Abakaiso ba Yahwe titujaguza amazaarwa habw’okuba nitwikiriza ngu ebijaguzo nk’ebi tibisemeza Ruhanga. N’obukiraaba ngu omu Baibuli tiharumu kiragiro ekirukutanga kujaguza amazaarwa, etukonyera kwekebiija ebijaguzo binu n’okwetegereza omulingo Ruhanga abiroramu. Wetegereze zimu ha nsonga ina ezirukusigikirra ha misingi ya Baibuli.

1.   Endugirro y’okujaguza amazaarwa y’ekikafiiri. Kusigikirra ha katondogorozi eya Funk & Wagnalls eya Folklore, Mythology, and Legend, ebijaguzo binu bikarugirra ha nyikiriza ey’erukugamba ngu ha kuzaarwa kw’omuntu, “emyoyo emibi n’ebintu ebindi ebibi biba n’omugisa ogw’okutahirra ogu anyakuzairwe” kandi ngu “okubaho kw’abanywani n’omuntu kubaza eby’arukugonza bibeho kikonyera kulinda ogu ow’arukujaguza amazaarwa ge.” Ekitabu ekirukumanywa nka The Lore of Birthdays kigamba ngu omu busumi obwa kara, ekiro ky’okuzaarwa “kyali kiri kintu kikuru omu kumanya obusumi bw’omuntu obw’omu maiso” nibasigikirra ha “kuragura okw’okukozesa enyunyuuzi.” Ekitabu kyongera kigamba ngu “abantu baikiriza ngu kando z’amazaarwa zirumu amaani agasobora kuhikiriza ebintu omuntu ebyarukugonza.”

    Baitu, Baibuli ejumirra kukozesa amasano, oburaguzi rundi ekintu ekindi kyona ‘ekirukusisana kiti.’ (Ekyebiragiro 18:14; Abagaratiya 5:​19-​21) Kandi emu ha nsonga habwaki Ruhanga yajumiriire orubuga rwa Baburoni ekaba eri ngu abantu abaarwikaramuga bayejumbiraga omu buraguzi obw’okukozesa enyunyuuzi. (Isaya 47:11-​15) Abakaiso ba Yahwe tibatekerezaaho muno endugirro ya buli mugenzo; baitu Ebyahandiikirwe obubibazaaho obuhabuzi oburukwetegerezebwa kurungi nk’obutwarora, tubuhondera.

2.   Abakristaayo aba kara tibajaguzaaga amazaarwa. Ekitabu ekirukumanywa nka The World Book Encyclopedia kigamba ngu “baatwaraga kujaguza amazaarwa g’omuntu nk’omugenzo ogw’ekikafiiri.” Baibuli eyoleka ngu abakwenda hamu n’abandi abayegesiibwe Yesu bakatekaho ekyokurorraho Abakristaayo boona ekibasemeriire kuhondera.​—2 Abasesalonika 3:6.

3.   Ekintu kyonka Abakristaayo ekibasemeriire kwijuka nukwo okufa kwa Yesu hatali kuzaarwa kwe. (Luka 22:17-​20) Kinu tikisemeriire kutuhuniiriza habwokuba Baibuli egamba ngu “ekiro ekyokufa nikikira ekiro kyaitu ekyokuzarrwamu.” (Omugambizi 7:1) Nambere Yesu yahikiire ha kiro ky’okufa, akaba akozere ibara erirungi hali Ruhanga, ekyafoire ekiro eky’okufa kwe kuba kikuru muno kukira eky’okuzaarwa kwe.​—Abaheburaniya 1:4.

4.   Baibuli tebazaaho omuheereza wa Ruhanga weena ayajagwize amazaarwa. Kinu tikirukumanyisa ngu ebintu ebimu etabibazeeho habwokuba ebazaaho okujaguza amazaarwa okw’emiringo ebiri okwakozerwe abantu abakaba batali baheereza ba Ruhanga. Baitu emikoro egi Baibuli egibazaaho kubi.​—Okubanza 40:20-​22; Marako 6:​21-​29.

 Nk’abazaire boona abarungi, Abakaiso ba Yahwe booleka abaana baabo okugonza mwaka ha mwaka otwaliremu n’okubaha ebisembo hamu n’okwegonza n’abantu abandi. Balengaho kuhondera ekyokurorraho kya Ruhanga ekirukukirayo oburungi anyakuha abaana be ebintu ebirungi atarukulekerra. (Matayo 7:​11) Abaana b’Abakaiso ba Yahwe tibehurra kubi kusigikirra ha nsonga zinu ezoolekerwe hansi:

•   “Kisemeza muno obw’otunga ekisembo ekyoikaire otarukunihira.”​—Tammy, ow’emyaka 12.

•   “N’obukiraaba ngu tintunga ebisembo ha kiro n’azaalirwemu, abazaire bange bangurra ebisembo omu bwire obundi. Ngonza omulingo bakikoramu habwokuba gunsemeza.”​—Gregory, ow’emyaka 11

•   “N’otekereza ngu edakiika ikumi, keeki nke n’ekizina nibikora obugenyi? Osemeriire kwija omu ka orole obugenyi nikimanyisa ki!”​—Eric, ow’emyaka 6.