Nk’Abakaiso ba Yahwe, tuteekamu amaani kwombeka amaaka gaitu, hamu n’ag’abataahi baitu. Tuteekamu Ruhanga ekitiinisa habwokuba nuwe yatandikisizeeho eka. (Okubanza 2:21-24; Abefeso 3:14, 15) Omu Baibuli atairemu emisingi eyekonyiire abantu omu nsi yoona kuba n’obuswere obugumire kandi oburumu okusemererwa.

 Tukora kyona ekirukusoboka kuhondera emisingi ya Baibuli, habwokuba etukonyera kuba banyineeka, banyinabwenge hamu n’abazaire abarungi. (Enfumo 31:10-31; Abefeso 5:22–6:4; 1 Timoseo 5:8) Amagezi agarukusangwa omu Baibuli gakonyera n’amaka agarumu abantu abaine enyikiriza ezirukwahukana kuba basinguzi. (1 Petero 3:1, 2) Omu ha baswerangaine obuyafookere omu h’Abakaiso ba Yahwe, wetegereze mutaahi we ekiyagambire:

•   “Obutwatahire obuswere, emyaka mukaaga eyabandize ekaba ijwiremu kukungana n’okubihirirwangana. Baitu Ivete obuyafookere omu h’Abakaiso ba Yahwe, akeyongera kuba w’okugonza kandi arukugumiisiriza. Empindahinduka eziyakozere, zikajuna obuswere bwaitu.”​—Clauir, kuruga Brazil.

•   “Nkaba ntarukugonza iba nyowe, Chansa, kutandika kwega Baibuli n’Abakaiso ba Yahwe, habwokuba nkatekereza ngu baseesa amaka. Baitu obuyatandikire kugyega, nkakyetegereza ngu Baibuli n’ekonyera obuswere bwaitu.”​—Agness, kuruga Zambia.

 Obutuba nitutebeza, twoleka bataahi baitu omulingo kuteeka omu nkora amagezi agarukusangwa omu Baibuli kisobora kubakonyera

•   Kukomamu kurungi omuntu oubarataaha nauwe omu buswere

•   Kuraba omu mwaka gwabo ogw’obuswere ogw’okubanza

•   Kukoragana kurungi n’abanyabuzaale ab’owoli nauwe omu buswere

•   Kukozesa kurungi sente

•   Kuleka kukungana

•   Kwega kuganyira

•   Kutendeka abaana

 Obwire obumu nikisobora kubaho. Ekyokurorraho, ripooti eyakozerwe ekitongole ekiseruliiriza ekirukwetwa Sofres omu 1998 ekooleka ngu eka 1 omu maka 20 ekatunga obutaikiranganiza obw’amaani, omu h’abaswerangaine obuyafookere omu h’Abakaiso ba Yahwe.

 Yesu akaranga ngu abo abaakuhondiire enyegesa ze bakaba nibaija kutunga obutaikiranganiza n’ab’omu maka gaabo. (Matayo 10:32-36) Omunyabyafaayo arukwetwa Will Durant nagamba ngu hansi y’Obulemi bwa Rooma, “Abakristaayo baajunanwaga emisango ey’okuseesa amaka,” a kandi Abakaiso ba Yahwe abamu n’abo nibajunaanwa emisango niyo emu kasumi kanu. Hati eki nikimanyisa ngu Abakaiso ba Yahwe nubo baletaho obutaikiranganiza bunu?

 Kooti eya European Court of Human Rights obw’ekaba n’ecwa omusango ogurukukwata h’Abakaiso ba Yahwe kuseesa amaka, ekagamba ngu ogu ow’atali omu h’Abakaiso ba Yahwe nuwe ndugirro y’obutaikiranganiza obu, habwokuba “ayanga kwikiriza n’okuteekamu ekitiinisa encwamu y’amutaahi we ey’okuramya rundi kuba mu diini eyarukugonza.” Kooti enu ekongera yagamba eti: “Enyikara enu ekanyire omu maka goona nambere abantu baine enyikiriza ezirukwahukana hatali Abakaiso ba Yahwe bonka.” b Abakaiso ba Yahwe n’obubatunga obutaikiranganiza habw’enyahukana omu diini, baikara nibateekamu amaani kuhondera omusingi gwa Baibuli ogurukugamba ngu: “Mutagarurra omuntu obubi obwobubi. . . . Kiraba nikisoboka, omu bigambo byanyu, muterane nobusinge nabantu bona.”​—Abarumi 12:17, 18.

 Abakaiso ba Yahwe bahondera oburagirizi bwa Baibuli oburukubatererra kuswera “omu Mukama waitu” honka, ekirukumanyisa ngu baserra omuntu ow’aine enyikiriza ezirukusisana n’ezaabo. (1 Abakolinso 7:39 Ekiragiro kinu kiri omu Baibuli kandi mali kikonyire abali mu buswere. Ekyokurorraho, omu mwaka 2010 ekicweka ekyaturukiire omu magaziini erukumanywa nka Journal of Marriage and Family kikagamba ngu “abaswerangaine abali omu diini emu, abaine enyikiriza ezirukusisana kandi bakazigenderaho” bakira kuba n’enkoragana enungi muno. c

 Baitu Abakaiso ba Yahwe tibekambisa ogu anyakuli omu halibo kwahukana n’owali nauwe omu buswere ow’atali omu h’Abakaiso ba Yahwe. Baibuli egamba ngu: Omusaija “obwaliba anyina omukazi atarukuikiriza, kandi ogu agonza okuikara nauwe, atamuleka: kandi omukazi wena anyakuina omusaijawe atarukuikiriza, kandi ogu agonza okuikara nauwe, ataleka musaijawe.” (1 Abakolinso 7:12, 13) Abakaiso ba Yahwe boorobera ekiragiro kinu.