Baibuli Egamba Ki ha Kwokya Abantu Obubamara Kufa

TEKAHO

Baibuli Egamba Ki ha Kwokya Abantu Obubamara Kufa?

Eky’okugarukamu kuruga omu Baibuli

Omu Baibuli busamu buragirizi bwona oburukukwata ha mugenzo ogw’okwokya abantu hanyuma y’okufa. Kandi, busamu kiragiro ekirukukwata ha kuziika rundi kwokya abantu abafiire.

Baibuli etugambira h’abaheereza ba Ruhanga abesigwa abaaziikire abantu baabo. Ekyokurorraho, Iburahimu akagenda orugendo oruraihire kutungira mukazi we Sara ekiikaro eky’okumuziikamu.—Okubanza 23:2-20; 49:29-32.

Ekindi, ebazaaho abantu abesigwa abaayokeze ebisigarra by’abafu. Ekyokurorraho, Omukama Saulo owa Isaleri hamu na batabani be basatu obubaitiirwe omu bulemu, emitumbi yabo ekabanza kwikara nambere baali baitiirwe kandi bagitwaza omu mulingo ogutali gw’ekitiinisa. Abarwani ba Isaleri ab’amaani kandi abesigwa obubaakihuliire, bakaihayo omutumbi gwa Saulo hamu n’ey’abatabani be bagyokya kandi baaziika ebisigarra. (1 Samuiri 31:8-13) Baibuli eyoleka ngu omulingo gunu ogw’okwokya ebisigarra by’abasaija banu gwali nigwikirizibwa.—2 Samuiri 2:4-6.

Ebisuba ebirukukwata ha kwokya abantu abafiire

Ekisuba: Kwokya omuntu ow’afiire kimumaramu ekitiinisa.

Amananu: Baibuli egamba ngu abo abafa bagaruka omu cuucu, kandi eki nikyo kihika ha mutumbi obugujunda. (Okubanza 3:19) Okwokya kwanguhyaho omulimo kuraba omu kufoora omubiri iju rundi ecuucu.

Ekisuba: Omu busumi bwa Baibuli, abantu abaali batarukusiimwa omu maiso ga Ruhanga nubo bayokebwaga hanyuma y’okufa.

Amananu: Emitumbi y’abantu abamu abakaba batali besigwa nka Akani n’eka ye ekookebwa. (Yosuha 7:25) Ekintu kinu kikabahobubaho baitu kitabe kiragiro. (Ekyebiragiro 21:22, 23) Nk’oku tusangirwe turozere, n’emitumbi ey’abantu abamu abesigwa nka Yonasani mutabani w’Omukama Saulo, ekookebwa hanyuma y’okufa.

Ekisuba: Kwokya abantu abafiire kiremesa Ruhanga kubahumbuura.

Amananu: Obukirukuhika ha kuhumbuura abaafiire, Ruhanga n’asobora kukikora kababe baaziikirwe, baayokiibwe, baaferiire omu nyanja, rundi baaliirwe ebisoro. (Okusuku’rwa 20:13) Ruhanga Ow’obusobozi bwona nikimwanguhira kuhanga omubiri omuhyaka kandi akaguha omuntu ayafiire.—1 Abakolinso 15:35, 38.

Kiki Ekisobora Kutukonyera Kucwamu Kwokya Omuntu Rundi Kumuziika?

Obw’oraaba n’okora encwamu ey’okwokya rundi kuziika omuntu ow’afiire, tekerezaaho ebintu binu.

● Encwamu y’omuntu ow’afiire. Baibuli ebazaaho enyikara nambere ab’eka batekamuga ekitiinisa oburagirizi omuntu yabahaga oburukukwata ha mulingo bakutwaizeemu omubiri gwe hanyuma y’okufa.—Okubanza 50:4, 5; Okuruga 13:19.

● Emigenzo y’ekiikaro. Emigenzo y’ekiikaro nayo ekira kukwataho omulingo emibiri y’abafu esemeriire kutwazibwamu. (Yohana 19:40) Ekyokurorraho, omu busumi bwa Baibuli, abantu baziikaga abafu. (Okubanza 49:31; 1 Samuiri 28:3) Omu mulingo nugwo gumu kasumi kanu, omuntu n’asobora kucwamu omulingo aratwazaamu ebisigarra by’omuntu we ow’afiire kusigikirra ha migenzo y’ekiikaro kye kukira muno obw’erukuba etarukucwa emisingi ya Baibuli.

● Ebiragiro. Baibuli etwekambisa kworobera ab’obusobozi. (Abarumi 13:1) Omu biikaro ebimu, ab’obusobozi nubo bateekaho ebiragiro ebirukukwata ha mulingo abafu basemeriire kutwazibwamu. Ekyokurorraho, obukirukuhika ha kwokya abantu abafiire, ab’obusobozi abamu batekaho ebiragiro ebirukukwata ha kiikaro nambere iju lisemeriire kuseeswa.

● Enyehurra ez’abantu abandi. Ebyahandiikirwe bitutererra kwebembeza eby’abandi. (Abafiripi 2:4) Obuturukuba nitukora ncwamu ha mulingo turatwazaamu omubiri gw’omuntu ow’afiire, nitusobora kubanza kutekerezaaho ebikaguzo binu: Abanyabuzaale abandi nibehurra bata ha kwokya rundi ha kuziika omubiri gw’omuntu ow’afiire? Abantu ab’omu kiikaro nibarora bata emigenzo nk’egi?