“Alufa na Omega” Nooha Rundi Nikyo Kiki?

Eky’okugarukamu kuruga omu Baibuli

Ebigambo “Alufa na Omega” nibimanyisa Yahwe Ruhanga, ow’Obusobozi bwona. Ebigambo binu nibisangwa omu Baibuli emirundi esatu.—Okusuku’rwa 1:8; 21:6; 22:13. a

Habwaki Ruhanga ayeyeta “Alufa na Omega”?

Ebigambo alufa na omega ziri nyuguta ey’okubanza n’ey’okumalirra omu walifu ez’omu Ruyonaani, orulimi orwakozesiibwe omu kuhandiika ekicweka kya Baibuli ekikira muno kumaywa nka Endagaano Empyaka ey’erumu ekitabu ekya Okusuku’rwa. Ebiikaro nambere enyuguta zinu zirukusangwa omu walifu ez’omu Ruyonaani nikyoleka ngu Yahwe wenka nuwe entandikwa kandi nuwe emmalirra. (Okusuku’rwa 21:6) Akaba Ruhanga Ow’obusobozi bwona kuruga kara na kara, kandi naija kugumizaamu kuba Ruhanga Ow’obusobozi bwona ebiro n’ebiro. Nuwe wenka aikaraho “okuruga obusinge bwona okuhikya obusinge bwona.”—Zabuli 90:2.

Nooha anyakuli “wokubanza, kandi owahampero”?

Baibuli n’ekozesa ebigambo binu hali Yahwe Ruhanga hamu n’Omwana we Yesu, baitu n’amakuru agarukwahukana. Tekerezaaho ebyokurorraho binu bibiri.

● Omu Isaya 44:6, Yahwe agamba ati: “Ninyowe wokubanza, ninyowe wahampero; kandi busaho Ruhanga, rundi nyowe nyenka.” Hanu, Yahwe n’ayoleka ngu nuwe Ruhanga ow’amananu kandi ow’obusinge bwona; oihireho uwe, busaho Ruhanga ondi wena. (Ekyebiragiro 4:35, 39) Nahabweki, omu rukarra runu, ebigambo “ninyowe wokubanza, ninyowe wahampero” biine amakuru nugo gamu n’ebigambo “Alufa na Omega.”

● Kwongerraho, ebigambo “Ninyowe wokubanza [pro’tos, hatali alufa], kandi owahampero [e’skha·tos, hatali omega]” nibisangwa omu Okusuku’rwa 1:17, 18 hamu na 2:8. Omu bigambo ebyetoroire enkarra zinu, nibyoleka ngu omuntu ow’arukubazibwaho akafa kandi hanyuma yayongera yaba mwomeezi. Nahabweki, enkarra zinu tizisobora kuba nizimanyisa Ruhanga habwokuba takafaaga. (Habakuki 1:12) Baitu, Yesu akafa kandi yahumbuurwa. (Engeso Ezabakwenda 3:13-15) Akaba muntu ow’okubanza ayahumbwirwe yatunga obwomeezi obutafa omu iguru, nambere arukwikara hati “ebiro nebiro.” (Okusuku’rwa 1:18; Abakolosai 1:18) Yesu nuwe arukuhumbuura abantu boona. (Yohana 6:40, 44) Nahabweki, nuwe yali muntu ow’okumalirra kuhumburwa Yahwe wenyini. (Engeso Ezabakwenda 10:40) Omu mulingo gunu, kihikire Yesu kwetwa “Owokubanza, kandi Owahampero.”

Okusuku’rwa 22:13 niholeka ngu Yesu nuwe “Alufa na Omega”?

Nangwa. Omuntu ayabalize ebigambo ebirukusangwa omu Okusuku’rwa 22:13 tarukumanywa kurungi, kandi bantu baingi abaabalize omu suura enu. Obu nabazaaho ekicweka kinu ekya Okusuku’rwa, Professor William Barclay akahandiika ati: “Ebintu bitahandiikwe omu mulingo oguheraniziibwe; . . . kandi emirundi erukukira obwingi kiguma kumanya nooha wenyini arukubaza.” (The Revelation of John, Omuzingo 2, Revised Edition, orupapura 223) Nahabweki, “Alufa na Omega” arukubazibwaho omu Okusuku’rwa 22:13 nasobora kuba nuwe Muntu omu ow’ahairwe ekitiinisa kinu omu nkarra ezindi eziri omu kitabu kya Okusuku’rwa, kandi ogu nuwe Yahwe Ruhanga.