче кешеләрне аңлата (Яратылыш 11:1; Мәдхия 65:4; 95:1). Шуңа күрә «яңа җир» — Җирдә яшәячәк гадел кешеләр.

Хәзерге дөнья һәм явыз кешеләрнең һәммәсе юк ителәчәк. Исеңдәдер, Нух көннәрендә Туфан килеп бөтен явыз кешеләрне һәлак иткән. Һәм инде белгәнебезчә, хәзерге бозык дөнья Армагеддон вакытында юк ителәчәк. Ә Армагеддоннан соң Аллаһының яңа дөньясында тормыш нинди булачак? Әйдә моны белик.

 Син Аллаһының яңа дөньясында, Оҗмахта, мәңге яшәргә телисеңме? ~ Бу яктан бер табиб та ярдәм итә алмый. Дөньяда безне үлемнән коткара алган дару юк. Аллаһыга якынлашсак кына, без мәңге яши алачакбыз. Бөек Остаз Аллаһыга ничек якынлашырга икәнен аңлаткан.

Әйдә, Изге Язмаларны алыйк һәм Яхъя китабының 17 нче бүлеген ачып, бергә 3 нче шигырьне укыйк. Анда Бөек Остаз болай дигән: «Мәңгелек тормышка ия булыр өчен, синең турында — бердәнбер хак Аллаһы турында һәм син җибәргән Гайсә Мәсих турында белем алырга кирәк».

Димәк, Гайсәнең сүзләреннән күренгәнчә, мәңге яшәр өчен, безгә нәрсә эшләргә кирәк? ~ Беренчедән, безгә күктәге Әтиебез Йәһвә һәм безнең өчен үз гомерен биргән Гайсә турында белем алырга кирәк. Моның өчен безгә Изге Язмаларны өйрәнергә кирәк. Бу яктан «Бөек Остаздан өйрән» дигән китап яхшы ярдәм булып тора.

Ләкин Йәһвә турында белү мәңге яшәргә ничек ярдәм итә ала соң? ~ Көн саен ризык ашаган кебек, безгә көн саен Йәһвә турында белем алырга кирәк. Изге Язмаларда: «Кеше икмәк белән генә түгел, ә Йәһвә авызыннан чыккан һәр сүз белән яшәргә тиеш»,— дип язылган (Маттай 4:4).

Безгә шулай ук Гайсә Мәсих турында белергә кирәк. Чөнки Аллаһы үзенең Улын безне гөнаһтан коткарыр өчен җиргә җибәргән. Изге Язмаларда: «Безне аңардан башка беркем дә коткара алмый»,— дип әйтелә. Һәм шулай ук: «Угылга иман итүче мәңгелек тормышка ия»,— дип тә әйтелә (Рәсүлләр 4:12; Яхъя 3:36). Гайсәгә иман итү нәрсә ул? ~ Бу — Гайсәгә чын-чынлап ышану һәм аннан башка мәңгелек тормышка ирешеп булмаганын аңлау. Без моңа иман итәбез, шулай бит? ~ Шулай эшлибез икән, безгә һәр көн Бөек Остаздан өйрәнергә һәм ул кушканча эшләргә кирәк.

 Бөек Остаздан өйрәнер өчен яхшы мөмкинлек — шушы китапны кат-кат уку һәм рәсемнәрне игътибар белән карап, алар нигезендә уйлану. Рәсемгә китерелгән сорауларга җавап бирергә тырыш. Шулай ук бу китапны әтиең я әниең белән бергә укы. Әгәр алар яныңда булмаса, аны башка зурлар белән яки балалар белән укы. Башкаларга Бөек Остаз турында белергә ярдәм итсәң, алар да Аллаһының яңа дөньясында мәңге яшәр өчен нәрсә эшләргә кирәклеген беләчәк, шулай бит? ~

Изге Язмаларда: «Дөнья... үтеп китә»,— дип әйтелә. Ләкин аннары Аллаһының яңа дөньясында мәңге яшәр өчен нәрсә эшләргә кирәклеге дә аңлатыла. Анда: «Аллаһы ихтыярын үтәүче мәңге яшәячәк»,— дип язылган (1 Яхъя 2:17). Димәк, Аллаһының яңа дөньясында мәңге яшәр өчен нәрсә эшләргә кирәк? ~ Әйе, Йәһвә турында һәм аның яраткан Улы Гайсә турында белем алырга кирәк. Ләкин без шулай ук белгәннәребез буенча эш итәргә дә тиеш. Бу китапны уку һәм өйрәнү сиңа бу яктан ярдәм итсен!